អ្នកខាន ឬមិនដែលទៅលេង ជីផាត គួរដឹង ប្រភេទ និងតម្លៃកន្លែងស្នាក់នៅ បច្ចុប្បន្ន

ជីផាត ជា​​តំបន់​ទេសចរណ៍ធម្មជាតិដ៏ស្រស់បំព្រង និងទាក់ទាញនៃខេត្តកោះកុង។ សហគមន៍អេកូទេសចរណ៍​ ជីផាត មាន ភូមិឋាន ចម្ការច្បារដំណាំ ឈើហូបផ្លែ ទីតាំងបុរេប្រវត្តិ ពិសេស ឆាយទឹកធ្លាក់ ជាច្រើនកន្លែងដែលមិនអាចដើរមួយថ្ងៃសព្វ។ ខណៈស្ថានភាពកូវីដ-១៩ បានធូរស្រាល បន្ទាប់ពីតានតឹងជិត ២ឆ្នាំកន្លងទៅនេះ ភ្ញៀវទេសចរភាគច្រើនពិតជានឹករលឹក និងចង់ទៅកម្សាន្ត សម្រាកលំហែអារម្មណ៍ ដើម្បីបានទស្សនាច្រើនកន្លែងនៅជីផាត ព្រមទាំងចង់ដឹងពីតម្លៃស្នាក់នៅបច្ចុប្បន្នផងដែរ។

ឈ្មោះ អន សុវណ្ណ ប្រធានសហគមន៍​អេកូ​ទេសចរណ៍​ជី​ផាត បានឱ្យ “កម្ពុជាថ្មី” ដឹងថា នៅជីផាត ផ្ដល់ការស្នាក់នៅមាន ៣ ជម្រើសជូនភ្ញៀវទេសចរ គឺមាន ផ្ទះស្នាក់ ផ្ទះសំណាក់ និង បឹងកាឡូ តាមការចង់បាន ឬចង់សាកបទពិសោធន៍ស្នាក់នៅថ្មីរបស់ភ្ញៀវ ក្នុងតម្លៃដូចគ្នា ទាំងភ្ញៀវជាតិ និងភ្ញៀវបរទេស។

លោក សុវណ្ណ បានឱ្យដឹងបន្ថែមថា ផ្ទះស្នាក់ មានតម្លៃ ៥ ដុល្លារ ក្នុង១យប់ អាចគេងបាន២នាក់ ផ្ទះសំណាក់តម្លៃពី ៧ ដល់ ១០ ដុល្លារ ចំណែក បឹកកាឡូ មានតម្លៃចាប់ពី ១៥ ដល់ ៥០ ដុល្លារ។ លោកបានបញ្ជាក់បន្ថែមថា ចំពោះ បឹងកាឡូ មាន កង្ហារ និងម៉ាស៊ីនត្រជាក់។

ចំណែក លោក ទី ជាម្ចាស់ ភោជនីដ្ឋាន និង ផ្ទះសំណាក់ រមណីដ្ឋាន “ទឹកធ្លាក់ ឆាយខ្ពស់” បានឱ្យ “កម្ពុជាថ្មី” ដឹងថា សម្រាប់ភ្ញៀវទេសចរ ដែលចង់សម្រាក់នៅក្បែរ ឆាយខ្ពស់ ដែលអាចលេងទឹក និងស្ដាប់ទឹកហូរជាដើមនោះ គឺ លោកមានផ្ទះសំណាក់ ២ប្រភេទ។ ទី១ ផ្ទះសំណាក់ គ្រែ១ មានតម្លៃ ១០ ដុល្លារ ក្នុង១យប់ និង ផ្ទះសំណាក់ មានគ្រែ ២ មានតម្លៃ ១៥ ដុល្លារ។

លោក ទី បានឱ្យដឹងបន្ថែមថា ករណី ភ្ញៀវយកតង់មកបោះខ្លួនឯង គឺគិតតម្លៃកន្លែង ១តង់ ១ម៉ឺនរៀល។ បើបោះតង់លើគ្រែ និងមានដំបូល (គ្រែហូបបាយជាប់មាត់ទឹក) គឺតម្លៃ ១យប់ ២ម៉ឺនរៀល។

សហគមន៍អេកូទេសចរណ៍ជីផាត មានកន្លែងស្រស់ស្អាតគួរឱ្យចង់ទស្សនាកម្សាន្តចំនួន១៥កន្លែង ក្នុងនោះរួមមាន៖ មើលថ្ងៃលិច មើលអំពិលអំពែកនាពេលយប់ និងជិះទូកចាក់បង្កងនៅតាមដងព្រែកជីផាត ផ្នូរបុរាណ និងពាងបុរាណ ដែលមានអាយុកាលជាង៥០០ឆ្នាំ រូងប្រចៀង អូរទឹកវេទ អូរពាមក្រវាញ អូរក្រូច អូរម្លូ វាលប្រាក់ វាលមាស ត្រពាំងកិត ដំណាក់ខុស ភ្នំត្រងោល ឆាយខ្ពស់ ឆាយជ្រៃជាដើម។

គួរបញ្ជាក់ថា សហគមន៍អេកូទេសចរណ៍ជីផាត ត្រូវបានបង្កើតឡើងតាំងពីឆ្នាំ២០០៧ ក្នុងគោលបំណងដើម្បីចូលរួមថែរក្សាការពារបរិស្ថាន ធនធានធម្មជាតិ ព្រៃឈើ សត្វព្រៃ៕

អត្ថបទ៖ ច័ន្ទ ​វីរៈ