ក្រសួងការងារ នឹងរៀបចំពិព័រណ៍ការងារដ៏ធំមួយដើម្បីផ្តល់ឱកាសការងាររាប់ពាន់កន្លែងដល់យុវជន

ទីភ្នាក់ងារជាតិមុខរបរនិងការងារនៃក្រសួងការងារ និងបណ្តុះបណ្ដាលវិជ្ជាជីវៈ ក្រោមកិច្ចសហការជាមួយសហភាពសហព័ន្ធយុវជនកម្ពុជារាជធានីភ្នំពេញ និងឧបត្ថម្ភគាំទ្រដោយអង្គការអន្តរជាតិខាងការងារ ILO នឹងរៀបចំកម្មវិធី ពិព័រណ៍ការងារ «ដែលនឹងប្រព្រឹត្តទៅរយៈពេល ០២ថ្ងៃ គឺចាប់ពីថ្ងៃទី២៣-២៤ ខែមិថុនា ឆ្នាំ២០២២ នៅទីតាំងអគារ KAMPUS ជិតស្ថានអាកាសក្បាលថ្នល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមសេចក្តីជូនដំណឹងរបស់ក្រសួងការងារ និងបណ្តុះបណ្ដាលវិជ្ជាជីវៈ ចុះថ្ងៃទី២០ ខែមិថុនា នេះ បានឱ្យដឹងថាកម្មវិធីពិព័រណ៍ការងារនេះ​ ត្រូវបានរៀបចំឡើងជាវេទិកាជួបជុំគ្នាដោយងាយស្រួលនៅមួយកន្លែងរវាងនិយោជក
អ្នកផ្តល់ការអប់រំបណ្តុះបណ្តាល និងអ្នកស្វែងរកការងារដើម្បីផ្សព្វផ្សាយព័ត៌មានឱកាសការងារជ្រើសរើសកម្លាំងពលកម្ម ដាក់ពាក្យស្នើសុំការងារ និងព័ត៌មានស្ដីពីការបណ្ដុះបណ្ដាលជំនាញព្រមទាំងសិក្ខាសាលាចែករំលែកបទពិសោធន៍ ការ ប្រឹក្សាយោលល់ការងារ អាជីព និងត្រៀមចូលការងារដោយវាគ្មិនដែលមានបទពិសោធន៍ជ្រាលជ្រៅក្នុងទីផ្សារការងារ។

ក្រសួងបានបន្តថា ក្នុងព្រឹត្តិការណ៍ពិព័រណ៍ការងារនេះ នឹងមានក្រុមហ៊ុនធំៗចំនួន២២ ចូលរួមតាំងបង្ហាញអំពីតម្រូវការជ្រើសរើសកម្លាំងពលកម្មប្រមាណ៣,២០០កន្លែង ហើយសង្ឃឹមថា នឹងទាក់ទាញអ្នកចូលរួម និងដាក់ពាក្យរកការងារ
ដែលជាយុវជន និងកម្លាំងពលកម្មវ័យក្មេងរាប់ពាន់នាក់។

ក្រសួងណែនាំឱ្យគ្រប់ក្រសួង ស្ថាប័ន ក្រុមហ៊ុន សហគ្រាស អង្គការជាតិ-អន្តរជាតិ អ្នកស្វែងរកការងារ និងសាធារណជន ចូលរួមកម្មវិធីពិព័រណ៍ការងារឱ្យបានច្រើនកុះករ៕

អត្ថបទ៖ សំអឿន