ព័ត៌មានជាតិ

កម្ពុជាថ្កោលទោសយ៉ាងខ្លាំងបំផុត ចំពោះឃាតកម្មដ៏ព្រៃផ្សៃលើលោក Shinzo Abe

បានផុស

៤ years មុន

នៅ

ថ្ងៃសុក្រ ៨ កក្កដា ២០២២

ដោយ

ក្រសួងការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជានៅល្ងាចថ្ងៃសុក្រនេះ បានចេញសេចក្តីថ្លែងការណ៍មួយ សម្តែងការសោកសៅ និងតក់ស្លុត ចំពោះការទទួលមរណភាពរបស់ឯកឧត្តម ស៊ីនហ្សូ អាបេ (Shinzo Abe) អតីតនាយករដ្ឋមន្ត្រីជប៉ុន ក្រោយត្រូវបានបាញ់ប្រហារក្នុងអំឡុងពេលធ្វើយុទ្ធនាការឃោសនាបោះឆ្នោតថ្នាក់ជាតិ នៅភាគខាងលិចទីក្រុងណារ៉ា ប្រទេសជប៉ុន នៅថ្ងៃសុក្រ ទី០៨ ខែកក្កដា ឆ្នាំ២០២២ នេះ។

សេចក្តីថ្លែងការណ៍បញ្ជាក់ថា “រាជរដ្ឋាភិបាលកម្ពុជា សូមធ្វើការថ្កោលទោសយ៉ាងខ្លាំងបំផុតចំពោះឃាតកម្មដ៏ព្រៃផ្សៃនេះ”។ បើតាមក្រសួងការបរទេស ឯកឧត្តម ស៊ីនហ្សូ អាបេ គឺជាថ្នាក់ដឹកនាំដ៏ឆ្នើមមួយរូបរបស់ជប៉ុន និងជាមិត្តភក្ដិជាទីគោរពស្រលាញ់របស់កម្ពុជា ហើយមរណភាពរបស់ឯកឧត្តម ស៊ីនហ្សូ អាបេ គឺជាការបាត់បង់ដ៏គួរឱ្យសោកសង្រេង មិនត្រឹមតែសម្រាប់ប្រជាជនជប៉ុនប៉ុណ្ណោះទេ ប៉ុន្ដែក៏សម្រាប់ប្រជាជនកម្ពុជា ផងដែរ។

រាជរដ្ឋាភិបាល និងប្រជាជនកម្ពុជា សូមចូលរួមរំលែកទុក្ខដ៏ជ្រាលជ្រៅបំផុត និងសំដែងនូវសមានចិត្តដ៏ស្មោះស្ម័គ្រជាទី បំផុតជូនចំពោះគ្រួសារសពរបស់ឯកឧត្តម ស៊ីនហ្សូ អាបេ រដ្ឋាភិបាល និងប្រជាជនជប៉ុន៕

ដោយ ៖ កោះកែវ