លោក យង់ ពៅ ស្នើពលរដ្ឋបញ្ឈប់ការរិះគន់បែបជាន់ពន្លិចជុំវិញបញ្ហាភ្នំតាម៉ៅ

លោក យង់ ពៅ អគ្គលេខារាជបណ្ឌិត្យសភាកម្ពុជា បានសំណូមពរដល់ប្រជាពលរដ្ឋឱ្យបញ្ឈប់នូវការរិះគន់បែបជាន់ពន្លិចជុំវិញការឈូសឆាយនៅភ្នំតាម៉ៅដោយក្រុមហ៊ុនឯកជនមួយ ក្រោយពីរាជរដ្ឋាភិបាលបានចេញនូវសេចក្តីប្រកាសបញ្ឈប់សកម្មភាពទាំងនេះរួចមកហើយ។ 

លោក យង់ ពៅ ថ្លែងប្រាប់ “កម្ពុជាថ្មី” ថា កាលដែលរាជរដ្ឋាភិបាលបញ្ឈប់នូវការអភិវឌ្ឍនៅតំបន់ភ្នំតាម៉ៅ ប្តូរមកជាការអភិរក្សធម្មជាតិនិងសត្វព្រៃវិញ គឺជារឿងគួរឱ្យសោមនស្សមួយសម្រាប់ប្រជាជនខ្មែរ ជាពិសេសអ្នកស្រលាញ់ធម្មជាតិតែម្តង បើទោះបីជាកន្លងមកមានបញ្ហាខុសឆ្គងទៅលើបញ្ហានេះក៏ដោយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីបានឃើញនូវចំណាត់ការរបស់រដ្ឋាភិបាលបន្ទាប់ពីប្រជាជនបានសំណូមពររួចមក  ក៏នៅតែមានប្រជាជនមួយចំនួនបានធ្វើការបញ្ចេញមតិបែបឌឺដងទៅកាន់រដ្ឋាភិបាលដដែល នៅលើបណ្តាញសង្គមនានា។ 

លោកក៏បានមើលឃើញថា ប្រជាជនមួយចំនួននៅតែមានអាកប្បកិរិយារិះគន់បែបជាន់ពន្លិច ទោះបីជាប្រមុខរដ្ឋកម្ពុជាបានកែប្រែស្ថានការណ៍យ៉ាងណាក្តី។ លោកបានលើកទឹកចិត្តឱ្យ ប្រជាពលរដ្ឋប្តូរយុទ្ធសាស្រ្តពីការរិះគន់បែបជាន់ពន្លិច មកជាការរិះគន់បែបស្ថាបនាព្រមទាំង លើកទឹកចិត្តដល់រដ្ឋាភិបាលឱ្យមានការខិតខំប្រឹងប្រែងធ្វើល្អបន្ថែមទៀត ដើម្បីឱ្យភាគីពាក់ព័ន្ធទាំងអស់មានទឹកចិត្តខិតខំកែលំអបន្ថែមទៀត។ 

លោកបាននិយាយថា៖ “ទាំងរឿងបរិស្ថាន រឿងសង្គម រឿងនយោបាយជាដើម យើងត្រូវតែប្តូរទស្សនៈពីការរិះគន់យកមកស្ថាបនាសង្គមយើងវិញទើបឱ្យប្រជាជនយើង យុវជនយើងមានទម្លាប់យកគំនិតវិជ្ជមានដាក់ក្នុងខ្លួន កាលណាយើងមានគំនិតវិជ្ជមានក្នុងខ្លួន ធ្វើឱ្យការគិតយកមនសិកាជាតិជាធំ ដើម្បីគោលដៅជាតិយើងអភិវឌ្ឍន៍និងមានស្ថេរភាពទាំងអស់គ្នា”។ 

គួររំលឹកថា បន្ទាប់ពីមានការរិះគន់និងខ្លះទៀតបានសំណូមពរឱ្យក្រុមហ៊ុនឯកជនបញ្ឈប់ការ ឈូសឆាយនៅតំបន់ភ្នំតាម៉ៅនេះ សម្តេចតេជោ ហ៊ុន សែន ក៏បានចេញនូវសេចក្តីប្រកាស លុបចោលនូវការអភិវឌ្ឍន៍នៅភ្នំតាម៉ៅ និងប្តូរមកជាការដាំដើមឈើប្រណិតសម្រាប់អភិរក្ស តំបន់នោះជំនួសវិញ។ ប៉ុន្តែក៏នៅតែមានមតិមួយចំនួនបានធ្វើការរិះគន់ និងឌឺដងចំពោះបញ្ហា ខាងលើដដែល៕

ដោយ៖ អុន ស្រីមាន