ឯកឧត្តម ឌី វិជ្ជា ៖ យុវជនយល់ច្បាស់ពី​នីតិវិធីច្បាប់បោះឆ្នោត និងមានភាពក្លាហាន

បច្ចុប្បន្នយុវជនយល់ច្បាស់អំពីនីតិវិធីច្បាប់បោះឆ្នោត និងមានភាពក្លាហាន ពេលចុះសង្កេតការណ៍បោះឆ្នោត។ នេះជាការលើកឡើងរបស់ឯកឧត្តម ឌី វិជ្ជា អគ្គស្នងរងនគរបាលជាតិ ជាប្រធាន សសយក ខេត្តស្វាយរៀង និងជាប្រធានក្រុមការងារអ្នកសង្កេតការណ៍ជាតិ សសយក ខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ឌី វិជ្ជា មានប្រសាសន៍ថា ការចូលរួមចំណែករបស់យុវជន តាមបណ្ដា ក្រុង ស្រុក និងការដឹកនាំរបស់​ក្រុមការងារមានផែនការច្បាស់លាស់ ទាំងការរៀបចំសកម្មភាពការងារ និងការរៀបចំវគ្គបណ្ដុះបណ្ដាលរំលឹកជា​បន្តបន្ទាប់ ការទទួលបានគ្រូបណ្ដុះបណ្ដាលល្អៗពីស្ថាប័ន គ.ជ.ប ដែលបានចែករំលែកចំណេះដឹង និងបទពិសោធន៍​ចំៗដល់យុវជន និងការមានកិច្ចសហការល្អជាមួយមន្រ្តី គ.ជ.ប គ្រប់លំដាប់ថ្នាក់ ដែលយើងឃើញតាមរបាយការណ៍ មានការងារមិនយល់គ្នាខ្លះ នៅពេលបោះឆ្នោត ដោយសារការមិនយល់ពីតួនាទី ភារកិច្ច របស់មន្រ្តីមួយចំនួនតូច ជាមួយអ្នកសង្កេតការណ៍យើង បានសម្របសម្រួលដោះស្រាយបានទាន់ពេលវេលា។

ឯកឧត្តម បានបន្តថា យុវជនបច្ចុប្បន្នមានភាពក្លាហាន ពេលចុះសង្កេតការណ៍ អ្វីដែលយុវជនកត់សម្គាល់ឃើញ គឺមិនមែនជាភាពចៃដន្យទេ គឺកើតឡើងពីការយល់ច្បាស់ពីនីតិវិធី ច្បាប់បោះឆ្នោត បានច្បាស់លាស់ និងភាពក្លាហាន​របស់យុវជនដែលទទួលបានការបណ្ដុះបណ្ដាលច្បាស់លាស់ មានភាពក្លាហានក្នុងការកត់ត្រា និងលើកឡើងមកនេះ។

ឯកឧត្តម បានគូសបញ្ជាក់ថា កិច្ចការងារអ្នកសង្កេតការណ៍ជាតិនេះ ជាការងារស្នូលមួយក្នុងសសរស្តម្ភរបស់ សសយក ដែលស្ថិតក្នុងយុទ្ធនាការពលរដ្ឋល្អ ដែលសកម្មភាពនេះ ចូលរួមក្នុងការសង្កេតមើលនូវដំណើរការ ជាសាក្សីដ៏សំខាន់​ក្នុងការឃ្លាំមើល និងធានាបាននូវការបោះឆ្នោតប្រព្រឹត្តទៅដោយអហឹង្សា សេរី ត្រឹមត្រូវ យុត្តិធម៌ និងតម្លាភាព ព្រមទាំងឆ្លុះបញ្ជាំងបាននូវសមត្ថភាពមន្រ្តី គ.ជ.ប មានសមត្ថភាពគ្រប់គ្រាន់ក្នុងការរៀប​ចំប្រព័ន្ធបោះឆ្នោតបានដោយ​ខ្លួនឯង ដោយមិន​ពឹងពាក់លើបរទេស​ក្នុងការរៀបចំការបោះឆ្នោត​នៅក្នុងប្រទេសកម្ពុជា។

ភាពជោគជ័យរបស់ សសយក មិនមែនកើតចេញពីថ្នាក់ដឹកនាំខេត្តប៉ុណ្ណោះទេ គឺកើតចេញពីយុវជនអ្នកសង្កេតការណ៍​នៅតាមការិយាល័យបោះឆ្នោតផ្ទាល់ អ្វីដែលអ្នកសង្កេតការណ៍យើងសង្កេតឃើញ កត់ត្រាចូលក្នុងរបាយការណ៍នេះ បង្ហាញពីការយកចិត្តទុកដាក់ និងទំនួលខុសត្រូវខ្ពស់របស់យុវជន។ ឯកឧត្តម ឌី វិជ្ជា មានប្រសាន៍បែបនេះ នៅក្នុងពិធី​កិច្ចប្រជុំបូកសរុបការងារបោះឆ្នោតជ្រើសរើសក្រុមប្រឹក្សាឃុំ សង្កាត់ អាណត្តិទី៥ ឆ្នាំ២០២២ នៅខេត្តស្វាយរៀង កាលពីថ្ងៃទី ២១ ខែ សីហា៕