ក្រសួងអប់រំប្រកាសទទួលស្គាល់សាលាបឋមសិក្សា២ធ្នូ ជាសាលាគំរូអំណាន និងគណិតវិទ្យាថ្នាក់ដំបូង

ក្រសួងអប់រំ យុវជន និងកីឡា បានប្រកាសទទួលស្គាល់សាលាបឋមសិក្សា២ធ្នូ នៅខេត្តបាត់ដំបង ជាសាលាគំរូអំណាន និងគណិតវិទ្យាថ្នាក់ដំបូង ហើយស្នើឱ្យសាលានេះ ចែករំលែបបទពិសោធន៍នេះដល់សាលារៀនផ្សេងៗទៀត។ ពិធីប្រកាសដាក់សាលាបឋមសិក្សា២ធ្នូ ជាសាលាគំរូអំណាន និងគណិតវិទ្យាថ្នាក់ដំបូង និងពិធីសម្ពោធការថតវីដេអូការបង្រៀនគណិតវិទ្យាថ្នាក់ដំបូង បានធ្វើឡើងកាលពីពេលថ្មីៗនេះក្រោមអធិបតីភាពលោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីបានឱ្យដឹងថា ការដាក់ឱ្យសាលាបឋមសិក្សា២ធ្នូ ជាសាលាគំរូអំណាន និងគណិតវិទ្យាថ្នាក់ដំបូងក្នុងគោលបំណង ដើម្បីជំរុញសាលាបឋមសិក្សាខិតខំពង្រឹង និងពង្រីកវិធីសាស្ត្របង្រៀន និងរៀន នៅក្នុងសាលារៀន និងជួយដល់សាលារៀនដទៃទៀត តាមរយៈការផលិតជាវីដេអូ និងសម្ភារៈរៀន និងបង្រៀន ការធ្វើថ្នាក់និទស្សន៍ ការប្រជុំបច្ចេកទេស ការផ្ដល់ប្រឹក្សាគរុ កោសល្យ និងទស្សនកិច្ចសិក្សា ឆ្ពោះទៅលើកកម្ពស់គុណភាពរៀន និងបង្រៀនប្រកបដោយគុណភាព និងប្រសិទ្ធភាព។

លោករដ្ឋមន្ត្រីបានបន្តថា ចំពោះការរៀបចំការផលិតវីដេអូការបង្រៀនគណិតវិទ្យាថ្នាក់ដំបូងវិញគឺដើម្បីជួយជាមូលដ្ឋានដល់សាលារៀន ដែលមិនទាន់បានទទួលការបំប៉នកញ្ចប់សម្ភារៈ គណិតវិទ្យាថ្នាក់ដំបូង និងជាជម្រើសបន្ថែមទៀតសម្រាប់គ្រូបង្រៀន ក្នុងការអភិវឌ្ឍសមត្ថភាពរបស់ខ្លួន។  លោករដ្ឋមន្ត្រីចាត់ទុកថាការរៀបចំសម្ភារៈបង្រៀនគណិតវិទ្យាសម្បូរបែប ដើម្បីឱ្យសិស្សអាចយល់ពីប្បញ្ញត្តិបានច្បាស់លាស់ ដោយរៀបចំជាឌីជីថលដែលមានរូបភាពច្បាស់លាស់ និងងាយស្រួលសម្រាប់គ្រូបង្រៀនក្នុងការអនុវត្ត៕

ដោយ៖ សំអឿន