អាជ្ញាធរខេត្តកោះកុង ចុះរុះរើខ្ទម ចំនួន ៧០ ខ្ទម សង់គ្មានច្បាប់ នៅឃុំកោះស្តេច

លោក សុខ សុទ្ធី អភិបាលរងខេត្តកោះកុង បានដឹកនាំក្រុមការងារចុះអនុវត្តវិធាន រុះរើខ្ទមចំនួន ៧០ ខ្ទម សង់គ្មានច្បាប់អនុញ្ញាត នៅឃុំកោះស្តេច ស្រុកគិរីសាគរ បន្ទាប់ពីបានធ្វើការណែនាំច្រើនលើកច្រើនសាររួចមក។

លោក សុខ សុទ្ធី បានមានប្រសាសន៍ថា ដោយមានការណែនាំ និងអនុញ្ញាតពីលោកស្រី មិថុនា ភូថង អភិបាល នៃគណៈអភិបាលខេត្តកោះកុង លោកបានដឹកនាំក្រុមការងារ ចុះអនុវត្តវិធាន រុះរើខ្ទមចំនួន ៧០ ខ្ទម បង្គោលរបងលួសបន្លា សង់គ្មានច្បាប់អនុញ្ញាត ស្ថិតនៅក្នុងទីតាំងដីដែលរាជរដ្ឋាភិបាលបានជួលរយៈពេលវែងឱ្យក្រុមហ៊ុន យូញៀន វិនិយោគអភិវឌ្ឍ ស្ថិតនៅតំបន់អាងទឹក ភូមិពាមកាយ ឃុំកោះស្តេច ស្រុកគិរីសាគរ ខេត្តកោះកុង។

លោកបានបន្តថា មុននឹងឈានមកដល់ការអនុវត្តវិធានរដ្ឋបាល រុះរើខ្ទមនៅថ្ងៃទី០៣ ខែកញ្ញា ឆ្នាំ២០២២នេះ រដ្ឋបាលឃុំ ស្រុក បានចុះណែនាំផ្ទាល់ និងចេញលិខិតជូនដំណឹងដល់ប្រជាពលរដ្ឋឱ្យរុះរើខ្ទមដោយខ្លួនឯងផងដែរ ប៉ុន្តែមានប្រជាពលរដ្ឋមួយចំនួនមិនចូលរួមសហការ។

បន្ទាប់ពីការអនុវត្តវិធាននេះរួច លោក សុខ សុទ្ធី បានណែនាំឱ្យក្រុមហ៊ុន យូញៀន រៀបចំការពារកុំឱ្យមានជនខិលខូចចូលទន្ទ្រានកាន់កាប់ដីក្នុងទីតាំងវិនិយោគជាថ្មីទៀត និងសំណូមពរបងប្អូនប្រជាពលរដ្ឋ ឈប់ចិញ្ចឹមចិត្តលបលួចចូលទន្ទ្រានកាប់កាប់ដីរដ្ឋទៀត៕

អត្ថបទ៖ សំអឿន