សម្ដេចតេជោ ណែនាំឲ្យរកវិធីសាស្រ្ដបង្កើនចំនួនគ្រួសារ ដែលរងផលប៉ះពាល់ពីកូវីដផង និងពីអតិផរណាផង ដើម្បីទទួលបានប្រាក់ឧបត្ថម្ភ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា​ បានថ្លែងឲ្យដឹងថា រាជរដ្ឋាភិបាល កំពុងរកវិធីសាស្រ្ដបង្កើនចំនួនគ្រួសារ ដែលរងផលប៉ះពាល់ពីជំងឺកូវីដ-១៩ និងផលប៉ះពាល់ពីអតិផរណា ដើម្បីទទួលបានការឧបត្ថម្ភថវិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្ដេចតេជោ​ ហ៊ុន សែន មានប្រសាសន៍ក្នុងពិធីប្រគល់សញ្ញាបត្រដល់និស្សិតវិទ្យាស្ថានវ៉ាន់ដា នាព្រឹកថ្ងៃទី ៣ ខែតុលានេះថា សម្ដេច បានណែនាំឲ្យរដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ រកវិធីសាស្រ្ដបង្កើនចំនួនគ្រួសារ ដែលរងផលប៉ះពាល់ចេញកូវីដផង និងផលប៉ះពាល់ចេញពីអតិផរណាផង ដើម្បីទទួលបានការឧបត្ថម្ភថវិកា ពីរាជរដ្ឋាភិបាល។

សម្ដេចតេជោនាយករដ្ឋមន្ត្រី បាន​ថ្លែងយ៉ាងដូច្នេះថា​ «ខ្ញុំកំពុងតែរៀបចំ ប្រាប់ឲ្យ អូន ព័ន្ធមុនីរ័ត្ន ឲ្យរកវិធីបង្កើនចំនួនគ្រួសារមួយចំនួន ដែលមានផលប៉ះពាល់ចេញពីកូវីដផង ផលប៉ះពាល់ចេញពីអតិផរណាផង បន្ថែមគ្រួសារខ្លះថែមទៀត ២, ៣ម៉ឺន ៤, ៥ម៉ឺនគ្រួសារទៀត»។

សម្ដេចតេជោ ហ៊ុន សែន បានគូសបញ្ជាក់ថា ក្នុង ១ខែ គឺរាជរដ្ឋាភិបាលត្រូវចំណាយថវិកាប្រមាណ ៤០លានដុល្លារ ដើម្បីជួយឧបត្ថម្ភប្រជាពលរដ្ឋ ដែលជួបការលំបាកអំឡុងពេលការរាតត្បាតជំងឺកូវីដ-១៩ ហើយត្រូវប​ន្តជួយពួកគាត់បន្តទៀត៕

អត្ថបទ៖ ឃួន សុភ័ក្រ