លោក Joe Biden ប្រធានាធិបតីអាមេរិក ធ្វើដំណើរមកដល់ប្រទេសកម្ពុជាហើយ

ដូចការគ្រោងទុក លោក Joe Biden ប្រធានាធិបតីអាមេរិក បានធ្វើដំណើរមកដល់ប្រទេសកម្ពុជាហើយ នៅវេលាម៉ោង ៨ និង ២០ព្រឹកថ្ងៃទី ១២ ខែវិច្ឆិកា ឆ្នាំ ២០២២នេះ ដើម្បីចូលរួមកិច្ចប្រជុំកំពូលប្រចាំឆ្នាំអាមេរិក-អាស៊ាន និងកិច្ចប្រជុំកំពូលអាស៊ីបូព៌ា។ 

ទំព័រហ្វេសប៊ុករបស់ស្ថានទូតអាមេរិកប្រចាំកម្ពុជា បានឲ្យដឹងថា នៅប្រទេសកម្ពុជា លោក Joe Biden នឹងបញ្ជាក់ជាថ្មី នូវការប្តេជ្ញាចិត្តយូរអង្វែងរបស់សហរដ្ឋអាមេរិក ចំពោះតំបន់អាស៊ីអាគ្នេយ៌ និងមជ្ឈភាពអាស៊ាន និងពង្រឹងបន្ថែមលើជោគជ័យ នៃកិច្ចប្រជុំកំពូលពិសេសជាប្រវត្តិសាស្រ្ត អាមេរិក-អាស៊ាន នៅទីក្រុង Washington នាពេលកន្លង។ 

ជាមួយគ្នានេះ លោកប្រធានាធិបតីអាមេរិក នឹងបញ្ជាក់ពីសារសំខាន់នៃកិច្ចសហប្រតិបត្តិការ អាមេរិក-អាស៊ាន នៅក្នុងការធានាសន្តិសុខ និងវិបុលភាព នៅក្នុងតំបន់ និងសុខមាលភាព នៃប្រជាជនរបស់អាស៊ាន-អាមេរិក ដែលមានចំនួនសរុប ១ពាន់លាននាក់។

តាមគម្រោង សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា និងជាប្រធានអាស៊ានឆ្នាំ ២០២២ ក៏នឹងមានជំនួបសម្តែងការគួរសម និងពិភាក្សាការងារជាមួយលោក Joe Biden ប្រធានាធិបតីអាមេរិក ផងដែរ៕