​អាជ្ញាធរខេត្តក្រចេះ​ដាក់ឆ្មាំទន្លេ ៤៤ នាក់​ ការពារជីវិតសត្វផ្សោត

អាជ្ញាធរខេត្តក្រចេះ​បានចេញចំណាត់ការដាក់ឆ្មាំចំនួន ៤៤ នាក់ និងទីតាំងប៉ុស្ដិ៍ចំនួន ១១ កន្លែង តាមដង​ទន្លេមេគង្គនៅតំបន់អភិរក្សសត្វផ្សោត ដើម្បីការពារជីវិតផ្សោតកុំឱ្យងាប់ផុតពូជ។​

​លោក ទ្រី សុភក្ដិ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តក្រចេះបានឱ្យដឹងនៅថ្ងៃទី ៣១ ខែមករា ឆ្នាំ ២០២៣ នេះថា រដ្ឋបាលខេត្តក្រចេះបានកោះ​ហៅអ្នកពាក់ព័ន្ធមកប្រជុំ​ដោយបានដាក់ចេញនូវវិធាន​ការ​ និងរៀបចំផែនការយុទ្ធសាស្ត្រ គ្រប់គ្រង និងអភិវឌ្ឍ នៅតំបន់​អភិរក្ស​សត្វ​ផ្សោត និង​ត្រីមេពូជ។ ក្រោយពេលប្រជុំរដ្ឋបាលខេត្តបានចេញសេចក្ដីសម្រេចមួយក្នុងការ រួមចំ​ណែក​ ការពារ​សត្វ​ផ្សោត​កុំឱ្យងាប់តទៅទៀត​។

​លោក ទ្រី សុភក្ដិថ្លែងថា៖ «ការងាប់ផ្សោតមួយក្បាល​បើយើងគិតមិនដល់ទេ ដូចជាត្រីងាប់មួយក្បាលជារឿងធម្មតា ប៉ុន្តែនៅខេត្តក្រចេះ​ ប្រសិនជាអត់ផ្សោត គឺគេមិនសូវស្គាល់ទេខេត្តនេះទេ»។

នៅលើពិភពលោក សត្វផ្សោតទឹកសាប មានតែនៅប្រទេសកម្ពុជា គឺនៅខេត្តក្រចេះ និងខេត្តស្ទឹងត្រែង។ នៅខេត្តក្រចេះ នៅសល់ផ្សោតប្រមាណ ៥០ ក្បាល ខណៈផ្សោតបានងាប់ចំនួន ២៧ ក្បាលនារយៈពេល ៣ ឆ្នាំចុងក្រោយនេះ។ ផ្សោតនៅសល់សរុបទាំងខេត្តក្រចេះ និងខេត្តស្ទឹងត្រែង ចំនួន ៨៩ ក្បាល។

នៅឆ្នាំ២០២២នេះ មានសត្វផ្សោតស្លាប់បានកើនឡើងរហូតដល់ទៅ ១១ ក្បាល។ ការកើនឡើងនៃសកម្មភាពនេសាទខុសច្បាប់​នៅក្នុងតំបន់អភិរក្សសត្វផ្សោតនាពេលថ្មីៗនេះ នឹងបណ្តាលឱ្យសត្វផ្សោតទន្លេមេគង្គឈានទៅផុតពូជ ប្រសិន​បើគ្មានវិធានការបន្ទាន់ដើម្បីបញ្ឈប់សកម្មភាពខុសច្បាប់ទាំងនេះទេ៕

អត្ថបទ៖ ឡេង ដេត