សម្តេចតេជោ ហ៊ុន សែន រំលឹកជាថ្មីថា មន្រី្តគឺជាអ្នកបម្រើប្រជាជន មិនមែនជាចៅហ្វាយរបស់ប្រជាជនទេ

សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានរំលឹកជាថ្មីថា មន្រី្តគឺជាអ្នកបម្រើប្រជាជន មិនមែនជាចៅហ្វាយរបស់ប្រជាជនទេ​ ហើយកុំអាងបានធ្វើមន្ត្រីប្រើអំណាចទាំងទទឹងទិសឲ្យសោះ។

សម្តេចតេជោ ហ៊ុន សែន បានរំលឹកបែបនេះ គឺនៅក្នុងពិធីបិទវគ្គបណ្តុះបណ្តាលឆ្នាំ ២០២២ និងបើកវគ្គបណ្តុះបណ្តាលឆ្នាំ ២០២៣ របស់សាលាភូមិន្ទរដ្ឋបាល (ERA) នាព្រឹកថ្ងៃទី ២៧ ខែមេសា ឆ្នាំ ២០២៣នេះ។

សម្តេចតេជោ ហ៊ុន សែន បានណែនាំដល់មន្ត្រី ត្រូវធ្វើការបម្រើប្រជាជន ដោយការយកចិត្តទុកដាក់ និងនៅកៀកជិតជាមួយប្រជាជន។ សម្តេចតេជោ ហ៊ុន សែន បន្តទៀតថា មន្ត្រីថ្នាក់ក្រោមជាតិ ដូចជាអភិបាលរងខេត្ត ឬអភិបាលរងខេត្ត​ អភិបាលស្រុក ឬអភិបាលរងស្រុក បើរកបាននៅក្នុងមូលដ្ឋាននោះគឺល្អ។ ដើម្បីងាយស្រួលក្នុងការសម្រួលការងារជូនប្រជាពលរដ្ឋ ព្រោះពួកគាត់មានផ្ទះនៅទីនោះស្រាប់។

សម្តេចបានបន្ថែមទៀតថា កាលណាដែលយកមន្ត្រីពីរាជធានីភ្នំពេញ ឬបណ្តាខេត្តផ្សេងនៅថ្ងៃសៅរ៍-អាទិត្យ ឬថ្ងៃបុណ្យឈប់សម្រាក គឺពួកគាត់អត់បានប្រចាំការនៅខេត្តទេ ព្រោះពួកគាត់ជាប់រវល់ទៅលេងប្រពន្ធកូន។

ការលើកឡើងរបស់សម្តេចខាងលើនេះ គឺដើម្បីឲ្យមន្រ្តីមានការយកចិត្តទុកដាក់ជាមួយប្រជាពលរដ្ឋ ក្នុងនាមជាមន្ត្រីបម្រើការងារជូនប្រជាជន៕