ឯកឧត្តម ហ៊ុន ម៉ានិត៖ ការធ្វើទំនើបកម្មកងទ័ព គឺដើម្បីពង្រឹងខឿនការពារជាតិកម្ពុជា

«គោលបំណងនៃការធ្វើទំនើបកម្មកងទ័ព គឺដើម្បីពង្រឹងពង្រីកសមត្ថភាពកងទ័ព និងខឿនការពារជាតិកម្ពុជាឲ្យកាន់តែរឹង មាំថែមទៀត»។ នេះ គឺជាការអះអាងរបស់ឯកឧត្តម ឧត្តមសេនីយ៍ឯក ហ៊ុន ម៉ានិត មេបញ្ជាការរងកងទ័ពជើងគោក ក្នុងឱកាសឯកឧត្តមចុះសួរសុខទុក្ខកងកម្លាំងឈរជើងនៅមូលដ្ឋានកងទ័ពជើងទឹករាម ខេត្តព្រះសីហនុ។

ការអះអាងបែបនេះរបស់ឯកឧត្តម ឧត្តមសេនីយ៍ឯក ហ៊ុន ម៉ានិត គឺខណៈពេលកន្លងមក ក៏ដូចជាបច្ចុប្បន្ននេះ មូលដ្ឋានសមុទ្ររាមរបស់កម្ពុជាបានរងការវាយប្រហារ និងចោទប្រកាន់ពីមជ្ឈដ្ឋានបរទេស និងក្រុមប្រឆាំងមួយចំនួនដែលតែងតែព្យាយាមចោទប្រកាន់មកលើរាជរដ្ឋាភិបាលកម្ពុជា ថាបានអនុញ្ញាតឲ្យមានមូលដ្ឋានកងទ័ពចិននៅកម្ពុជា។

ទាក់ទងនឹងចោទប្រកាន់នេះ ឯកឧត្តម ឧត្តមសេនីយ៍ឯក ហ៊ុន ម៉ានិត បានលើកឡើងថា សម្តេចតេជោ ហ៊ុន សែន និងសម្តេចពិជ័យសេនា ទៀ បាញ់ ក៏ដូចជាលោក ប្រាក់ សុខុន រដ្ឋមន្ត្រីក្រសួងការបរទេស បានបកស្រាយ និងពន្យល់ជាច្រើនដងរួចមកហើយ អំពីហេតុផល និងគោលបំណងរបស់កម្ពុជាលើបញ្ហានេះ។

បើតាមសំណេរនៅលើបណ្ដាញសង្គមហ្វេសប៊ុក កាលពីថ្ងៃទី១៧ ខែឧសភា មេបញ្ជាការរងកងទ័ពជើងគោករូបនេះ បានបញ្ជាក់យ៉ាងដូច្នេះថា៖ «គោលបំណងរបស់កម្ពុជា គឺការធ្វើទំនើបកម្មកងទ័ព មិនថាជើងទឹក ជើងអាកាស ឬជើងគោក គឺដើម្បីពង្រឹងសមត្ថភាពកងទ័ព និងធានាខឿនការពារជាតិកម្ពុជា ការពារសន្តិសុខទាំងក្នុងប្រទេស និងតំបន់»។ ឯកឧត្តម បន្ថែមថា រាជរដ្ឋាភិបាលគ្មានគោលបំណងអ្វីផ្សេង ដូចការចោទប្រកាន់នេះឡើយ។

ទន្ទឹមនេះ ឯកឧត្តម ហ៊ុន ម៉ានិត បានសង្កត់ធ្ងន់ថា រាជរដ្ឋាភិបាលកម្ពុជា បានកំពុងធ្វើការកំណែទម្រង់ស៊ីជម្រៅលើគ្រប់វិស័យ ដើម្បីធានាដល់ផលប្រយោជន៍ជាតិ និងប្រជាជន ជាពិសេស ការធ្វើទំនើបកម្មកងទ័ពនេះទៀតសោត គឺស្របតាមគោលនយោបាយការពារជាតិរបស់កម្ពុជា៕