សម្ដេចតេជោ ហ៊ុន សែន រំលឹកឱ្យក្រុមហ៊ុនអ៊ីនធឺណិតដោះស្រាយបញ្ហាល្បឿនដើរយឺត

សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានថ្លែងដាស់តឿនឱ្យក្រុមហ៊ុនអ៊ីនធឺណិត​មួយចំនួន​ដោះ​ស្រាយបញ្ហាអ៊ីនធឺណិតដើរយឺត ខណៈបុគ្គលិកក្រុមហ៊ុនមួយចំនួន​មិនចុះដោះ​ស្រាយ​ឱ្យអតិថិជន។

​សម្តេចតេជោ ហ៊ុន សែន មានប្រសាសន៍នៅក្នុងពិធីសម្ពោធទីតាំងថ្មីសាកលវិទ្យាល័យ​ភូមិន្ទវិចិត្រសិល្បៈ ព្រម​ទាំងចែកសញ្ញាបត្រដល់និស្សិត នៅព្រឹកថ្ងៃទី ២៤ ខែឧសភា ឆ្នាំ ២០២៣ ថា អ៊ិនធឺណិតនៅក្នុងប្រទេសកម្ពុជា មានការរអាក់រអួលសេវាអ៊ិនធឺណិតខ្សោយ ហើយមាន​ក្រុមហ៊ុនខ្លះ​មិនដោះស្រាយបញ្ហា។

សម្ដេចតេជោ ហ៊ុន សែន មានប្រសាសន៍ថា៖ «ក្រុមហ៊ុន ដែលអន់ជាងគេនៅស្រុកខ្មែរ គឺក្រុមហ៊ុន ហូមអ៊ិនធឺណិត អាហ្នឹងម៉ែអន់ ឪអនហើយ ឥឡូវក្រសួងប្រៃសណី​ចុះពិនិត្យសិក្សា ជាមួយម្ចាស់​ក្រុមហ៊ុន ហ្នឹងឱ្យបុគ្គលិកធ្វើការ»។

សម្ដេចតេជោលើកឡើងបែបនេះ បន្ទាប់ពីសម្ដេចបានទាក់ទងទៅបុគ្គលិកក្រុមហ៊ុននេះឱ្យចុះ​ដោះស្រាយបញ្ហាអិនធឺណិតដើរយឺត ប៉ុន្តែបុគ្គលិកក្រុមហ៊ុន​នេះនៅតែមិនចុះដោះស្រាយ។

សម្ដេចតេជោជំរុញឱ្យម្ចាស់បុរី និងក្រុមហ៊ុនអ៊ីនធឺណិត ត្រូវយកវិធានការដែលបានដាក់ចេញដោយក្រសួងប្រៃសណីយ៍ និងទូរគមនាគម និងបើកឱ្យមានការដំឡើងអង់តែនសេវាអ៊ីនធឺណិតបន្ថែមគ្រាប់ទីតាំងបើកឱកាសឱ្យក្រុមហ៊ុនចូល ដោយកុំដាក់ឧបសគ្គបច្ចេកទេសជារនាំង៕