លក្ខខណ្ឌ ៣ ចំណុច នឹង​សម្រេច​កម្ពុជាចាកចេញ​ពីចំណាត់ក្រុមប្រទេសអភិវឌ្ឍន៍តិចតួច

នៅឆ្នាំ ២០២៤ ខាងមុខនេះ គណៈកម្មាធិការគោលនយោបាយអភិវឌ្ឍន៍អង្គការសហប្រជាជាតិនឹងពិនិត្យទៅលើលក្ខណៈ​​​​វិនិច្ឆ័យ​ទាំង ៣ របស់កម្ពុជាជាលើកទីពីរម្តងទៀត ដើម្បីសម្រេចថាតើត្រូវស្នើបេក្ខភាពកម្ពុជាសម្រាប់ចាកចេញពីចំណាត់​ក្រុមប្រទេសអភិវឌ្ឍន៍តិចតួចដែរឬទេ។

ថ្លែងក្នុងសិក្ខាសាលាស្តីពីការផ្ទៀងផ្ទាត់របាយការណ៍ អំពីស្ថានភាពនៃភាព​ងាយរងគ្រោះរបស់កម្ពុជា និងការសិក្សា​ពី​ផលប៉ះពាល់នៃការថយចុះផ្នែកឧស្សាហកម្មវាយនភ័ណ្ឌលើការងាររបស់ស្រ្តីនៅសណ្ឋាគារកាំបូឌីយ៉ាណាកាលពីថ្ងៃទី ៣០ ឧសភា លោក រិន វីរៈ រដ្ឋលេខាធិការប្រចាំការក្រសួងផែនការបានមានប្រសាសន៍ថា កាលពីឆ្នាំ២០២១ កម្ពុជា​បាន​បំពេញ​​លក្ខណៈវិនិច្ឆ័យទាំង ៣ ជាលើកទីមួយ ដើម្បីត្រៀមខ្លួនចាកចេញពីចំណាត់ក្រុមប្រទេសអភិវឌ្ឍន៍តិចតួច។​លក្ខណៈ​វិនិច្ឆ័យទាំង ៣ នោះ រួមមាន៖

១. ប្រាក់ចំណូលជាតិសរុបសម្រាប់មនុស្សម្នាក់ (Gross National Income, GNI, per capita) ត្រូវធំជាង ១.២២២​ ដុល្លារ។ កម្ពុជាមានប្រាក់ចំណូលជាតិសរុបសម្រាប់មនុស្សម្នាក់ស្មើ ១.៣៧៧ ដុល្លារនៅឆ្នាំ ២០២១។

២. សន្ទស្សន៍ធនធានមនុស្ស (Human Assets Index, HAI) ត្រូវមានតម្លៃស្មើឬធំជាង ៦៦។ កម្ពុជាទទួលបានពិន្ទុ ៧៤,៣ នៅឆ្នាំ២០២១

៣. សន្ទស្សន៍ភាពងាយរងគ្រោះសេដ្ឋកិច្ចនិងបរិស្ថាន (Economic and Environmental Vulnerability Index, EVI) ត្រូវមានតម្លៃស្មើឬតូចជាង ៣២។ កម្ពុជាទទួលបានពិន្ទុ ៣០,៦ នៅឆ្នាំ២០២១។

លោករដ្ឋលេខាធិការប្រចាំការបានបន្តថា នៅឆ្នាំ ២០២៤ ខាងមុខ គណៈកម្មាធិការគោលនយោបាយអភិវឌ្ឍន៍អង្គការ​សហប្រជាជាតិ​នឹងពិនិត្យទៅលើលក្ខណៈវិនិច្ឆ័យទាំង ៣ របស់កម្ពុជាជាលើកទីពីរម្តងទៀត ដើម្បីសម្រេចថាតើត្រូវស្នើបេក្ខភាព​កម្ពុជាសម្រាប់ចាកចេញពីចំណាត់ក្រុមប្រទេសអភិវឌ្ឍន៍តិចតួចដែរឬទេ។ ក្នុងករណីដែលប្រទេសកម្ពុជាទទួលបាន​ជោគជ័យ​នៅក្នុងការវាយតម្លៃលើកទីពីរនេះ ប្រទេសកម្ពុជានឹងមានពេលបីឆ្នាំសម្រាប់ត្រៀមខ្លួនចាកចេញពីចំណាត់ក្រុមប្រទេសអភិវឌ្ឍន៍តិចតួច។

លោករដ្ឋលេខាធិការប្រចាំការបានបន្ថែមថា ក្នុងន័យនេះដើម្បីទទួលបាននូវការឯកភាពមួយអំពីរបាយការណ៍ស្តីពីភាពងាយរងគ្រោះរបស់កម្ពុជា ដែលឆ្លុះបញ្ចាំងតថភាពនៃប្រទេសកម្ពុជា និងដើម្បីឱ្យរបាយការណ៍ក្លាយជាមគ្គុទេសន៍សម្រាប់ការរៀបចំយុទ្ធសាស្ត្រអន្តរកាលដោយរលូន លោកបានស្នើដល់អង្គសិក្ខាសាលាទាំងមូល ជាពិសេសលោក លោកស្រី ដែលជាមន្ត្រីជំនាញគ្រប់ក្រសួងស្ថាប័នពាក់ព័ន្ធចូលរួមឱ្យសកម្ម ក៏ដូចជាស្វែងយល់ឱ្យបានច្បាស់និងពិភាក្សា​ឱ្យ​បាន​ក្បោះក្បាយអំពីទិដ្ឋភាពរួម និងចំណុចនីមួយៗនៃរបាយការណ៍ ដោយឆ្លុះបញ្ចាំងទៅលើបរិបទពិតរបស់ប្រទេស​កម្ពុជា​៕

អត្ថបទ៖ សំអឿន