ចុះ​អង្កេត​វាយ​តម្លៃ​ក្រុងស្រុក​គោលដៅចំនួន ៦ ក្នុង​ខេត្ត​បាត់ដំបង ប៉ះពាល់​ពីកូវីដ

រយះពេល​ ២ ថ្ងៃចាប់ពីថ្ងៃទី ២៩ ដល់ថ្ងៃទី ៣០ ខែមិថុនា ខេត្តបាត់ដំបងបានបើកសិក្ខាសាលាគោលបំណងដើម្បីជំរុញការតាមដាននិងវាយតម្លៃផល​ប៉ះពាល់របស់វិស័យទេសចរណ៍ សំដៅគាំទ្រនិងជំរុញការអនុវត្តផែនការសកម្មភាពនៃផែនទីចង្អុលបង្ហាញផ្លូវ ស្តីពីផែនការស្តារនិងលើកស្ទួយវិស័យទេសចរណ៍កម្ពុជាក្នុងនិងក្រោយវិបត្តិជំងឺ​កូវិដ-១៩។

លោក កើត ពុទ្ធចឌី អនុរដ្ឋលេខាធិការក្រសួងទេសចរណ៍បានលើកឡើងថា បម្រែបម្រួលនិន្នាការទេសចរណ៍ ពិភពលោក តម្រូវឱ្យមានការសិក្សាអង្កេតនិងចងក្រងឯកសារតាមដានផលប៉ះពាល់នានាជាប្រចាំ។

លោកបន្តថា ជំហានដំបូងបន្ទាប់ពីបើកសិក្ខាសាលាក្នុងទឹកដីខេត្តបាត់ដំបងរយះពេល ២ ថ្ងៃ ក្រុមការងារបានធ្វើការស្រាវជ្រាវនិងអង្កេតលើស្រុកក្រុងចំនួន ០៦ ជាគោលដៅក្នុងនោះមាន÷ ១-ក្រុងបាត់ដំបង, ២-ស្រុកឯកភ្នំ, ៣-ស្រុកបាណន់, ៤-ស្រុកសង្កែ, ៥-ស្រុករតនមណ្ឌ, ៦-ស្រុកសំឡូត។

ការអង្កេតនិងស្រាវជ្រាវលើគោលដៅទាំង ០៦ ស្រុក ត្រូវបានយកមកធ្វើជាបទបង្ហាញលើ ១១ ចំណុចរួមមាន​÷​

១-តម្លៃទំនិញនិងសេវាកម្មក្នុងតំបន់មានការកើនឡើងធ្វើឱ្យប៉ះពាល់ជីវភាពរស់នៅប្រចាំថ្ងៃ។
២-ធ្វើឱ្យតម្លៃអចលនទ្រព្យ​(ដីផ្ទះ.ហាង.អគារ.ជាដើម) ក្នុងតំបន់មានការកើនឡើងខ្ពស់។
៣-ការវិយោគរបស់ជនបរទេសក្នុងអាជីវកម្មទេសចរណ៍មិន​បានផ្ដល់ឱកាសការងារច្រើនដល់ប្រជាជនក្នុងសហគមន៍។ ៤-ការចំណាយរបស់ទេសចរមិន​បាន​ផ្តល់ផលប្រយោជន៍​ទាំងស្រុងដល់ប្រជាជននិងសហគមន៍របស់អ្នក។
៥-វិស័យទេសចរណ៍បានជំរុញឱ្យមានការកើនឡើងនូវលំហូរវប្បធម៌បរទេស​មកក្នុងតំបន់។
៦-កំណើនទេសចរធ្វើឱ្យមានការកើនឡើងនូវអំពើអសន្តិសុខ។
៧-កំណើនទេសចរធ្វើឱ្យមានការកើនឡើងនូវការជួញដូរផ្លូវភេទនិងកុមារ។
៨-កំណើនទេសចរធ្វើឱ្យមានការកកស្ទះពិបាកធ្វើ ដំណើរក្នុងតំបន់របស់អ្នក។
៩-កំណើនទេសចរធ្វើឱ្យមានការបំពុលបរិស្ថាន(កើនឡើងកាកសំណល់រឹង.រាវ)។
១០-កំណើនទេ សចរធ្វើឱ្យបាត់សោភ័ណ្ឌភាពនិងខូចទ្រង់ទ្រាយដើម (ការកើនឡើងនូវសំណង់អាគារខ្ពស់ៗ)។
១១-កំណើនទេសចរធ្វើឱ្យមា នសំណឹក(ប្រាង្គប្រាសាទនានា)។

ក្នុងបទបង្ហាញនៃផលប៉ះពាល់ ក្រសួងបានសំណូមពរជំរុញការ​ធ្វើពិពិធកម្មផលិតផលទេសចរណ៍ឱ្យកាន់តែសម្បូរបែប និង​បង្កើតព្រឹត្តិការណ៍ទេសចរណ៍ (វប្បធម៌ប្រពៃណីទំនៀមទម្លាប់ កីឡា សាសនា។ ពង្រឹងការគ្រប់គ្រងសំរាមកាក​សំណល​រឹងរាវ និងរៀបចំសណ្តាប់ធ្នាប់ឱ្យបានប្រសើរជាងពេលមុន។ ត្រូវជំរុញដល់ការផ្សព្វផ្សាយនិងគាំទ្រផលិតផលរបស់សហគមន៍និងប្រជាជនក្នុងតំបន់ ដើម្បីបង្កើនកម្រិតជីវភាពរបស់ប្រជាជនក្នុងខេត្តបន្ថែម។ ពង្រឹងគុណភាពនិងសមត្ថភាពបុគ្គលិកបម្រើសេវាកម្មទេសចរណ៍។ បង្កើនការផ្គត់ផ្គង់អគ្គិសនីឱ្យបានគ្រប់គ្រាន់និងប្រសើរជាងមុន។ ពង្រឹងការថែទាំនិងជួសជុលផ្លូវគមនាគមន៍ទៅកាន់តំបន់ទេសចរណ៍ឱ្យកាន់តែល្អប្រសើរបន្ថែមទៀត។

ខេត្តបាត់ដំបងគឺជាខេត្តដែលមានទឹកដីធំលំដាប់ទី៥ (១១,៧៤៨គីឡូម៉ែត្រការ៉េស្ថិតនៅទិសពាយ័ព្យនៃព្រះរាជណាចក្រកម្ពុជា ចំងាយ ២៩១ គ.ម ពីរាជធានីភ្នំពេញ។ មានព្រំប្រទល់៖-ខាងជើង៖ ខេត្តបន្ទាយមានជ័យ,-ខាងលិច៖ ខេត្តប៉ៃលិននិងប្រទេសថៃ (ខេត្តច័ន្ទបុរី.ត្រាតនិងស្រៈកែវ,ខាងកើត៖ខេត្តសៀមរាបនិងបឹងទន្លេរសាប,ខាងត្បូង៖ខេត្តពោធិ៍សាត់។

សណ្ឋានដីបែងចែកជា ៣តំបន់៖ តំបន់ខ្ពស់, តំបន់វាលរាប, និងតំបន់ទំនាបជាប់បឹងទន្លេសាប និងមានច្រកព្រំដែនចំនួន ៥ ក្នុងនោះច្រកព្រំដែនអន្តរជាតិមានចំនួន ០២។

ខេត្តបាត់ដំបងជាខេត្តមួយដែលមានសក្តានុពលទាក់ទាញភ្ញៀវទេសចរដូចជាប្រាង្គ ប្រាសាទបុរាណ ផ្ទះខ្មែរបុរាណ អគារស្ថាបត្យកម្មកម្រ ប្រវត្តិសាស្ត្រសម័យ លោកម្ចាស់ និងអាណានិគម ហើយក្រៅពីនេះនៅមានប្រាសាទបុរាណ.​ដងស្ទឹង.​ភ្នំ.ព្រៃព្រឹក្សា.បឹងបួរ.ទន្លេ.សត្វចតុបាទ.សត្វគ្រប់ប្រភេទបង្ករលក្ខណៈជារមណីយដ្ឋានទេសចរណ៍​វប្បធម៌.​ប្រវត្តិសាស្ត្រ.​ធម្មជាតិ​ជាសក្តានុពលបម្រើឲ្យវិស័យទេសចរណ៍សម្រាប់ភ្ញៀវទេសចរជាតិ និងអន្តរជាតិមកទស្សនាកម្សាន្ត​ស្រាវជ្រាវនិងសម្រាកលំហែកាយដែលមានកំណើនកើនឡើងពីមួយឆ្នាំទៅមួយឆ្នាំរួមចំណែកដល់ការកាត់បន្ថយភាពក្រីក្រផងដែរ។ក្នុងនោះមាន÷រមណីយដ្ឋានទេសចរណ៍មាន២២ទីតាំង,សហគមន៍និងអេកូទេសចណ៍ មាន០៤ទីតាំង,សារមន្ទីរមាន​០២​ទីតាំង,គោលដៅទេសចរណ៍មាន៥៤ទីតាំង,ទេសចរណ៍សាសនាមាន២៩ទីតាំង,កសិទេសចរណ៍មាន០៤ទីតាំង សរុបគោលដៅមាន ១១៥ទីតាំង៕

អត្ថបទ៖ សៅ សារិទ្ធ