ក្លិបអ្នកកាសែតកម្ពុជា នឹងលុបឈ្មោះបុរសដើរទារលុយចេញពីសមាជិកភ្លាម បើតុលាការរកឃើញមានបទល្មើស

ក្លិបអ្នកកាសែតកម្ពុជា (ក.អ.ក) បានលើកឡើងថា ខ្លួននឹងលុបឈ្មោះបុរសអ្នកកាសែតម្នាក់ដែលតែងតែក្លែងបន្លំ និងយកកាតការងារអ្នកកាសែតស្ថាប័នផ្សេងៗ ទៅទារប្រាក់ពីថ្នាក់ដឹកនាំក្នុងស្ថានប័នរដ្ឋនានា ប្រសិនបើតុលាការរកឃើញភស្តុតាងបទល្មើសប្រាកដមែន ក.អ.ក នឹងលុបឈ្មោះបុគ្គលនោះចេញពីសមាជិកភ្លាមៗ យោងតាមលក្ខន្តិកៈរបស់ ក.អ.ក។

នេះ គឺជាសេចក្តីប្រកាសរបស់ ក.អ.ក ធ្វើឡើងយប់ថ្ងៃទី១៩ ខែកក្កដា ឆ្នាំ២០២៣ នេះ បន្ទាប់ពីសមត្ថកិច្ចចាប់ខ្លួនបានបុរសម្នាក់ ដែលតែងតែដើរបន្លំខ្លួនជាបុគ្គលិករបស់អគ្គនាយកដ្ឋានវិទ្យុ និងទូរទស្សន៍បាយ័ន និងស្ថាប័នព័ត៌មានផ្សេងទៀត ទៅទារប្រាក់ពីថ្នាក់ដឹកនាំក្នុងស្ថាប័នរដ្ឋជាច្រើន ដែលខុសទាំងស្រុងពីក្រមសីលធម៌អ្នកកាសែត។ យោងតាម លក្ខន្តិកៈរបស់ ក.អ.ក ប្រសិនបើតុលាការរកឃើញភស្តុតាងបទល្មើសពិតប្រាកដមែន ក.អ.ក នឹងលុបឈ្មោះ មូល រតនៈ ចេញពីសមាជិកភ្លាមៗតែម្តង។

ក.អ.ក បានបញ្ជាក់ថា បុគ្គលខាងលើមានឈ្មោះ មូល រតនៈ ភេទប្រុស អាយុ ៣០ឆ្នាំ មុខរបរជា និពន្ធនាយកកាសែតសេនាបតីញូស៍ និងជាសមាជិករបស់ក្លិបអ្នកកាសែតកម្ពុជាផងដែរ។ ប៉ុន្តែ បុគ្គលរូបនេះ ត្រូវបានព្យួររួចមកហើយ។ ទាក់ទិននឹងករណីនេះ ក.អ.ក បង្ហាញពីការសោកស្តាយ និងភ្ញាក់ផ្អើលជាខ្លាំង បន្ទាប់ពីបុរស មូល រតនៈ បានប្រព្រឹត្តបទល្មើសធ្ងន់ធ្ងរបែបនេះ។ ក្លិបអ្នកកាសែតកម្ពុជា តែងតែណែនាំ និងក្រើនរម្លឹកដល់សមាជិក សមាជិកា ចំនួនជាង ៦០០នាក់របស់ខ្លួនជានិច្ច ឱ្យគោរព និងប្រកាន់ខ្ជាប់តាមក្រមសីលធម៌ និងវិជ្ជាជីវៈអ្នកសារព័ត៌មាន រួមទាំងលក្ខន្តិកៈ និងបទបញ្ជាផ្ទៃក្នុង។

ការក្រើនរម្លឹកនេះ ក៏តែងតែធ្វើឡើងដោយផ្ទាល់ តាមរយៈការបណ្តុះបណ្តាល ការប្រជុំ និងការផ្សព្វផ្សាយជាដើម។ ចំណែក ករណីដែល លោក មូល រតនៈ ត្រូវបានសមត្ថកិច្ចឃាត់ខ្លួនពីបទព្រហ្មទណ្ឌ និងបទល្មើសធ្ងន់ធ្ងរ អាចចាត់ទុកជាករណីទី១។ ក.អ.ក ក៏សូមគាំទ្ររាល់ចំណាត់ការរបស់សមត្ថកិច្ច ចំពោះអ្នកសារព័ត៌មាន ជាពិសេសសមាជិក ក.អ.ក ដែលត្រូវរកឃើញថា ប្រព្រឹត្តខុសពីវិជ្ជាជីវៈ និងច្បាប់របស់ខ្លួន។

មិនតែប៉ុណ្ណោះ ក.អ.ក ក៏បានអំពាវនាវសលើសមាជិក សមាជិកាទាំងអស់ ត្រូវបន្តអនុវត្តនូវក្រមសីលធម៌ និងវិជ្ជាជីវៈអ្នកសារព័ត៌មានឱ្យបានខ្ជួបខ្ជួន ដើម្បីលើកកម្ពស់ដល់ភាពថ្លៃស្នូរ និងសេរីភាពសារព័ត៌មានបន្ថែមទៀត។ ក.អ.ក ក៏សង្ឃឹម សមាជិកទាំងអស់នៅតែបន្តថែរក្សានូវកិត្តិយស សេចក្តីថ្លៃថ្នូររបស់អ្នកសារព័ត៌មានផងដែរ។

គួររម្លឹកថា អ្នកកាសែតឈ្មោះ មូល រតនៈ ត្រូវបាននាយកដ្ឋាន​ប្រឆាំង​បទ​ល្មើស​បច្ចេកវិទ្យា​បាន​ចុះ​អនុវត្ត​ដីកា​ដោយ​ឃាត់​ខ្លួន​ នៅថ្ងៃទី១៨ ខែកក្កដា ឆ្នាំ២០២៣ ពីបទក្លែងអត្ត​សញ្ញាណជា​បុគ្គលិក​ស្ថានីយ៍​ទូរទស្សន៍​បាយ័ន ដើម្បីសុំ និងជម្រិតទារប្រាក់ពីថ្នាក់ដឹកនាំតាមអង្គភាពស្ថាប័នរដ្ឋនានា។ បុគ្គលរូបនេះ តែងតែបន្លំខ្លួនយកកាតការងារអ្នកកាសែតផ្សេងៗផ្ញើតាម Telegram និង WhatsApp ទៅថ្នាក់ដឹកនាំផ្សេងៗ ដើម្បី​សុំ​ប្រាក់ ដោយសំអាងថា ​ចុះបេសកកម្ម និងគំរាមកំហែង ថានឹងចុះព័ត៌មានអំពីអំពើអសកម្មនានាថែមទៀតផង៕