ជាង ១៨ ខែនេះ មន្រ្តី​ជំនាញ​ស្រង់​គ្រាប់យុទ្ធភណ្ឌ​ទម្ងន់​ជាង ២០០ តោន ចេញពីបាតទន្លេ​នៅ​ខេត្តព្រៃវែង

គ្រាប់យុទ្ធភណ្ឌមិនទាន់ផ្ទុះប្រមាណជាង ១ម៉ឺន២ពាន់គ្រាប់ ដែលមានទម្ងន់ជាង ២០០ តោនស្ថិតនៅក្នុងភូមិសាស្ត្រស្រុក​​ពាមជរ ខេត្តព្រៃវែងត្រូវបានក្រុមប្រតិបត្តិការសម្អាតគ្រាប់យុទ្ធភណ្ឌមិនទាន់ផ្ទុះ និងស្រង់នាវាលិចក្នុងទន្លេស្រង់ចេញពីបាតទន្លេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលោក ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឈមណ្ឌលសកម្មភាពកម្ចាត់មីនកម្ពុជា (CMAC) បានឱ្យដឹងថា ប្រតិបត្តិការសម្អាតគ្រាប់យុទ្ធភណ្ឌមិនទាន់ផ្ទុះ និងស្រង់នាវាលិចក្នុងទន្លេក្នុងភូមិសាស្ត្រស្រុកពាមជរ ខេត្តព្រៃវែង ត្រូវបានធ្វើឡើងនៅដើមឆ្នាំ២០២២ មានរយៈពេល ១៨ ខែហើយ។

គិតត្រឹមឆមាសទី១ ឆ្នាំ ២០២៣ បានស្រង់គ្រាប់យុទ្ធភណ្ឌមិនទាន់ផ្ទុះចេញពីបាតទន្លេជាង ១ ម៉ឺន ២ ពាន់គ្រាប់ដែលមានទម្ងន់មានជាង ២០០ តោន និងស្រង់បំណែកនាវាបានជាច្រើនទៀតផងដែរ ។

លោកបានឱ្យដឹងទៀតថា តាមផែនការស្រាវជ្រាវដំបូង ​បានរាវរកទិន្នន័យនៅបាតទន្លេជាង ២៥០០ ចំណុច ​មានគ្រាប់យុទ្ធភណ្ឌមិនទាន់ផ្ទុះ ហើយវាយតម្លៃការបោសម្អាត​មានរយៈពេល ១៨ ខែ តែការអនុវត្តជាក់ស្តែងមិនសម្រេចតាមផែនការនោះទេ ​ដោយសារមូលហេតុមួយចំនួនហួសសមត្ថភាព ដែលបានវាយតម្លៃ ព្រោះថានាវាដែលលិចក្នុងទន្លេនេះ មានផ្ទុកគ្រាប់យុទ្ធភណ្ឌមិនទាន់ផ្ទុះ ប្រមាណជា ៣ ពាន់ តោន ទៅ ៣ពាន់៥រយតោន។

លោកអគ្គនាយកស៊ីម៉ាក់បានបញ្ជាក់ថា ការបោសសម្អាតយុទ្ធភណ្ឌមិនទាន់ផ្ទុះ ​និងស្រង់នាវាលិចក្នុងទន្លេនៅការដ្ឋាន​កោះពាមរាំង​ ត្រូវបានក្រុមជំនាញនៃក្រុមការងារអន្តរក្រសួង​កំណត់នូវទំហំប្រមាណជិត​ ៣០០ ហិកតា ដែលចែក​ចេញជាបីផ្នែក រួមមាន៖ ទី១. តំបន់ដីគោក ទី២. តំបន់មានហានិភ័យទាប និងទី៣. ជាតំបន់មានហានិភ័យខ្ពស់។

សម្ដេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃធ្លាប់បានគូសបញ្ជាក់ថា រាជរដ្ឋាភិបាលបានដាក់គោលដៅបោសសម្អាតគ្រាប់យុទ្ធភណ្ឌក្រោមទឹកដែលបន្សល់ពីសម័យសង្គ្រាមឱ្យអស់ដើម្បីសុវត្ថិភាពប្រជាពលរដ្ឋ និងសម្រួលដល់ដំណើរនាវាចរណ៍រួមទាំងការងារផ្សេងៗទៀតពាក់ព័ន្ធនឹងទន្លេ៕

អត្ថបទ៖ សំអឿន