សម្ដេចតេជោ ហ៊ុន សែន ៖ អត្រាគាំទ្រគណបក្សប្រជាជនកម្ពុជា កើនឡើងរហូតដល់ ៨២.៣០ភាគរយ ដែលបានបំបែកឯតទគ្គកម្ម

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានបញ្ជាក់ថា ការបោះឆ្នោតជ្រើសតាំង តំណាងរាស្រ្ដ នីតិកាលទី ៧ ឆ្នាំ ២០២៣នេះ គឺគណបក្សប្រជាជនកម្ពុជា ទទួលបានសំឡេងគាំទ្ររហូតដល់ ៨២.៣០ភាគរយ ដែលបំបែកឯតទគ្គកម្មសម្រាប់ការបោះឆ្នោតនាពេលកន្លងមក។ ការបញ្ជាក់របស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ផ្លូវក្រវាត់ក្រុងទី ៣ នាព្រឹកថ្ងៃទី ៣ ខែសីហា ឆ្នាំ ២០២៣នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងឱកាសនេះ សម្ដេចតេជោ ហ៊ុន សែន បាន​ថ្លែងអំណរគុណដល់ប្រជាពលរដ្ឋខ្មែរ ដែលបានបោះឆ្នោតជូនគណបក្សប្រជាជនកម្ពុជា ឲ្យទទួលបានជ័យជំនះយ៉ាងភ្លុកទឹកភ្លុកដី ដែលនាំឲ្យអត្រាគាំទ្រគណបក្សប្រជាជនកម្ពុជា មានរហូតដល់ ៨២.៣០ភាគរយ ដែលបំបែកឯតទគ្គកម្មក្នុងរយៈពេលកន្លងទៅ។

សម្ដេចតេជោ ហ៊ុន សែន បានឲ្យដឹងថា ការបោះឆ្នោតថ្នាក់ជាតិឆ្នាំ ២០១៨ គណបក្សប្រជាជនកម្ពុជា ទទួលបានសំឡេងគាំទ្រត្រឹមតែ ៧៦.៨៥ប៉ុណ្ណោះ។ ចំណែកឆ្នាំ ២០២២ នៅក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ គណបក្សប្រជាជនកម្ពុជា ទទួលបានសំឡេងគាំទ្រត្រឹមតែ ៧៤.៣២ប៉ុណ្ណោះ។

ប៉ុន្តែការបោះឆ្នោតថ្នាក់ជាតិនៅឆ្នាំ ២០២៣នេះ គឺគណបក្សប្រជាជនកម្ពុជា ទទួលបានសំឡេងគាំទ្រកើនឡើងរហូតដល់ ៨២.៣០ភាគរយ ដោយមានកំណើនសំឡេងឆ្នោតរហូតដល់ជាង ១លានសំឡេង៕