សម្ដេចតេជោ ហ៊ុន សែន ៖ បើបក្សប្រឆាំងវិភាគដូចសព្វថ្ងៃ ពួកគេមិនអាចយកឈ្នះបក្សប្រជាជនកម្ពុជា ឡើយ

សម្ដេចតេជោ ហ៊ុន សែន ប្រធានគណបក្សប្រជាជនកម្ពុជា បានលើកឡើងថា ប្រសិនបើក្រុមគណបក្សប្រឆាំង និងអ្នកវិភាគមួយចំនួន នៅតែវិភាគដូចសព្វថ្ងៃនេះ ពួកគេមិនអាចយកឈ្នះគណបក្សប្រជាជនកម្ពុជា នោះឡើយ។ ការលើកឡើងរបស់សម្ដេចតេជោ ហ៊ុន សែន បានធ្វើឡើងក្នុងពិធីសម្ពោធដាក់ឲ្យប្រើប្រាស់ផ្លូវក្រវាត់ក្រុងទី ៣ នាព្រឹកថ្ងៃទី ៣ ខែសីហា ឆ្នាំ ២០២៣នេះ។

សម្ដេចតេជោ ហ៊ុន សែន បានផ្ដាំផ្ញើដល់ក្រុមគណបក្សប្រឆាំង និងអ្នកវិភាគមួយចំនួនថា ប្រសិនបើពួកគេនៅតែវិភាគដូចសព្វថ្ងៃនេះ ពួកគេមិនអាចយកឈ្នះគណបក្សប្រជាជនកម្ពុជា មិនថាជាតិនេះ ឬជាតិក្រោយនោះឡើយ។

សម្ដេចតេជោ ហ៊ុន សែន ថ្លែងបែបនេះថា «អស់លោកកំពុងតែថា ឥឡូវហ្នឹងជម្លោះផ្ទៃក្នុងកំពុងតែតានតឹងណាស់ នៅទីក្រុងភ្នំពេញ រវាង ស ខេង ជាមួយនឹង ហ៊ុន សែន អំពីការផ្ទេរអំណាច អស់លោកវាយតម្លៃខុសឆ្ងាយពេកហើយ គ្រាន់តែ ស ខេង ឬក៏ ស សុខា មិនធ្វើការឆ្លើយតបតែប៉ុណ្ណោះ»។

សម្ដេចតេជោ ហ៊ុន សែន បានបញ្ជាក់ថា គណបក្សប្រជាជនកម្ពុជា គ្មានទម្លាប់ទាស់គ្នានោះទេ៕