ឈប់ធ្វើការរោងចក្រមកលក់ទឹកកកឈូសបែបបុរាណបានចំណូលជាង ១០ម៉ឺនរៀល​​ក្នុងមួយថ្ងៃ​

មានដើមកំណើតនៅខេត្តព្រៃវែង លោក ឡី វាសនា បានចំណាយពេលជាងបីឆ្នាំ ដើម្បីបម្រើការងារនៅក្នុងវិស័យ​កាត់ដេរ នៅរាជធានីភ្នំពេញ។

ការងាររោងចក្រ មិនបានផ្តល់ឱកាសឱ្យលោក មានប្រាក់ចំណូលធូរធារសម្រាប់ចិញ្ចឹមជីវិត និងផ្គត់ផ្គង់គ្រួសារនោះទេ។ លើសពីនេះទៀត លោកបានសញ្ជឹងគិតថា ការធ្វើការងាររោងចក្រហាក់ពុំមានសេរីភាព និងការងារប្រចាំថ្ងៃដដែលៗ លោកក៏សម្រេចចិត្តឈប់ធ្វើការងារនេះ ដោយចាប់យករបរថ្មី លក់ទឹកកកឈូសបែបបុរាណតាម​រទេះសណ្តោងម៉ូតូ​វិញម្តង។ គិតមកដល់ពេលនេះ លោក វាសនា ចាប់យករបរលក់ទឹកកកឈូសនេះ បានប្រមាណជាង ២ឆ្នាំមកហើយ។

ជាយុវជនម្នាក់ដែលចូលចិត្តសេរីភាព វាសនា បានប្រាប់ឱ្យដឹងថា លោកចង់ធ្វើជាថៅកែខ្លួនឯង បើទោះជាមុខរបរនេះតូច និងមិនសូវមានតម្លៃ តែវាអាចកែច្នៃជីវិតពីធ្វើការងារឱ្យគេ មកធ្វើជាម្ចាស់នៃមុខរបរវិញ។

ជាការពិតណាស់ បើទោះបីជាមុខរបរលក់ទឹកកកឈូសតាមចិញ្ចើមថ្នល់នេះ មើលទៅមិនសូវមានការចាប់អារម្មណ៍​ច្រើនពីអ្នកដទៃ តែចំណូលដែលទទួលបានពីរបរនេះ ស្មើនឹងប្រាក់ខែធ្វើការនៅតាមក្រុមហ៊ុនមួយចំនួន ក្នុងម៉ាស៊ីន​ត្រជាក់ដែរ។

លោក ឡី វាសនា បានបញ្ជាក់ថា លោក អាចរកចំណូលបានពីរបរនេះ ចាប់ពី ៥ម៉ឺន ទៅជាង ១០ម៉ឺនរៀល ក្នុងមួយថ្ងៃ។ ចំពោះទឹកកកឈូស លោកថា ក្នុងមួយកែវ តម្លៃ ២ពាន់រៀល ដោយលាយជាមួយបង្អែមច្រើន​ប្រភេទទៅតាមចំណង់ចំណូលចិត្តរបស់អតិថិជន មានដូចជា សណ្តែកខៀវ ចាប់លៀង គ្រាប់ជី ដំណាប់កន្ទួត និងផ្សេងៗទៀត។

ទីតាំងដែលលោកលក់ជាប្រចាំ គឺនៅជុំវិញផ្សារអូឡាំពិច និងនៅក្បែរៗនេះផងដែរ។ លោក វាសនា មានអតិថិជនច្រើន មកទិញទឹកកកឈូសរបស់លោកជាបន្តបន្ទាប់។ ប៉ុន្តែរបរនេះ មានទីផ្សារទៅតាមរដូវកាលប៉ុណ្ណោះ។ ពោលគឺ រដូវវស្សា​មានភ្លៀងធ្លាក់ច្រើន លក់មិនសូវដាច់នោះទេ ប៉ុន្តែរដូវប្រាំងក្តៅខ្លាំង លក់ទឹកកកឈូសដាច់បានច្រើន និងចំណូលក៏ខ្ពស់​ទៅតាមនោះដែរ។ នេះជាការបន្ថែមរបស់លោក ឡី វាសនា៕