ព័ត៌មានជាតិ

មន្ត្រីជំនាញ ដកហូតទំនិញចម្រុះខូចគុណភាព ជិត ១៣០ គីឡូក្រាម ពីទីផ្សារ

បានផុស

១ year មុន

នៅ

ថ្ងៃពុធ ២០ កញ្ញា ២០២៣

ដោយ

មន្ត្រីជំនាញ ចុះអង្កេតត្រួតពិនិត្យទំនិញចម្រុះគ្រប់ប្រភេទដែលដាក់លក់នៅលើទីផ្សារ រកឃើញទំនិញចម្រុះហួសកាលបរិច្ឆេទប្រើប្រាស់ ខូចគុណភាព ជាពិសេសប្រហិតចម្រុះពុំអនុលោមតាមបទដ្ឋានបច្ចេកទេសក្នុងការវេចខ្ចប់ សរុបចំនួន ១២៧.៨៣ គីឡូក្រាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃទី ១៨-១៩ ខែកញ្ញា ឆ្នាំ ២០២៣ នេះ មន្ត្រីអធិការកិច្ចម្ហូបអាហារ ក.ប.ប. សាខាខេត្តតាកែវ កែប កំពង់ធំ សៀមរាប រតនគិរី បាត់ដំបង បានបន្តអនុវត្តភារកិច្ចរបស់ខ្លួនអនុលោមតាមច្បាប់ និងបទប្បញ្ញត្តិជាធរមាន ដោយចុះអង្កេត និងត្រួតពិនិត្យទំនិញចម្រុះគ្រប់ប្រភេទដាក់លក់នៅលើទីផ្សារ ក្នុងគោលបំណងបន្តគាំពារសុខុមាលភាព និងផលប្រយោជន៍ជូនប្រជាពលរដ្ឋ។

ជាមួយគ្នានេះ ជាលទ្ធផល មន្ត្រីជំនាញ បានត្រួតពិនិត្យការដាក់លក់ផលិតផលសម្រាប់ចិញ្ចឹមទារក និងកុមារ(ម្សៅទឹកដោះគោ) ឃើញថា អនុលោមតាមបញ្ញត្តិ នៃអនុក្រឹត្យលេខ ១៣៣ ស្ដីពីការផ្សព្វផ្សាយលក់ផលិតផលសម្រាប់ចិញ្ចឹមទារក និងកុមារ។

យ៉ាងណាមិញ មន្ត្រីជំនាញ ក៏បានរកឃើញទំនិញចម្រុះ រួមមាន ៖ ប៊ីចេង នំកូនក្មេង ចាហួយ សាប៊ូដុសខ្លួន ទឹកជ្រលក់ ហួសកាលបរិច្ឆេទប្រើប្រាស់ ខូចគុណភាព និងជាពិសេសប្រហិតចម្រុះពុំអនុលោមតាមបទដ្ឋានបច្ចេកទេសក្នុងការវេចខ្ចប់ សរុបចំនួន ១២៧.៨៣ គីឡូក្រាម ផងដែរ។

សូមបញ្ជាក់ថា ចំពោះទំនិញពុំមានអនុលោមភាពទាំងនោះ ត្រូវបានមន្ត្រីជំនាញ ដកហូត ដើម្បីបន្តនីតិវិធីនាពេលសមស្រប។ ក្នុងនោះ មន្ត្រីជំនាញ ក៏បានចែក បិទផ្ទាំងរូបភាពអប់រំផ្នែកម្ហូបអាហារ(Poster) អំពីរបៀបទុកដាក់ទំនិញ និងរបៀបមើលកាលបរិច្ឆេទប្រើប្រាស់ មុនទិញមក ឬ ដាក់លក់ផងដែរ៕

អត្ថបទ ៖ ពិសី