ព័ត៌មានជាតិ

ឯកឧត្ដម ហ៊ុន ម៉ានី កោតសរសើរថ្នាក់ដឹកនាំគ្រប់ជាន់ថ្នាក់ ចំពោះបេសកកម្មស្នើដាក់បញ្ចូលសម្បត្តិបេតិកភណ្ឌពិភពលោកជាបន្តបន្ទាប់

បានផុស

២ ខែ មុន

នៅ

ថ្ងៃពុធ ២០ កញ្ញា ២០២៣

ដោយ

ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានកោតសរសើរ និងថ្លែងអំណរគុណដល់ ថ្នាក់ដឹកនាំគ្រប់ជាន់ថ្នាក់ ចំពោះបេសកកម្ម និងដំណើរការដ៏ស្វិតស្វាញ ក្នុងការស្នើដាក់បញ្ចូលសម្បត្តិបេតិកភណ្ឌពិភពលោក ជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកោតសរសើរ និងថ្លែងអំណរគុណថ្នាក់ដឹកនាំគ្រប់ជាន់ថ្នាក់ ចំពោះបេសកកម្ម និងដំណើរការដ៏ស្វិតស្វាញ នៃការស្នើដាក់បញ្ចូលសម្បត្តិបេតិកភណ្ឌពិភពលោក ជាបន្តបន្ទាប់នេះ ក្នុងឱកាសដែល ឯកឧត្ដម ហ៊ុន ម៉ានី រដ្ឋមន្ត្រីក្រសួងមុខងារសាធារណៈ ចូលរួមអបអរសាទរពោរពេញដោយមោទកភាព ក្នុងការដាក់បញ្ចូល «រមណីយដ្ឋានប្រាសាទកោះកេរ» ទៅក្នុងបញ្ជីបេតិកភណ្ឌពិភពលោក នៃអង្គការយូណេស្កូ។

នាឱកាសចូលរួមអបអរសាទរនោះដែរ ឯកឧត្ដម ហ៊ុន ម៉ានី បានមានប្រសាសន៍ថា «យើងខ្ញុំ មានក្តីអំណរ កោតសរសើរ និងសូមថ្លែងអំណរគុណដល់រាជរដ្ឋាភិបាលកម្ពុជាអាណត្តិទី ៦ ក្រោមការដឹកនាំដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន និងរាជរដ្ឋាភិបាលអាណត្តិទី ៧ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត ក៏ដូចជាការខិតខំប្រឹងប្រែងយ៉ាងសកម្មរបស់ថ្នាក់ដឹកនាំ របស់ក្រសួងវប្បធម៌ និងវិចិត្រសិល្បៈ រួមជាមួយមន្ត្រីជំនាញទាំងអស់ ក្រោមការដឹកនាំរបស់ លោកជំទាវបណ្ឌិតសភាចារ្យ ភឿង សកុណា ក្នុងបេសកកម្ម និងដំណើរការដ៏ស្វិតស្វាញ ក្នុងការស្នើដាក់បញ្ចូលសម្បត្តិបេតិកភណ្ឌពិភពលោក ជាបន្តបន្ទាប់»។

ជាងនេះទៅទៀត ឯកឧត្ដម ហ៊ុន ម៉ានី ក៏បានអរគុណដល់ប្រជាពលរដ្ឋខ្មែរទាំងអស់ ដែលរួមកម្លាំងគ្នាជាធ្លុង ក្នុងស្មារតី «ខ្មែរតែមួយ» និងស្មារតី «ខ្មែរធ្វើបាន» ក្នុងការការពារថែរក្សាសម្បត្តិវប្បធម៌ អរិយធម៌ បូរណភាពទឹកដី និងអធិបតេយ្យភាព ហើយរួមគ្នាជ្រោងទង់ជាតិកម្ពុជាឲ្យកាន់តែមានកិត្យានុភាពខ្ពស់ត្រដែតលើឆាកអន្តរជាតិផងដែរ៕

អត្ថបទ ៖ ពិសី