ព័ត៌មានជាតិ

ខេត្តកោះកុង សាទរការដាក់បញ្ចូលប្រាសាទកោះកេរ ជាសម្បត្តិបេតិកភណ្ឌពិភពលោក

បានផុស

៣ years មុន

នៅ

ថ្ងៃពុធ ២០ កញ្ញា ២០២៣

ដោយ

គ្រប់រដ្ឋបាលខេត្ត មន្ទីរ ក្រុង ស្រុក និងវត្តអារាម សុទ្ធតែបានចូលរួមសម្ដែងក្តីសប្បាយរីករាយយ៉ាងខ្លាំងចំពោះការដាក់បញ្ចូលប្រាសាទកោះកេរជាសម្បត្តិបេតិកភណ្ឌពិភពលោក នៅប្រទេសអារ៉ាប៊ីសាអូឌីត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្នាក់ដឹកនាំខេត្ត មន្ទីរអង្គភាពជំនាញពាក់ព័ន្ធ រហូតដល់រដ្ឋបាលក្រុង ស្រុក និងឃុំ សង្កាត់ បានបង្ហាញមោទនភាពចំពោះកម្ពុជាដែលឈ្នះការបញ្ចូលប្រាសាទកោះកេរជាសម្បត្តិបេតិកភណ្ឌពិភពលោក។

តំណាងឲ្យមន្ត្រីរាជការ កងកម្លាំងប្រដាប់អាវុធ ពលរដ្ឋ និងយុវជននៅក្នុងភូមិសាស្ត្រខេត្តកោះកុង លោក កាយ សំរួម ប្រធានក្រុមប្រឹក្សាខេត្ត បានលើកឡើងសរសើរពីការតស៊ូលះបង់គ្រប់យ៉ាង ដើម្បីធ្វើយ៉ាងណាឲ្យប្រាសាទកោះកេរបានក្លាយជាសម្បត្តិបេតិកភណ្ឌពិភពលោក ក្រោមការដឹកនាំដ៏ប៉ិនប្រសប់របស់ សម្តេចតេជោ អតីតនាយករដ្ឋមន្ត្រី និងសម្តេចធិបតី ហ៊ុន ម៉ាណែត នាយករដ្ឋមន្ត្រី អាណត្តិទី ៧។

លោក កាយ សំរួម យល់ឃើញថា កម្ពុជា នឹងកាន់តែធ្វើឲ្យមជ្ឈដ្ឋានពិភពលោកទទួលស្គាល់ពីវប្បធម៌អរិយធម៌ដែលកម្ពុជា តាមរយៈការបង្ហាញប្រាង្គប្រាសាទដែលជាកេរដំណែលរបស់ដូនតាទៅកាន់សកលលោក។ លោក ក៏សូមថ្លែងអំណរអរគុណយ៉ាងខ្លាំងជូនចំពោះរាជរដ្ឋាភិបាលកម្ពុជា និងក្រសួងជំនាញពាក់ព័ន្ធ ដែលប្រឹងប្រែងជម្នះបញ្ហាផ្សេងៗ ស្វែងរកឯកសារក៏រឹងមាំ ទាមទារឲ្យបញ្ចូលប្រាសាទកោះកេរជាសម្បត្តិបេតិកភណ្ឌពិភពលោក។

ដោយឡែកអ្នកអង្គម្ចាស់បណ្ឌិត ស៊ីសុវត្ថិ ឬទ្ធីរ៉ាវង្ស នាយកវិទ្យាស្ថានពហុបច្ចេកទេសខេត្តកោះកុង និងនិស្សិត ក៏បានចូលរួមរៀបចំពិធីអបអរសាទរនេះដែរ ដោយនាំគ្នាលើកទង់ជាតិ និងស្រែកច្រៀងបទពង្សាវតារខ្មែរ ក្នុងស្មារតីសាមគ្គីភាព ការពារអភិរក្ស និងអានសាររបស់រាជរដ្ឋាភិបាលផ្សព្វផ្សាយពីអ្វីដែលកម្ពុជាទទួលបានពីអន្តរជាតិដូចពេលនេះ។

អ្នកអង្គម្ចាស់ និងតំណាងមន្ទីរអង្គភាព រដ្ឋបាលក្រុង ស្រុក ក្នុងខេត្តកោះកុង ជឿជាក់ថា កម្ពុជា នឹងបន្តស្វែងរកឯកសារ និងប្រាង្គប្រាសាទនានា ដាក់បញ្ចូលទៅជាសម្បត្តិបេតិកភណ្ឌបន្ថែមទៀត ដើម្បីលើកស្ទួយវិស័យវប្បធម៌ ការអភិវឌ្ឍ អភិរក្ស និងផ្ដល់ប្រយោជន៍ជូនជាតិមាតុភូមិ។

ក្រៅពីការរៀបចំជាពិធីទូងស្គរជ័យ គង និងជួង តាមទីតាំងអគារធ្វើការងារ សាលារៀន និងវត្តអារាម ក៏គេសង្កេតឃើញមានតាមបណ្ដាញសង្គមមានប្រជាពលរដ្ឋទូទៅក្នុងខេត្ត បានបន្តនាំគ្នាបង្ហោះសារអបអរសាទរពីអ្វីកម្ពុជាសម្រេចបានជោគជ័យនេះដែរ៕

អត្ថបទ ៖ សិរីវឌ្ឍនៈ