អាកាសយានដ្ឋានអន្តរជាតិសៀមរាបអង្គរកើនឡើងជើងហោះហើរ២០ជើងក្នុងមួយថ្ងៃ

គិតត្រឹមថ្ងៃទី ១៨ តុលា ឆ្នាំ ២០២៣ អាកាសយានដ្ឋានអន្តរជាតិសៀមរាបអង្គរ បានទទួលជើងហោះហើរប្រមាណ ២០ជើង ក្នុងមួយថ្ងៃ។ នេះបើតាមការបញ្ជាក់របស់លោក ស៊ីន ចាន់សេរីវុត្ថា អ្នកនាំពាក្យអាកាសចរស៊ីវិល ប្រាប់កម្ពុជាថ្មីនៅព្រឹកនេះ។

យោងតាមរបាយការណ៍ដែលផ្តល់ជូនដោយអ្នកនាំពាក្យអាកាសចរស៊ីវិល បានបង្ហាញពីជើងហោះហើររួមមានពី៖ (បាងកកសុវណ្ណភូមិ-សៀមរាប, សៀមរាប-បាងកកសុវណ្ណភូមិ), (ភ្នំពេញសៀមរាប, សៀមរាប-ព្រះសីហនុ), (បាងកកដនមឿង-សៀមរាប, សៀមរាប-បាងកកដនមឿង), (សៀមរាប-ហូជីមិញ), (ភ្នំពេញ-សៀមរាប, សៀមរាប-បាងកកដនមឿង), (ព្រះសីហនុ-សៀមរាប, សៀមរាប-ដាណាង), (ហូជីមិញ-សៀមរាប, សៀមរាប-ហូណូយ)។ល។

អាកាសយានដ្ឋានអន្តរជាតិសៀមរាបអង្គរ មានតម្លៃជាង ១ ១០០លានដុល្លារ ទើបដាក់ឱ្យដំណើរការកាលពីថ្ងៃទី ១៦ តុលា មានទំហំធំលើផ្ទៃដីជាង ៧០០ហិកតា ដោយក្នុងមួយឆ្នាំ អាចទទួលបានអ្នក​ដំណើរប្រមាណ ៧លាននាក់ និងទំនិញ ១ម៉ឺនតោន។ ក្នុងនោះ អាចទទួលភ្ញៀវក្នុងមួយម៉ោងបានប្រមាណ ២៥០០នាក់។

លោក តុប សុភ័ក អ្នកនាំពាក្យក្រសួងទេសចរណ៍ បានលើកឡើងថា អាកាសយានដ្ឋានអន្តរជាតិសៀមរាបអង្គរ គឺជាសមិទ្ធផលនៃហេដ្ឋារចនាសម្ព័ន្ធ​ដ៏សំខាន់ នៅក្នុងការទ្រទ្រង់វិស័យទេសចរណ៍ និងអាចទាក់ទាញ​បាននូវការ​តភ្ជាប់ជើងហោះ​ហើរពីតំបន់ផ្សេងៗនៅលើពិភពលោកមកកាន់កម្ពុជា។ លោក បានសង្កត់ធ្ងន់ថា អាកាសយានដ្ឋាននេះ ពិតជាមានសក្តានុពលធំ ក្នុងការស្រូប​ទាញទេសចរ និងវិនិយោគិន។ បើតាមលោក តុប សុភ័ក អាកាសយានដ្ឋាននេះ បានរួមចំណែក​យ៉ាងសំខាន់ក្នុងការបង្កើតឱកាសការងារ បានផលចំណេញទាំងសេដ្ឋកិច្ច ពាណិជ្ជកម្ម ជាពិសេស​គោលដៅទេសចរណ៍ខេត្តសៀមរាប និងកម្ពុជាទាំងមូល។

សូមបញ្ជាក់ថា អាកាសយានដ្ឋានអន្តរជាតិសៀមរាបអង្គរ មានចំណតសម្រាប់ចតចំនួន ៣៨ ចំណត មានសមត្ថភាព​ទទួលអ្នកដំណើរ​តាមផ្លូវអាកាសបាន ៧លាននាក់ ក្នុងឆ្នាំ២០២៤ និង១២ លាននាក់ក្នុងឆ្នាំ​២០៤០ខាងមុខ។ អាកាសយានដ្ឋាននេះ ក៏មានសមត្ថភាពផ្ទុកទំនិញ​តាមផ្លូវ​អាកាសបានចំនួន​១០,០០០តោន ក្នុងឆ្នាំ២០២៤ និង ២៦,០០០ តោនក្នុងឆ្នាំ២០៤០​ខាងមុខ និងអាចទទួល​ជើងហោះ​ហើរបានចំនួន ៦៥,៨០០ជើង​ក្នុងឆ្នាំ២០២៤ និង១១២,៧០០ ជើង ក្នុងឆ្នាំ ២០៤០៕