ខេត្តពោធិ៍សាត់ រៀបចំព្រឹត្តិការណ៍ប្រណាំងទូកង រយោៈពេល ២ថ្ងៃ ចុងសប្ដាហ៍នេះ

រដ្ឋបាលខេត្តពោធិ៍សាត់មានការរៀបចំ ពិធីប្រណាំងទូក «ង» រយៈពេល ២ថ្ងៃ គឺចាប់ពីថ្ងៃទី៤ និងទី៥ ខែវិច្ឆិកា ឆ្នាំ២០២៣ នៅវេលាម៉ោង ២រសៀល ដែលមានទីតាំងនៅតាមដងស្ទឹងពោធិ៍សាត់ ដោយចាប់តាំងពីចំណុចស្ពានថ្មផ្លូវជាតិលេខ៥ មកខាងក្រោម រហូតដល់ទីតាំងវេទិការអុំទូកពោធិ៍សាត់។

នៅរសៀលថ្ងៃនេះដែរ គណកម្មការរៀបចំបុណ្យអុំទូក បានប្រកាសថា ទូកដែលចូលរួមប្រកួតមានចំនួន ៣៣ ទូក ដែលមកពីខេត្តបាត់ដំបង ចំនួន ២ទូក និងមកពីខេត្តកំពត ចំនួន ១ទូក ដោយមួយទូកៗដាក់ចំណុះបាន ២២នាក់។

ជាមួយនឹងការរៀបចំពិធីប្រណាំងទូកង ខេត្តពោធិ៍សាត់នេះ ខាងអាជ្ញាធររដ្ឋបាលខេត្ត បានរៀបចំសោភណ្ឌភាព ការតុបតែងកែលម្អ ភ្លើងពណ៌ចម្រុះ គ្រប់ទីកន្លែង នៅសងខាងផ្លូវ នឹងប្របមាត់ស្ទឹងដែលជាទីប្រជុំជន សម្រាប់ចូលមកទសន្សកម្សាន្ត។ រដ្ឋបាលខេត្តបានរៀបចំសណ្ដាប់ធ្នាប់ ផ្នែកអនាម័យ បរិស្ថាន ការងារសន្តិសុខ បានយ៉ាងល្អប្រសើរ ដើម្បីទទួលភ្ញៀវទេសចរជាតិ និងភ្ញៀវអន្តរជាតិ ក្នុងព្រិត្តិការណ៍ប្រណាំងទូកង នៅខេត្តពោធិ៍សាត់នេះ។

គួរបញ្ជាក់ថា មុនពេលពិធីប្រណាំងទូកនេះចាប់ផ្ដើមនាព្រឹកថ្ងៃទី៤ ខែវិច្ឆិកា ឆ្នាំ២០២៣ ក៏មានវត្តមាន ក្រុមប្រឹក្សាខេត្ត និង លោក ខូយ រីដា អភិបាល នៃគណៈអភិបាលខេត្តពោធិ៍សាត់ បានដឹកនាំប្រតិភូ ព្រមទាំងក្រុមកីឡាករអុំទូកទាំង ៣៣ទូក ចូលអុជធូក សុំសេចក្ដីសុខ ពីព្រះអង្គចៅសែន ដែលស្ថិតនៅលើ បូរីវប្បធម៌កោះសំពៅមាស៕

អត្ថបទ៖ លាន គ្រន