វិស័យធានារ៉ាប់រងកម្ពុជា មានកំណើនជាង ២.៦ ភាគរយ នៅក្នុងត្រីមាសទី ៣

វិស័យធានារ៉ាប់នៅកម្ពុជា មានការកើនឡើងប្រមានជាង ២.៦ ភាគរយ គិតជាទឹកប្រាក់មានចំនួន ​៨៧,៤ លានដុល្លារ ក្នុងត្រីមាសទី ៣​ ឆ្នាំ ២០២៣​ បើធៀបទៅនឹងរយៈពេលដូចគ្នាកាលពីឆ្នាំ ២០២២ មានចំនួន ៨៥, ២ លានដុល្លារ។ នេះបើយោងតាមរបាយការណ៍របស់និយ័តករធានារ៉ាប់រងកម្ពុជា។

តាមរបាយការណ៍ដដែលបានឱ្យដឹងបន្តថា សម្រាប់ទ្រព្យសកម្មសរុបមានចំនួនជាង ១,០៦៦ លានដុល្លារ មានកំណើន ចំនួន ៩ ភាគរយ ធៀបរយៈពេលដូចគ្នា ក្នុងឆ្នាំ ២០២២ មានចំនួន ៩៧៤ លានដុល្លារ។ ដោយក្នុងនោះ រួមមាន៖ ធានា រ៉ាប់រងទូទៅកើនឡើង ២ ភាគរយ, ធានារ៉ាប់រងអាយុជីវិតមានកំណើន ១៣​ ភាគរយ និងធានារ៉ាប់រងខ្នាតតូចមានចំនួន កើនចំនួន ៦៤ ភាគរយ។

ជាងនេះទៅទៀត និយ័តករធានារ៉ាប់រងកម្ពុជា បានបង្ហាញទៀតថា កំណើននេះ សម្រេចបានដោយក្រុមហ៊ុនធានារ៉ាប់រង ទូទៅចំនួន ១៨ ក្រុមហ៊ុនធានារ៉ាប់រងអាយុជីវិតចំនួន១៤ ក្រុមហ៊ុនធានារ៉ាប់រងខ្នាតតូចចំនួន ៧ និងក្រុមហ៊ុនធានារ៉ាប់រង បន្តចំនួន ១។

សូមរំឮកថា កាលពីថ្ងៃទី ១០ ខែវិច្ឆិកា និយ័តករធានារ៉ាប់រងកម្ពុជា (ន.ធ.ក.) បានរៀបចំសិក្ខាសាលាផ្សព្វផ្សាយអំពី «អត្ថប្រយោជន៍នៃផលិតផល ធានារ៉ាប់រងទូទៅ» គោលបំណងបញ្ជ្រាបចំណេះដឹង និងចូលរួមចំណែកការពារ ផលប្រ​យោជន៍ សិទ្ធិ និងកាតព្វកិច្ចរបស់អ្នកប្រើប្រាស់ ធានារ៉ាប់រង ដោយបានផ្ដោតសំខាន់លើ មូលដ្ឋានគ្រឹះ​នៃការធា​នារ៉ាប់រង ប្រភេទនៃធានារ៉ាប់រងទូទៅ អត្ថប្រយោជន៍ នៃការធានារ៉ាប់រង តួនាទី និងភារកិច្ចរបស់​និយ័តករធានា​រ៉ាប់រងកម្ពុជា៕

អត្ថបទ៖ ផល ធារិត