វេទិកានិយ័តករ-អគ្គនាយកធានារ៉ាប់រង ធ្វើឡើងដើម្បីដោះស្រាយបញ្ហាប្រឈមក្នុងវិស័យធានារ៉ាប់រងនៅកម្ពុជា

នៅព្រឹកថ្ងៃទី២៥ ខែកក្កដា ឆ្នាំ២០២៥ និយ័តករធានារ៉ាប់រងកម្ពុជា បានរៀបចំវេទិកានិយ័តករ-អគ្គនាយកធានារ៉ាប់រង ដើម្បីដោះស្រាយបញ្ហាប្រឈមនានានៅក្នុងវិស័យធានារ៉ាប់រងនៅកម្ពុជា។ វេទិកានេះ មានការចូលរួមក្រោមអធិបតីភាព លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា និងលោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា ព្រមទាំងក្រុមហ៊ុនធានារ៉ាប់រងនៅកម្ពុជាផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជា បានលើកឡើងក្នុងមតិស្វាគមន៍ថា គោលបំណងដែលរៀបចំវេទិកានេះឡើងមក គឺដើម្បីដោះស្រាយបញ្ហាប្រឈមនានាក្នុងវិស័យធានារ៉ាប់រង ក្នុងភាពជាដៃគូរវាងរដ្ឋ និងឯកជន រវាងប្រតិបត្តិករ និងនិយ័តករ ក្នុងការដោះស្រាយបញ្ហាឱ្យបានទាន់ពេលវេលា ធានាបានដល់ការអភិវឌ្ឍក្នុងវិស័យនេះទាំងមូលប្រកបដោយចីរភាព និងបរិយាបន្ន។

អគ្គនាយកនិយ័តករធានារ៉ាប់រងកម្ពុជា មានប្រសាសន៍ថា៖ “ដើម្បីវិស័យទាំងមូលអភិវឌ្ឍន៍បាន យើងត្រូវតែយល់គ្នា ដោះស្រាយរួមគ្នាគ្មានភាគីណាមួយដើរតែឯងទេ គឺត្រូវតែដើររួមគ្នា”។ លោក ប៊ូ ច័ន្ទភីរូ ជឿជាក់ថា តាមរយៈវេទិកានេះ រាល់កង្វល់នានានឹងត្រូវលើកយកមកពិភាក្សា និងដោះស្រាយរួមគ្នាបាន ទោះបីជាមិនអាចដោះស្រាយបាននៅថ្ងៃនេះ ក៏ត្រូវយកបញ្ហាដោះស្រាយឱ្យបាន។ លោកបញ្ជាក់ទៀតថា ក្នុងឱកាសនេះ គឺដោះស្រាយបញ្ហារួម បញ្ហាទីផ្សារទាំងមូល ពោល គឺមិនមែនជាវេទិកាសម្រាប់ដោះស្រាយបញ្ហារបស់ក្រុមហ៊ុននីមួយៗនោះទេ។

ជាមួយគ្នានេះ លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានលើកឡើងថា វេទិកានិយ័តករ-អគ្គនាយកធានារ៉ាប់រង នេះ គឺជាវេទិកាមួយដែលអាចជជែកពិភាក្សាគ្នានូវបញ្ហាប្រឈមនានាដែលប្រតិបត្តិករក្នុងទីផ្សារបានជួបប្រទះ ជាវេទិកាដែលអាចរកដំដោះស្រាយរួមក្នុងគោលដៅអភិវឌ្ឍន៍ទីផ្សារប្រកបដោយប្រសិទ្ធភាព ចីរភាព និងមានភាពធន់។ លោកបានបន្តថា សមាគមធានារ៉ាប់រងកម្ពុជា ក៏បានសម្របសម្រួលប្រមូលផ្តុំនូវការកំណត់បញ្ហាប្រឈមដែលប្រតិបត្តិករបានជួបប្រទះ ដោយដាក់បញ្ជីបញ្ហា និងបែងចែករវាងបញ្ហារបស់ក្រុមហ៊ុន និងបញ្ហាសម្រាប់វិស័យទាំងមូល។

លោក ហ៊ុយ វ៉ាថារ៉ូ បន្ថែមថា បញ្ហាមួយចំនួនលោកយល់ថាមិនទាន់អាចដោះស្រាយបានទាំងស្រុងនោះទេ ប៉ុន្តែយ៉ាងហោចណាស់ក៏បានយល់គ្នាថា អ្វីទៅជាបញ្ហាពិតប្រាកដ? ទោះបីមិនអាចដោះស្រាយបាននៅក្នុងវេទិកានេះក៏ពិតមែន ក៏អាចទទួលបានការណែនាំបន្ថែម និងអនុសាសន៍មួយចំនួន ដើម្បីឆ្លើយតបការលើកឡើងរបស់ប្រតិករដែរ។ លោកបញ្ជាក់ថា វេទិកានេះ ដើរតួនាទីសំខាន់ក្នុងការអភិវឌ្ឍទីផ្សារកម្ពុជា។

សូមជម្រាបថា ក្នុងវេទិកានិយ័តករ-អគ្គនាយកធានារ៉ាប់រង ក៏មានកិច្ចពិភាក្សាចំនួន២ ផងដែរ។ ទី១  កិច្ចពិភាក្សាលើបញ្ហាប្រឈមរបស់សមាគមធានារ៉ាប់រងកម្ពុជា និងទី២ កិច្ចពិភាក្សាលើបញ្ហាប្រឈមរបស់សមាគមជើងសាធានារ៉ាប់រងកម្ពុជា៕

អត្ថបអទ៖ អុន ស្រីមាន