ការតាំងពិព័រណ៍សៀវភៅលើកទី ១០ ឆ្នាំនេះ មានគោលបំណងចម្បងធំៗ ចំនួន ៣

ការតាំងពិព័រណ៍សៀវភៅលើកទី ១០ ឆ្នាំ ២០២៣ នេះ មានគោលបំណងចម្បងធំៗ ចំនួន ៣ ដោយចង់ប្រែក្លាយសៀវភៅឱ្យទៅជាឧស្សាហកម្មវប្បធម៌មួយផ្នែកបោះពុម្ពះផ្សាយ ថែមទាំងទទួលបានទីផ្សារខ្ពស់ និងចំណាប់អារម្មណ៍ពីសំណាក់អ្នកអាននៅកម្ពុជាកាន់តែប្រសើរឡើងជាងបណ្ដាឆ្នាំមុនៗ។

ថ្លែងក្នុងសន្និសីទសារព័ត៌មានពិព័រណ៍សៀវភៅលើកទី ១០ ក្រោមប្រធានបទ«សរសេរចំណាន អានចំណាប់ ចាប់យកចំណេះ» នៃបណ្ណាល័យជាតិ នាថ្ងៃទី ០៦ ខែធ្នូ ឆ្នាំ ២០២៣ នេះ លោកស្រី ឡងឌី សាន់ណារ៉ា រដ្ឋលេខាធិការក្រសួងវប្បធម៌ និងវិចិត្រសិល្បៈ បានមានប្រសាសន៍ថា ឆ្នាំនេះ គឺជាលើកទី ១០ ដែលក្រសួងអប់រំ យុវជន និងកីឡា សហការជាមួយក្រសួងវប្បធម៌ និងវិចិត្រសិល្បៈ និងរួមចំណែកពីបណ្ដាដៃគូក្រុមហ៊ុនផ្សេងៗទៀត បានរួមគ្នាបង្កើតការតាំងពិព័រណ៍សៀវភៅនេះឡើងមកឱ្យចេញជារូបរាងទៅបានដូចជាឆ្នាំមុនៗដែរ។​

លោកស្រី មានប្រសាសន៍បន្ថែមថា ការតាំងពិព័រណ៍សៀវភៅនៅឆ្នាំនេះ មានគោលបំណងចម្បងធំៗ ចំនួន ៣ គឺ ៖ ទី១.ចង់ឱ្យការបោះពុម្ពះផ្សាយសៀវភៅនៅប្រទេសកម្ពុជា មានទីផ្សារខ្ពស់​ ទាំងក្នុងស្រុក និងក្រៅស្រុក, ទី២.ចង់ជំរុញប្រជាជនខ្មែរមានទម្លាប់ក្នុងការអានសៀវភៅ និងជាសារមួយផ្ដាំផ្ញើទៅដល់យុវជនឱ្យយល់ច្បាស់ពីសារៈសំខាន់ នៃការអានសៀវភៅ, ទី៣.បង្កើនវិធីនិទានរឿង និងការគូរគំនូរ រូបភាពផ្សេងៗ ដល់កុមារ ដើម្បីបណ្ដុះស្មារតីកុមារឱ្យស្រឡាញ់សៀវភៅតាំងពីតូចៗមក។

ជាងនេះទៅទៀត លោកស្រីរដ្ឋលេខាធិការ បានបញ្ជាក់ទៀតថា​ ការតាំងពិព័រណ៍សៀវភៅលើកទី ១០ ឆ្នាំ ២០២៣ នេះ គឺចង់លើកទឹកចិត្តដល់ អ្នកនិពន្ធ អ្នកស្រាវជ្រាវសៀវភៅផ្សេងៗ ធ្វើយ៉ាងណាឱ្យការបោះពុម្ពះផ្សាយមានទីផ្សារខ្ពស់ ដើម្បីឆ្លើយតបទៅនឹងការខិតខំប្រឹងប្រែងរបស់ពួកគាត់កន្លងមកនេះ។

ជាមួយគ្នានេះ លោក ហុក សិទ្ធិ ប្រធានសមាគមបណ្ណារក្ស និងឯកសារវិទូកម្ពុជា និងនាយកអង្គការស៊ីប៉ា ក៏បានមានប្រសាសន៍ដែរថា ការតាំងពិព័រណ៍សៀវភៅនៅឆ្នាំនេះ គឺធ្វើយ៉ាងណាចង់ប្រែក្លាយសៀវភៅឱ្យក្លាយទៅជាឧស្សាហកម្មវប្បធម៌មួយដែលជួយជំរុញដល់អ្នកអានសៀវភៅនៅកម្ពុជាមានកំណើតកើនឡើងខ្ពស់ និងជួយលើកទឹកចិត្តដល់អ្នកនិពន្ធ អ្នកស្រាវជ្រាវ ចងក្រងសៀវភៅផ្សេងៗ តាមរយៈស្នាដៃរបស់ខ្លួនដែលបានខិតខំកន្លងមក។​

លោក ហុក សិទ្ធិ ក៏បានបញ្ជាក់ថា​ ការដែលបង្កើតកម្មវិធីតាំងពិព័រណ៍សៀវភៅនេះឡើង គឺចង់ឱ្យយុវជន សិស្ស-និស្សិត នាំគ្នាយល់ពីតម្លៃ នៃការអានសៀវភៅ នាំស្រឡាញ់ការអាន បណ្ដុះគំនិតស្មារតី ចាប់យកចំណេះជំនាញផ្សេងៗ តាមរយៈសៀវភៅ។ ក្នុងនោះ ក៏មានស្នាដៃ អក្សរសាស្រ្ត អក្សរសិល្ប៍ និងវិទ្យាសាស្រ្ត បច្ចេកវិទ្យាផ្សេងៗ ដើម្បីឱ្យយុវជន សិស្ស-និស្សិត ក្លាយជាធនធានមនុស្សដែលមានពហុជំនាញក្នុងសង្គមជាតិរបស់ខ្លួន។

សូមជម្រាបជូនថា កម្មវិធីការតាំងពិព័រណ៍សៀវភៅលើកទី ១០ ឆ្នាំ ២០២៣​ នឹងប្រព្រឹត្តទៅរយៈពេល ៤ ថ្ងៃ ចាប់ពីថ្ងៃទី ១៤ ដល់ ថ្ងៃទី ១៧ ខែធ្នូ ឆ្នាំ ២០២៣ នេះ ក្រោមប្រធានបទ «សរសេរចំណាន អានចំណាប់ ចាប់យកចំណេះ» ដែលមានទីតាំងស្ថិតនៅសួនច្បារខាងមុខសាលាបុរីកោះពេជ្រ រាជធានីភ្នំពេញ៕

អត្ថបទ ៖ សួស សិត