មកស្គាល់ប្រទេស៧ មានទំហំពាណិជ្ជកម្ម​ជាមួយ​កម្ពុជា ចាប់ពីពាន់​លានដុល្លារឡើង ក្នុងឆ្នាំ ២០២៣

កម្ពុជា បានដោះដូរទំនិញជាមួយប្រទេសចំនួន ៧ ដែលសម្រេចបានទឹកប្រាក់រាប់ពាន់លានដុល្លារ ក្នុងមួយឆ្នាំៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រទេសដែលមានទំហំពាណិជ្ជកម្មធំជាងគេជាមួយកម្ពុជា គឺប្រទេសចិន មានទំហំពាណិជ្ជកម្មសរុបជាង ១២ពាន់​លានដុល្លារ នៅឆ្នាំ ២០២៣។ ក្នុងនោះការនាំចេញរបស់កម្ពុជា ទៅចិនមានចំនួនជាង ១,៤៧ពាន់លានដុល្លារ ខណៈការនាំចូលមកវិញមានចំនួនជាង ១០,៧៨ពាន់លានដុល្លារ។

ប្រទេសអាមេរិក ជាប់លំដាប់លេខរៀងទី២ មានទំហំពាណិជ្ជកម្មជាមួយកម្ពុជា ប្រមាណ ៩,១៥ពាន់លានដុល្លារ នៅក្នុងឆ្នាំ ២០២៣។ ការនាំចេញរបស់កម្ពុជា ទៅទីផ្សារអាមេរិក សម្រេចបានប្រមាណ ៨,៨៩ពាន់លានដុល្លារ និងនាំចូលមកវិញមានចំនួនជាង ២៥៧លានដុល្លារអាមេរិក។

លំដាប់លេខរៀងទី៣ បានទៅលើប្រទេសវៀតណាម មានទំហំពាណិជ្ជកម្មជាមួយកម្ពុជា ប្រមាណជាង ៦,៥៨ពាន់​លានដុល្លារ ក្នុងការនាំចេញរបស់កម្ពុជាទៅវៀតណាម សម្រេចបានជាង ២,៩៧ពាន់លានដុល្លារ និងនាំចូលមក​វិញមានចំនួនជាង ៣,៦១ពាន់លានដុល្លារ រយៈពេល ១២ខែ ឆ្នាំ ២០២៣។

ដោយឡែកប្រទេសថៃជាប់លំដាប់លេខរៀងទី៤ មានទំហំពាណិជ្ជកម្មជាមួយកម្ពុជា ប្រមាណ ៣,៧១ពាន់លានដុល្លារ។ ក្នុងនោះ ថៃបានទទួលទិញទំនិញពីកម្ពុជា ក្នុងតម្លៃទឹកប្រាក់ជាង ៨១៧លានដុល្លារ និងកម្ពុជា ទិញទំនិញពីថៃត្រ​ឡប់មកវិញក្នុងតម្លៃជាង ២,៨៩ពាន់លានដុល្លារ។

ចំណែករយៈពេល ១២ឆ្នាំ ២០២៣កន្លងទៅ ការដោះដូរទំនិញរវាងកម្ពុជា ជប៉ុនសម្រេចបានប្រមាណ ១,៧៩ពាន់​លានដុល្លារ ដែលនាំឱ្យជប៉ុន ឈរលេខរៀងទី៥ ក្នុងការធ្វើពាណិជ្ជកម្មជាមួយកម្ពុជា។ ក្នុងនោះ ការនាំចេញរបស់កម្ពុជា ទៅជប៉ុនសម្រេចបានប្រមាណជាង ១,១៧ពាន់លានដុល្លារ និងនាំចូលមកវិញមានចំនួនជាង ៦២៣លានដុល្លារ​អាមេរិក។

ការដោះទំនិញរវាងកម្ពុជា និងឥណ្ឌូណេស៊ី សម្រេចបនាប្រមាណជាង ១,០៨ពាន់លានដុល្លារ នៅឆ្នាំ ២០២៣។ ក្នុងនោះ ការនាំចេញរបស់កម្ពុជា ទៅទីផ្សារឥណ្ឌូណេស៊ីមានចំនួនជាង ៩២លានដុល្លារ និងនាំចូលមកវិញ​មានចំនួនជាង ៩៩៤លានដុល្លារ ដែលធ្វើឱ្យប្រទេសឥណ្ឌូណេស៊ីជាប់លំដាប់លេខរៀងទី៦ ក្នុងការធ្វើ​ពាណិជ្ជកម្មជាមួយកម្ពុជា។

ដោយឡែកប្រទេសចុងក្រោយឈរនៅលំដាប់លេខរៀងទី៧ ដែលមានពាណិជ្ជកម្មជាមួយកម្ពុជា ខ្ទង់ពាន់លានដុល្លារ គឺប្រទេសអាល្លឺម៉ង់។ ការធ្វើពាណិជ្ជកម្មកម្ពុជា អាល្លឺម៉ង់ នៅឆ្នាំ ២០២៣សម្រេចបានប្រមាណជាង ១,០១ពាន់​លានដុល្លារ។ ក្នុងនោះ ការនាំចេញរបស់កម្ពុជា ទៅអាល្លឺម៉ង់ មានចំនួនជាង ៨១៥លានដុល្លារ និងនាំចូលមក​វិញមានចំនួនជាង ១៩៥លានដុល្លារ។

សូមបញ្ជាក់ថា នៅក្នុងឆ្នាំ ២០២៣ កម្ពុជា មានទំហំពាណិជ្ជកម្មជាមួយអន្តរជាតិ សម្រេចបានទឹកប្រាក់ប្រមាណជាង ៤៦,៨២ពាន់លានដុល្លារ មានការថយចុះជិត ១០ភាគរយ បើធៀបនឹងរយៈពេលដូចគ្នាកាលពីឆ្នាំ ២០២២ មានចំនួន​ទឹកប្រាក់ជាង ៤៧,៧១ពាន់លានដុល្លារអាមេរិក។ នេះបើយោងតាមរបាយការណ៍អគ្គនាយកដ្ឋានគយ និងរដ្ឋាករ​កម្ពុជា៕