ប្រមុខការទូតកម្ពុជា សាទរការតែងតាំងប្រេសិតពិសេសថ្មីរបស់ប្រធានអាស៊ានជុំវិញបញ្ហានៅ មីយ៉ាន់ម៉ា

រដ្ឋមន្ត្រីការបរទេសកម្ពុជា បានសាទរ និងស្វាគមន៍ការតែងតាំងប្រេសិតពិសេសថ្មីរបស់ប្រធានអាស៊ានជុំវិញបញ្ហានៅ មីយ៉ាន់ម៉ា សម្រាប់ឆ្នាំ២០២៤នេះ​ ដែលប្រទេសឡាវ ធ្វើជាប្រធានអាស៊ាន។ ការស្វាគមន៍ចំពោះការតែងតាំងប្រេសិតពិសេសថ្មីនេះ ធ្វើឡើងនៅក្នុងកិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅទីក្រុងហ្លួងព្រះបាង ប្រទេសឡាវ នាថ្ងៃ ទី២៩ ខែមករា ឆ្នាំ២០២៤។

លោក សុខ ចិន្តាសោភា ឧបនាយករដ្ឋមន្ត្រី និងជារដ្ឋមន្ត្រីការបរទេសកម្ពុជា បានសម្ដែងការស្វាគមន៍ការតែងតាំងលោក អាលួនកែវ កិត្តិឃួន ជាប្រេសិតពិសេសរបស់ប្រធានអាស៊ានស្តីពីបញ្ហាមីយ៉ាន់ម៉ា សម្រាប់ឆ្នាំ២០២៤ និងគំនិតផ្តួចផ្តើមគន្លឹះរបស់ឡាវក្នុងការសម្របសម្រួលការអនុវត្តកិច្ចព្រមព្រៀងជាឯកច្ឆន្ទ ៥ចំណុច ដែលនឹងរួមចំណែកដោយស្ថាបនាដល់ដំណើរការសន្តិភាពដែលម្ចាស់ការ និងដឹកនាំដោយមីយ៉ាន់ម៉ា។ នេះបើតាមសេចក្ដីប្រកាសព័ត៌មានរបស់ក្រសួងការបរទេស នាព្រឹកថ្ងៃទី៣០ ខែមករានេះ។

ជាមួយគ្នានេះ លោកឧបនាយករដ្ឋមន្ត្រី សុខ ចិន្តាសោភា ក៏បានស្វាគមន៍ផងដែរនូវគំនិតផ្តួចផ្តើមរបស់ថៃ និងមីយ៉ាន់ម៉ា ក្នុងការបង្កើនជំនួយមនុស្សធម៌ដល់ប្រជាជនដែលរងផលប៉ះពាល់នៅតាមតំបន់ព្រំដែន ដោយមានមជ្ឈមណ្ឌលអាស៊ានដើម្បីសម្របសម្រួលជំនួយមនុស្សធម៌ និងគ្រប់គ្រងគ្រោះមហន្តរាយ (មជ្ឈមណ្ឌល AHA) ចូលរួមក្នុងដំណើរការត្រួតពិនិត្យ។

គួរជម្រាបថា សម្រាប់កិច្ចប្រជុំចង្អៀតរដ្ឋមន្ត្រីការបរទេសអាស៊ាន នៅប្រទេសឡាវពេលនេះ រដ្ឋាភិបាលយោធាមីយ៉ាន់ម៉ា ក៏បានសម្រេចចិត្តបញ្ជូនមន្ត្រីការទូតជាន់ខ្ពស់របស់ខ្លួនទៅចូលរួមក្នុងកិច្ចប្រជុំនេះដែរ ដែលនេះហាក់បង្ហាញថា រដ្ឋាភិបាលយោធាមីយ៉ាន់ម៉ា កំពុងបន្ទន់ឥរិយាបទ ដោយវិលចូលតុពិភាក្សាជាមួយអាស៊ានវិញ ក្រោយធ្វើពហិការជាច្រើនលើក នាកន្លងមក៕