កម្ពុជា ម៉ាឡេស៊ី សម្រេចបានការពង្រឹងកិច្ចសហប្រតិបត្តិការលើច្រើនវិស័យ

ថ្លែងនៅក្នុងសន្និសីទសារព័ត៌មាន ពីប្រទេសម៉ាឡេស៊ី នៅថ្ងៃទី២៧ ខែកុម្ភៈ ឆ្នាំ២០២៤ នេះ សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បញ្ជាក់ថា កម្ពុជា ម៉ាឡេស៊ី កាន់តែពង្រឹងទំនាក់ទំនង និងកិច្ចសហប្រតិបត្តិការលើច្រើនវិស័យទាំងវិស័យនយោបាយ និងវិស័យសេដ្ឋកិច្ច។

សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា មានប្រសាសន៍ថា នេះជាលើកទី១ ក្នុងការបំពេញទស្សនកិច្ចជាផ្លូវការរបស់សម្ដេចនៅប្រទេសម៉ាឡេស៊ី និងបានជជែកពិភាក្សាការងារទ្វេភាគី ជាមួយ លោក អាន់វ៉ា អ៉ីប្រាហ៉ីម នាយករដ្ឋមន្ត្រីម៉ាឡេស៊ី និងមន្ត្រីជាន់ខ្ពស់នៃប្រទេសទាំងពីរ ប្រកបដោយលទ្ធផលខ្ពស់។

សម្ដេចធិបតីបញ្ជាក់ថា ក្នុងជំនួបពិភាក្សានេះ បានធ្វើឱ្យទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរ កាន់តែពង្រឹងស៊ីជម្រៅបន្ថែមទៀត លើវិស័យជាច្រើនរួមមាន នយោបាយ ពាណិជ្ជកម្ម និងវិនិយោគ ការពារជាតិ និងសន្តិសុខ ការងារ ទេសចរណ៍ បច្ចេកវិទ្យា​ឌីជីថល សន្តិសុខថាមពលជាដើម។

សម្តេចនាយករដ្ឋមន្ត្រីកម្ពុជា និងលោកនាយករដ្ឋមន្ត្រីម៉ាឡេស៊ី ថែមទាំងបានពិភាក្សាផ្លាស់ប្តូរទស្សនៈគ្នាទៅវិញទៅមកលើបញ្ហាតំបន់ និងអន្តរជាតិ ដែលជាផលប្រយោជន៍រួម​រវាងប្រទេសទាំងពីរ និងតំបន់ផងដែរ។ ជាមួយគ្នានេះ សម្ដេចធិបតី សូមស្វាគមន៍ វិនិយោគិនម៉ាឡេស៊ី ក្នុងការសិក្សាវិនិយោគនៅកម្ពុជាបន្តទៀត ខណៈកម្ពុជាមានសក្ដានុពលជាច្រើន។

នាយករដ្ឋមន្ត្រីកម្ពុជា និងម៉ាឡេស៊ី នឹងអញ្ជើញធ្វើជាសាក្សី ក្នុងពិធីចុះហត្ថលេខាលើអនុស្សារណៈយោគយល់គ្នាចំនួន ៣រួមមាន អនុស្សារណៈ​យោគយល់គ្នាមួយ រវាងធនាគារជាតិ នៃកម្ពុជា និងធនាគារកណ្ដាលម៉ាឡេស៊ី និងអនុស្សារណៈយោគយល់គ្នាពីរទៀត រវាងសភាពាណិជ្ជកម្មកម្ពុជា និងសភាពាណិជ្ជកម្មម៉ាឡេស៊ី ព្រមទាំងអញ្ជើញធ្វើសន្និសិទ្ធសារព័ត៌​មាន​រួមគ្នា ផងដែរ។ សម្ដេចធិបតី ក៏នឹងអញ្ជើញជាអធិបតីក្នុងវេទិកាធុរកិច្ចកម្ពុជា-ម៉ាឡេស៊ី ឆ្នាំ២០២៤ ផងដែរ។

គួរបញ្ជាក់ថា នៅវេលាម៉ោង ៧ព្រឹកថ្ងៃទី២៧ ខែកុម្ភៈ ឆ្នាំ២០២៤នេះ សម្តេចធិបតី ហ៊ុន ម៉ាណែត បានដឹកនាំគណៈប្រតិភូ អញ្ជើញ​បំពេញទស្សនកិច្ចផ្លូវការនៅប្រទេសម៉ាឡេស៊ី។ ដំណើរទស្សនកិច្ចនេះ​តបតាមការអញ្ជើញរបស់លោក ដាតុ ស៊ី អាន់វ៉ា ប៊ីន អ៉ីប្រាហ៉ីម (YB Dato’ Seri Anwar Bin Ibrahim) នាយករដ្ឋមន្ត្រីម៉ាឡេស៊ី។ សម្តេចធិបតី នឹងដឹកនាំគណៈប្រតិភូជាន់ខ្ពស់របស់កម្ពុជា ធ្វើមាតុភូមិនិវត្តន៍មកកាន់ព្រះរាជាណាកម្ពុជា នៅយប់ថ្ងៃទី២៧ ខែកុម្ភៈ ឆ្នាំ២០២៤ នេះវិញ៕