សម្តេចធិបតី បានអញ្ជើញដាក់កម្រងផ្កានៅចំពោះយុទ្ធជនពលីនៃកងទ័ពសាធារណរដ្ឋកូរ៉េ

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងគណៈប្រតិភូជាន់ខ្ពស់រាជរដ្ឋា ភិបាលកម្ពុជា នៅព្រឹកថ្ងៃទី១៦ ខែឧសភា ឆ្នាំ២០២៤ បានអញ្ជើញដាក់កម្រងផ្កានៅចំពោះយុទ្ធជនពលី នៃកងទ័ពសាធារណរដ្ឋកូរ៉េ ក្នុងរដ្ឋធានីសេអ៊ូល។

នៅក្នុងពិធីគោរពវិញ្ញាណក្ខន្ធផ្លូវការនោះដែរ សម្តេចធិបតីនាយករដ្ឋមន្ត្រី បានអញ្ជើញចុះហត្ថលេខាលើសៀវភៅក្រាំងមាស នៃការចូលរួមរំលែកទុក្ខ ចំពោះយុទ្ធជនពលីនៃកងទ័ពសាធារណរដ្ឋកូរ៉េ។

សូមជម្រាបថា នេះគឺជាថ្ងៃទី​២ហើយ ដែលថ្នាក់ដឹកនាំកម្ពុជាកំពុងមានវត្តមាននៅទឹកដីកូរ៉េខាងត្បូង ដើម្បីបំពេញទស្សនកិច្ចជាផ្លូវការចាប់ពីថ្ងៃទី ១៥-១៨ ខែឧសភា តបតាមការអញ្ជើញរបស់ប្រធានាធិបតីនៃសាធារណរដ្ឋកូរ៉េលោក យូន សកយ៉ល (Yoon Suk Yeol )។

ក្នុងដំណើរទស្សនកិច្ចនេះ សម្តេចធិបតី នឹងមានជំនួបទ្វេភាគីជាមួយប្រធានាធិបតីកូរ៉េ ដើម្បីពិភាក្សាស៊ីជម្រៅ និងភាពជាដៃគូ និងពង្រីកទំនាក់ទំនងរវាងប្រទេសទាំងពីរលើពហុវិស័យ ដើម្បីជំរុញនូវការលើកកម្ពស់ទំនាក់ទំនងនៃប្រទេសទាំងពីរឱ្យឈានទៅដល់កម្រិតថ្មី៕