រូបសំណាកសេះសមុទ្រទាក់ទាញទេសចរណ៍កាន់តែច្រើន

នាថ្ងៃទី៤ ខែមិថុនា ឆ្នាំ២០២៤ នេះ លោក សយ ស៊ីណុល ប្រធានមន្ទីរទេសចរណ៍ខេត្តកំពតបានឲ្យដឹងថា ភ្ញៀវទេសចរណ៍ជាតិ និងអន្តរជាតិបានបន្តនាំគ្នាមកលេងលម្ហែកម្សាន្តរូបសំណាកត្រីសេះសមុទ្រនៅក្រុងកំពតកាន់តែច្រើនឡើង។

គួរឱ្យកត់សម្គាល់ បន្ទាប់ពីខេត្តកំពតបានសាងសង់រូបសំណាកសេះសមុទ្របាញ់ទឹករួចរាល់ឃើញថា ភ្ញៀវទេសចរជាតិ និងអន្តរជាតិបានបន្តនាំគ្នាមកទស្សនាលម្ហែកម្សាន្តចាប់ពីបុណ្យចូលឆ្នាំថ្មីប្រពៃណីជាតិខ្មែរកន្លងទៅ។ លោកប្រធានមន្ទីរទេសចរណ៍ខេត្តកំពតបានប្រាប់ឲ្យដឹងថា មកដល់បច្ចុប្បន្នក្នុងមួយសប្តាហ៍ភ្ញៀវទេសចរណ៍ជាតិ និងអន្តរជាតិ ដែលបានបន្តមកទស្សនាក្នុងរង្វង់ ៥ម៉ឺននាក់ នៅខេត្តកំពត។

លោក សយ សុីណុល បន្តឲ្យដឹងថា ជាពិសេសភ្ញៀវទេសចរមកពីបណ្តាខេត្តឆ្ងាយៗ ដែលគេចង់ស្គាល់ ហើយចង់ឃើញផ្ទាល់ភ្នែកនូវរូបសេះសមុទ្របាញ់ទឹកខេត្តកំពត ដែលកំពុងមានការចាប់អារម្មណ៍ទាក់ទាញយ៉ាងខ្លាំងពីសំណាក់មហាជននៅតាមបណ្ដាខេត្តផ្សេងៗផងដែ។

បើតាមប្រធានមន្ទីរទេសចរណ៍បានឱ្យដឹងទៀតថា ជាពិសេសនៅថ្ងៃសៅរ៍ និងថ្ងៃអាទិត្យភ្ញៀវទេសចរណ៍ជាតិ និងអន្តរជាតិមកលេងទស្សនាលម្ហែកម្សាន្តច្រើន ទោះបីមានអាកាសធាតុក្តៅយ៉ាងណានោះ លោកសង្កេតឃើញភ្ញៀវទេសចរណ៍នៅតែបន្តធ្វើដំណើរមកពីបណ្ដាខេត្តឆ្ងាយៗ ជាពិសេសមកពីរាជធានីភ្នំពេញបានធ្វើដំណើរមកកាន់ខេត្តកំពត ដើម្បីទស្សនា ផ្តិតយករូបភាព នៅតាមបណ្តារមណីយដ្ឋាននានា ពិសេសមកទស្សនារូបសេះសមុទ្របាញ់ទឹក ដែលស្ថិតត្រង់ចំណុចមុខសាលាខេត្តកំពតចាស់។

គោលដៅទេសចរណ៍នៅក្នុងខេត្តកំពត មាន៣៩កន្លែង ដូចជាភ្នំបូកគោ តំបន់ទេសចរណ៍ណាតាយ៉ា រមណីយដ្ឋានទឹកឈូ ឬសហគមន៍ត្រពាំងសង្កែ និងតាមបណ្តាតំបន់ទេសចរណ៍ជាច្រើនទៀត ប៉ុន្តែអំឡុងពេលនេះ មហាជនបែរជាសំរុកទៅលម្ហែ ផ្តិតយករូបភាពដ៏ស្រស់ត្រកាលគ្មានពីរ នៃរូបសំណាកសេះសមុទ្របាញ់ទឹក នៅមុខសាលាខេត្តកំពតទៅវិញ។

ជាមួយគ្នានោះដែរលោកប្រធានមន្ទីទេសចរណ៍ខេត្តកំពតបានបញ្ជាក់ប្រាប់ឲ្យដឹងថា ភ្ញៀវទេសចរណ៍ជាតិ​ និងអន្តរជាតិបានមកលេងលម្ហែកម្សាន្ត ក្នុងរង្វង់ ៥ មុីននាក់ បានថតផ្ដិតរូបភាពអនុស្សាវរីយ៍នៅ ទីតាំងរូបសំណាកត្រីសេះសមុទ្របាញ់ទឹកប្រមាណជាង ១ម៉ឺននាក់ បន្ទាប់ពីមានរូបសំណាកសេះសមុទ្រនៅក្រុងកំពត ខេត្តកំពត ក្នុងមួយសប្តាហ៍មានភ្ញៀវចន្លោះ ២ មុីននាក់ទៅ ៣មុីននាក់  ដោយបច្ចុប្បន្នរដ្ឋបាលខេត្តកំពត បាននិងកំពុងខិតខំយកចិត្តទុកដាក់កែលម្អឱ្យមានសោភ័ណភាពដើម្បីបង្កើនសក្តានុពលខេត្តទេសចរណ៍មួយនេះឱ្យលេចធ្លោ ឱ្យកាន់តែរីកចម្រើនបន់ថែមមួយកម្រិតទៀតជាខេត្តគោលដៅទេសចរណ៍នៅជាប់មាត់សមុទ្រ៕

អត្ថបទ៖ សឹង រ៉ាត់