ព័ត៌មានជាតិ

ផ្ដន្ទាទោសឃាតកសរសៃប្រសាទ អារ.ក សម្លាប់ម្ដាយបង្កើតដាក់ពន្ធនាគារ៣០ឆ្នាំ

បានផុស

៣ years មុន

នៅ

ថ្ងៃពុធ ៣ មីនា ២០២១

ដោយ

ប្រភពព័ត៌មានពីសាលាដំបូងរាជធានីភ្នំពេញ បានឲ្យដឹងនៅព្រឹកថ្ងៃទី០៣ ខែមិនា ឆ្នាំ២០២១នេះថា សំណុំរឿងក្ដីឃាតកម្មដោយអំពើឃោរឃៅ អារក. សម្លាប់ម្ដាយបង្កើតដោយកាត់ផ្ដាច់ក្បាលពីដងខ្លួន ត្រូវបានលោកចៅក្រម កុល កំពួល ប្រកាសសាលក្រមសម្រេចផ្ដន្ទាទោសជនដៃដល់ដាក់ពន្ធនាគារកំណត់៣០ឆ្នាំ ក្រោមការចោទប្រកាន់ពីបទ « ឃាតកម្មដោយអំពើឃោរឃៅ ដោយមរណភាពនៃជនរងគ្រោះ »។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជនដៃដល់ជាឃាតក ដែលតុលាការផ្ដន្ទាទោសឈ្មោះ អ៊ាម សំណាង ភេទប្រុស អាយុ៣៣ឆ្នាំ ជាបុគ្គលិកក្រុមហ៊ុនលក់ម៉ូតូហុងដា មានលំនៅឋានផ្ទះជួលក្នុងសង្កាត់ចោមចៅ ខណ្ឌពោធិ៍សាត់ជ័យ។

លោក ជា សុវណ្ណ អធិការរងទទួលបន្ទុកកិច្ចការព្រហ្មទណ្ឌ បានរាយការជូនតុលាការក្នុងសវនាការថា នៅវេលាល្ងាចថ្ងៃទី ២៨សីហា ឆ្នាំ២០២០ លោកបានទទួលព័ត៌មានថា មានអំពើឃាតកម្មនៅក្នុងភូមិចោមចៅ ។ បន្ទាប់មកលោកដឹកនាំកម្លាំងសមត្ថកិច្ចមូលដ្ឋានចុះទៅដល់កន្លែងកើតហេតុ ក៏បានឃើញសពស្ត្រីចំណាស់ម្នាក់ ត្រូវគេសម្លាប់កាត់ក្បាលផ្ដាច់ចេញពីដងខ្លួននៅមុខបន្ទប់ផ្ទះជួល និងកូនកាំបិតចុងស្រួចមួយនៅក្បែរសពសព។ ភ្លាមនោះសមត្ថកិច្ចបានប្រមូលព័ត៌មាននៅជុំវិញកន្លែងកើតហេតុទើបដឹងថា ជនរងគ្រោះដែលស្លាប់ឈ្មោះ ហាក់ សីហា អាយុ៦៥ឆ្នាំ ជាអ្នករស់នៅខេត្តកំពង់ចាម ដែលទើបឡើងមកយកកូនប្រុសរបស់គាត់ទៅព្យាបាលជំងឺសរសៃប្រសាទ។ លោក ជា សុវណ្ណ បានបន្តថា ក្រោយទទួលបានព័ត៌មានកម្លាំងសមត្ថកិច្ចក៏ចាប់ស្វែងរកជនដៃដល់ ហើយក្រោយមកក៏ប្រទះឃើញឈ្មោះ អ៊ាម សំណាង ស្លៀកក្រមាឈរក្រោមដើមឈើ មានប្រឡាក់ឈាមនៅដៃ ពេលនោះសមត្ថកិច្ចក៏ចាប់ខ្លួនមកភ្លាម និងប្រមូលព័ត៌មានលំអិតនៅកន្លែងកើតហេតុ ទើបដឹងថា ជនដៃដល់ជាកូនបង្កើតជនរងគ្រោះ មានជំងឺសរសៃប្រសាទប្រចាំកាយ។

សមត្ថកិច្ចបញ្ជាក់ថា នៅល្ងាចថ្ងៃកើតហេតុ ជនគ្រោះ បានរៀបចំអីវ៉ាន់ដើម្បីនាំកូនទៅស្រុកកំណើតវិញ ហើយពេលនោះជនដៃដល់ដូចជាឡប់សតិ ដើរស្រាតពេញផ្ទះជួលជាហេតុធ្វើឲ្យគេគ្រប់គ្នាខ្លាចមានហ៊ាននៅក្បែរ។ ចំណែកម្ដាយចេះតែចាប់រាំងកូនមិនឲ្យចេញក្រៅទាំងស្រាតននលគក ពេលនោះស្រាប់តែជនដៃដល់បានទាត់ម្ដាយបង្កើត៣ជើងចំដើមទ្រូងដួលសន្លប់ស្ដូក។ បន្ទាប់មកជនដៃដល់ បានយកកូនកាំបិតចុងស្រួចមកអារក. ម្ដាយកាត់ក្បាលផ្ដាច់ពីក ហើយក៏រត់ចេញពីភូមិមកឈរលើទួលមួយរហូតដល់ប៉ូលិសតាមមកឃើញ។ នៅក្នុងសវនាការ ជនដៃដល់បានសារភាពម្ដងខុស ម្ដងត្រូវថា ខ្លួនមានជំងឺសរសៃប្រសាទយូរមកហើយនិងបានទទួលការព្យាបាលពីមន្ទីរពេទ្យរូស្ស៉ី ហើយនៅថ្ងៃកើតហេតុនោះ ខ្លួនឃើញម្ដាយបង្កើតដូចជាខ្មោចហើយក៏សម្លាប់គាត់ទៅ។

មេធាវីការពារផ្លូវច្បាប់ឲ្យជនដៃដល់ស្នើឲ្យតុលាការពិនិត្យលើស្ថានភាពជំងឺផ្លូវចិត្តរបស់ឃាតក បើមានការបញ្ជាក់ពីគ្រូពេទ្យជំនាញច្បាស់លាស់ គប្បីតុលាការលើកលែងចោទនិងដោះលែងជនដៃដល់ឲ្យរួចពីការឃុំឃាំង។ លោក សំ រិទ្ធីវាសនា ជាតំណាងអយ្យការ បានស្នើឲ្យតុលាការសម្រេចតាមច្បាប់ ហើយពេលនេះតុលាការបានសម្រេចផ្ដន្ទាទោសជនដៃដល់ដាក់ពន្ធនាគារកំណត់៣០ឆ្នាំ ដោយសារជនដៃដល់គ្មានលិខិតបញ្ជាក់ពីគ្រូពេទ្យជំនាញអំពីរោគសរសៃប្រសាទនោះទេ គឺជនត្រូវចោទនិយាយតែមាត់៕

អត្ថបទ៖ មករា

សូមចុចអាន៖ ផ្ដន្ទាទោសបុរសវ័យចំណាស់២នាក់ដែលប្រមាថព្រះមហាក្សត្រ ដាក់ពន្ធនាគារ៣ឆ្នាំតែអនុវត្តទណ្ឌកម្ម១ឆ្នាំ