លោកបណ្ឌិត យង់ ពៅ ស្នើក្រសួង ស្ថាប័ន និងភាគីពាក់ព័ន្ធ ជំរុញការប្រើប្រាស់ភាសាខ្មែរ ឱ្យត្រឹមត្រូវតាមអក្ខរាវិរុទ្ធ

លោកបណ្ឌិត យង់ ពៅ អគ្គលេខាធិការនៃរាជបណ្ឌិតសភាកម្ពុជា បានស្នើឱ្យក្រសួង ស្ថាប័ន និងភាគីពាក់ព័ន្ធទាំងអស់ ត្រូវតែចូលរួមចំណែកនៅក្នុងការជំរុញការប្រើប្រាស់ភាសាខ្មែរឱ្យត្រឹមត្រូវតាមអក្ខរាវិរុទ្ធ។

ការស្នើនេះ ធ្វើឡើងនៅក្នុងសិក្ខាសាលាស្ដីពី ភាសាវិទ្យានិងភាសាខ្មែរនៅក្នុងយុគសម័យបញ្ញាសិប្បនិម្មិត លើកទី១ នាព្រឹកថ្ងៃទី២៩ ខែសីហា ឆ្នាំ២០២៤។ លោកអគ្គលេខាធិការ បានបញ្ជាក់ថា ការអភិរក្ស និងអភិវឌ្ឍភាសាវិទ្យា និងអក្សរសាស្ត្រខ្មែរ ត្រូវដើរទន្ទឹមគ្នា ដើម្បីរក្សាអត្តសញ្ញាណជាតិខ្មែរផង និងដើម្បីឆ្លើយតបទៅនឹងការវិវត្តនៃសង្គមជាតិផង។

ជាមួយគ្នានោះ លោកបណ្ឌិតចង់ឱ្យសាលាអន្តរជាតិទាំងអស់នៅក្នុងប្រទេសកម្ពុជា ដាក់បញ្ចូលកម្មវិធីសិក្សាភាសាខ្មែរ នៅក្នុងការបណ្ដុះបណ្ដាលរបស់ខ្លួនផងដែរ។ លោកថា ភាសាពិតជាមានសារៈសំខាន់ ព្រោះបានចារឹកអំពីឥរិយាបថជាតិសាសន៍និងវប្បធម៌ ក៏ដូចជាឫសគល់នៃជាតិសាសន៍នីមួយៗ។ បន្ថែមពីនេះ លោកបណ្ឌិតថា រដ្ឋគួរតែបង្កើតឱ្យមានការប្រឡងអក្សរផ្ចង់ខ្មែរឡើងវិញ ដើម្បីលើកតម្កើងតម្លៃអក្សរសាស្ត្រជាតិ៕