ក្រសួងអប់រំគាំទ្រ សាលាសហការ និងសាលាស្តង់ដាមធ្យមសិក្សា របស់គរុនិស្សិតកម្រិតឧត្តម

បណ្ឌិត ឌី ខាំបូលី ប្រធានគណៈកម្មាធិការកំណែទម្រង់ នៃវិទ្យាស្ថានជាតិអប់រំ នៃក្រសួងអប់រំ យុវជន និងកីឡា បានចូលលរួមជាអធិបតីភាព ក្នុងកិច្ចប្រជុំស្ដីពី “ការចុះគាំទ្រសាលាសហការ និងសាលាអនុវត្តលើការអនុវត្តស្តង់ដាសាលាមធ្យមសិក្សាសាធារណៈគំរូ របស់គរុនិស្សិតកម្រិតឧត្តម (បរិញ្ញាបត្រ+២)” នៅវិទ្យាស្ថានជាតិអប់រំ។ កិច្ចប្រជុំនេះមានគោលបំណង ផ្សព្វផ្សាយពី សមាសភាព ផែនការ និងយន្តការ នៃការចុះគាំទ្រសាលាសហការ និងសាលាអនុវត្តលើការអនុវត្តស្តង់ដាសាលាមធ្យមសិក្សាសាធារណៈគំរូ របស់គរុនិស្សិតកម្រិតឧត្តម (បរិញ្ញាបត្រ+២) លើស្តង់ដាទី២ នៅតាមវិទ្យាល័យសហការនានាក្នុងរាជធានីភ្នំពេញ និងខេត្តកណ្ដាល។

បណ្ឌិត ឌី ខាំបូលី បានបង្ហាញអំពីសារបាន សារៈសំខាន់ និងហេតុផល ដែលតម្រូវឱ្យគរុនិស្សិត (បរិញ្ញាបត្រ+២) នៃវិទ្យាស្ថានជាតិអប់រំ ចុះគាំទ្រការអនុវត្តស្តង់ដាសាលារៀនគំរូ ដែលឆ្លើយតបទៅនឹងគោលនយោបាយរបស់ ក្រសួងអប់រំ យុវជន និងកីឡា។

បណ្ឌិតប្រធានអង្គប្រជុំ បានផ្តល់វេទិកាពិភាក្សា និងសម្រេចបាននូវលទ្ធផលដូចខាងក្រោម៖ ១. សាលារៀនត្រូវរៀបចំលិខិតបង្គាប់ការដល់បុគ្គលិកអប់រំ និងគ្រូបង្រៀនតាមវិទ្យាល័យនីមួយៗសម្រាប់អនុវត្តស្តង់ដាសាលារៀនគំរូ ២. ក្រុមការងារត្រូវពិនិត្យបណ្ណព័ត៌មានសាលារៀន (School profile) ស្វ័យវាយតម្លៃ និងការវាយតម្លៃរបស់នាយកដ្ឋានអធិការកិច្ចគុណភាពអប់រំ ៣. រៀបចំទិន្នន័យពិន្ទុដើមគ្រា ៤. ធ្វើផែនការបង្រៀន ១ឆ្នាំ ៣ខែ និងធ្វើផែនការរៀនរបស់សិស្ស ៥. គ្រូបង្រៀន និងគរុនិស្សិតត្រូវរៀបចំកិច្ចព្រមព្រៀងសមិទ្ធកម្មការងារ ៦. អនុវត្តតេស្តស្តង់ដា ៧. បង្វឹកនៅនឹងកន្លែង ឬតាមប្រព័ន្ធអនឡាញលើឯកទេស វិធីសាស្រ្តបង្រៀន ការធ្វើពិសោធន៍វិទ្យាសាស្រ្ត ការអប់រំស្ទែមការងារគម្រោង ការអនុវត្តសកម្មភាពក្រៅម៉ោងសិក្សា ក្លិបសិក្សា កិច្ចការគម្រោង និងការតាំងពិព័រណ៍វិទ្យាសាស្រ្ត ៨. បំប៉នសិស្សខ្សោយ និងសិស្សពូកែ ៩. រៀបចំថ្នាក់និទស្សន៍តាមមុខវិជ្ជា និង ១០. ធ្វើរបាយការសមិទ្ធកម្មជាប្រចាំ។

ក្រសួងអប់រំ យុវជន និងកីឡា បានផ្ដោតយកចិត្តទុកដាក់យ៉ាងខ្លាំងលើគុណភាព នៃការបណ្ដុះបណ្ដាលគ្រូបង្រៀន និងការផ្សារភ្ជាប់ការបណ្ដុះបណ្ដាលជាមួយនឹងការអនុវត្តស្តង់ដាសាលារៀនគំរូនៅតាមគ្រឹះស្ថានសិក្សាចំណេះទូទៅទូទាំងប្រទេស ដើម្បីលើកកម្ពស់គុណភាពនៃការអប់រំ ជាពិសេសលទ្ធផលសិក្សារបស់សិស្ស។

គួរបញ្ជាក់ថា កិច្ចប្រជុំនេះ រៀបចំនៅថ្ងៃទី១១ ខែកញ្ញា ឆ្នាំ​២០២៤ ដោយមានការចូលរួមពី មន្ទីរអប់រំ យុវជន និងកីឡា និងការិយាល័យមធ្យមសិក្សាចំណេះទូទៅ នៃមន្ទីរអប់រំ យុវជន និងកីឡារាជធានីភ្នំពេញ និងខេត្តកណ្តាល គណៈគ្រប់គ្រង បុគ្គលិកអប់រំ និងគ្រូបង្រៀន នៃវិទ្យាល័យចំនួន១៣ ក្នុងរាជធានីភ្នំពេញ និងចំនួន១ ក្នុងខេត្តកណ្តាល គណៈគ្រប់គ្រង បុគ្គលិកអប់រំ និងគ្រូទ្ទេស នៃវិទ្យាស្ថានជាតិអប់រំ សរុបចំនួន ១៥០រូប៕