ព័ត៌មានជាតិ

អភិបាលខណ្ឌ ៧ មករា ប្រជុំពង្រឹង និងជំរុញមន្ត្រីតាមច្រកចេញចូលតែមួយ បម្រើពលរដ្ឋឲ្យមានតម្លាភាព

បានផុស

២ years មុន

នៅ

ថ្ងៃអង្គារ ២៤ ធ្នូ ២០២៤

ដោយ

រដ្ឋបាលខណ្ឌ ៧ មករា ក្រោមការដឹកនាំរបស់ លោក ថេង សុថុល អភិបាលខណ្ឌ ៧ មករា និងជាប្រធានគណៈបញ្ជាការឯកភាពខណ្ឌ តែងតែជំរុញដាក់ផែនការឲ្យមន្ត្រីជំនាញគ្រប់ការិយាល័យ បម្រើប្រជាពលរដ្ឋឲ្យបានល្អប្រសើរ លឿនរហ័ស ទាន់ពេលវេលា តាមតម្រូវស្នើសុំរបស់ពលរដ្ឋ តាមជំនាញនីមួយៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីរសៀលថ្ងៃទី ២៣ ខែធ្នូ ឆ្នាំ ២០២៤ ម្សិលមិញ រដ្ឋបាលខណ្ឌ ៧ មករា លោក ថេង សុថុល បានដឹកនាំប្រជុំពង្រឹងការងារផ្ដល់សេវាសាធារណៈជូនប្រជាពលរដ្ឋតាមការិយាល័យច្រកចេញចូលតែមួយខណ្ឌ និងយន្តការច្រកចេញចូលតែមួយតាមបណ្ដាសង្កាត់ ការប្រើប្រាស់បង្កាន់ដៃ និងឆ្លុះបញ្ចាំងលើលទ្ធផល នៃការចុះធ្វើអធិការកិច្ចរបស់ក្រសួងអធិការកិច្ច។

លោក ថេង សុថុល លើកឡើងថា លោកតែងតែចុះត្រួតពិនិត្យមើលតាមការិយាល័យច្រកចេញចូលតែមួយខណ្ឌ និងយន្តការច្រកចេញចូលតែមួយតាមបណ្ដាសង្កាត់ និងណែនាំឲ្យមន្ត្រី យកចិត្តទុកដាក់ក្នុងការផ្តល់សេវាសាធារណៈជូនប្រជាពលរដ្ឋឲ្យបានឆាប់រហ័សទាន់ចិត្ត ទាន់ពេលវេលា និងមានតម្លាភាព។

លោកអភិបាលបន្ថែមទៀតថា កន្លងមករហូតបច្ចុប្បន្ននេះ លោកតែងតែឆ្លៀតពេលពីការងារចាំបាច់ផ្សេងៗ ចុះហត្ថលេខាដោយផ្ទាល់លើឯកសារនីត្យានុកូលកម្មជូនប្រជាពលរដ្ឋ ទោះក្នុងកាលៈទេសៈមមាញឹកយ៉ាងណាក្តី ក៏នៅតែបម្រើពលរដ្ឋក្នុងមូលដ្ឋានឲ្យបានល្អប្រសើរ។

ជាចុងក្រោយរដ្ឋបាលខណ្ឌ ក៏បានសំណូមពរដល់ប្រជាពលរដ្ឋចូលរួមសហការជាមួយអាជ្ញាធរ ផ្ដល់ព័ត៌មានពីបញ្ហាសន្តិសុខសណ្ដាប់ធ្នាប់សាធារណៈ ដើម្បីឲ្យអាជ្ញាធរមានសមត្ថកិច្ចជួយអន្តរាគមន៍បានទាន់ពេលវេលា ជាពិសេសបញ្ហាការផ្ដល់សេវាសាធារណៈសូមឲ្យពលរដ្ឋមកទទួលសេវាដោយផ្ទាល់ កុំប្រើប្រាស់សេវាលើអ្នករត់ការ នាំឲ្យខាតបង់ថវិកា និងពេលវេលា៕

អត្ថបទ ៖ សុភា