ប ស ស នឹងបើកយុទ្ធនាការចុះអធិការកិច្ចនៅតាមសហគ្រាសគ្រឹះស្ថានទូទាំងប្រទេសនៅដើមខែក្រោយ

បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្តុះបណ្តាលវិជ្ជាជីវៈ នឹងចាប់ផ្តើមយុទ្ធនាការចុះអធិការកិច្ចនៅតាមសហគ្រាស គ្រឹះស្ថានទូទាំងប្រទេសចាប់ពីថ្ងៃទី១ ខែកុម្ភៈ ឆ្នាំ២០២៥នេះតទៅ ដើម្បីពង្រីកវិសាលភាពនៃការគ្របដណ្តប់សមាជិក ប.ស.ស.ឱ្យកាន់តែទូលំទូលាយ សំដៅធានាឱ្យបាននូវសុខុមាលភាព និងអត្ថប្រយោជន៍នៃរបបសន្តិសុខសង្គមដល់កម្មករនិយោជិតគ្រប់រូប ជាពិសេសធានាឱ្យបាននូវនិរន្តរភាពមូលនិធិ សន្តិសុខសង្គម។

នៅក្នុងសេចក្តីជូនដំណឹងមួយចុះផ្សាយកាលពីថ្ងៃទី១៤មករា លោក ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គមបានឱ្យដឹងថា «ក្នុងន័យនេះ ប.ស.ស. សូមជូនដំណឹងដល់ លោក/លោកស្រី ជាម្ចាស់សហគ្រាស គ្រឹះស្ថាន ឬអ្នកតំណាងទាំងអស់ត្រូវអនុវត្តឱ្យបានត្រឹមត្រូវតាមច្បាប់ស្តីពីរបបសន្តិសុខសង្គម និងលិខិតបទដ្ឋានពាក់ព័ន្ធនានា»។

លោកបានបន្តថា ក្នុងករណី ប.ស.ស. រកឃើញថា ម្ចាស់សហគ្រាស គ្រឹះស្ថាន ឬអ្នកតំណាង មិនអនុវត្តកាតព្វកិច្ចបង់ភាគទានតាមកាលកំណត់ ឬប្រកាសប្រាក់ឈ្នួលជាប់ភាគទានមិនត្រឹមត្រូវ ឬមិនអនុវត្តកាតព្វកិច្ចរាយការណ៍អំពី
ចំនួនកម្មករនិយោជិតឱ្យបានត្រឹមត្រូវ ឬការដកយកភាគទានមិនអនុលោមតាមបទប្បញ្ញត្តិនៃច្បាប់ស្តីពីរបបសន្តិសុខសង្គម ប.ស.ស. នឹងចាត់វិធានការតាមផ្លូវច្បាប់ជាធរមាន។

លោកបានបន្តទៀតថា សូមម្ចាស់សហគ្រាសគ្រឹះស្ថាន ឬអ្នកតំណាង ទាំងអស់ចូលរួម សហការ និងត្រូវអនុវត្តតាមច្បាប់ស្តីពីរបបសន្តិសុខសង្គម និងលិខិតបទដ្ឋានគតិយុត្តពាក់ព័ន្ធប្រកបដោយស្មារតី ទទួលខុសត្រូវខ្ពស់៕

អត្ថបទ៖ សំអឿន