ព័ត៌មានជាតិ

ខេត្តស្វាយរៀង មានសណ្ឋាគារបើកដំណើរការ ៣៨ កន្លែង ប្រមូលផ្តុំភាគច្រើននៅក្រុងស្វាយរៀង និងក្រុងបាវិត

បានផុស

១ year មុន

នៅ

ថ្ងៃអង្គារ ២១ មករា ២០២៥

ដោយ

ខេត្តស្វាយរៀង ដែលជាខេត្តសេដ្ឋកិច្ចដ៏ធំមួយបានក្លាយជាគោលដៅសម្រាប់ការវិនិយោគ និងការធ្វើពាណិជ្ជកម្ម ខណៈដែលខេត្តជាប់ព្រំដែនវៀតណាមនេះមានតំបន់សេដ្ឋកិច្ចពិសេស ៩ កន្លែងកំពុងបើកដំណើរការ ជាមួយសហគ្រាសរោងចក្ររាប់រយកន្លែង។

ជាមួយសក្ដានុពលសេដ្ឋកិច្ចដ៏ធំ ខេត្តស្វាយរៀងក៏មានការវិនិយោគផ្នែកសេវាកម្មស្នាក់នៅ ហើយបើតាមមន្ទីរទេសចរណ៍ខេត្តបានបង្ហាញថា ខេត្តស្វាយរៀងបច្ចុប្បន្នមានសណ្ឋាគារចំនួន ៣៨ កន្លែងរួមទាំងផ្ទះភ្ញៀវមានចំនួន ៨៣ កន្លែងកំពុងបើកអាជីវកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សណ្ឋាគារនិងផ្ទះភ្ញៀវភាគច្រើនប្រមូលផ្តុំនៅតំបន់ប្រជុំជនសំខាន់ចំនួនពីរ គឺនៅក្រុងស្វាយរៀង និងក្រុងបាវិត ដែលជាច្រកព្រំដែនចេញចូលជាមួយប្រទេសវៀតណាម។

ក្រៅពីសេវាកម្មស្នាក់នៅ ខេត្តក៏មានអាជីវកម្មទេសចរណ៍កំពុងបើកដំណើរការរួមមានភោជនីយដ្ឋាន និងអាហារដ្ឋានមានចំនួន ៩៨ កន្លែង អាជីវកម្មម៉ាស្សា និងស៉្បាមានចំនួន ៣៩ កន្លែង អាជីវកម្មខារ៉ាអូខេមានចំនួន ៤១ កន្លែង អាជីវកម្មរង្គសាល និងឌីស្កូតែកមានចំនួន ០៧ កន្លែង អាជីវកម្មបៀហ្គាឌិនមានចំនួន ២ កន្លែង រួមទាំងអាជីវកម្មកីឡាហែលទឹកមានចំនួន ០៣ កន្លែង។

ភូមិសាស្រ្តខេត្តស្វាយរៀង ចែកចេញជា ២ ក្រុង ៦ ស្រុក ៦៨ ឃុំ ១២ សង្កាត់ និង ៦៩០ ភូមិ មានប្រជាពលរដ្ឋរស់នៅសរុបចំនួន ៦៧៤ ៦៣៥ នាក់ ស្មើនឹង ១៦០ ៦១១ គ្រួសារ។ សេដ្ឋកិច្ចខេត្តមានទំហំប្រមាណ ១.០៧៤,៥ លានដុល្លារអាមេរិក ស្មើនឹង ៤% នៃសេដ្ឋកិច្ចជាតិ។ នេះបើតាមរបាយការណ៍របស់រដ្ឋបាលខេត្តគិតត្រឹមឆ្នាំ ២០២២។

ក្នុងនោះការចូលរួមចំណែកពីវិស័យកសិកម្មមានប្រមាណ ៤៣,៧៦% វិស័យឧស្សាហកម្ម ៣៨,១២% និង វិស័យសេវាកម្ម ១៨,១២%។ ចំណូលសម្រាប់មនុស្សម្នាក់មានប្រមាណ ១.៥៩៤.៩ ដុល្លាអាមេរិក។

ខេត្តស្វាយរៀងមានតំបន់សេដ្ឋកិច្ចពិសេសចំនួន៩ កន្លែង កំពុងដំណើរការជាមួយរោងចក្រ សហគ្រាស ក្រុមហ៊ុនសរុប ២៧៦ កន្លែង និងបានបង្កើតការងារជូនប្រជាពលរដ្ឋបានចំនួនប្រមាណ ៨៩ ៧៧០ នាក់៕