ប្រមុខការពារជាតិវាយតម្លៃចំពោះកិច្ចសហប្រតិបត្តិការរវាងសមាគមអតីតយុទ្ធជនកម្ពុជា និងថៃ

ប្រមុខការពារជាតិកម្ពុជា នាយឧត្តមសេនីយ៍ ទៀ សីហា បានវាយតម្លៃខ្ពស់ចំពោះកិច្ចសហប្រតិបត្តិការល្អរវាងសមាគមអតីតយុទ្ធជនកម្ពុជា ជាមួយនឹងភាគីអង្គការ​អតីតយុទ្ធជនសង្គ្រាមថៃ ដែលស្ថាប័នទាំងពីរនេះ មានគោលបំណងដូចគ្នា គឺការមើលថែរក្សាអតីតយុទ្ធជន និងគ្រួសារអតីតយុទ្ធជន។

ការវាយតម្លៃរបស់ប្រមុខការពារជាតិកម្ពុជា បានធ្វើឡើងនាថ្ងៃទី១២ ខែកុម្ភៈ ឆ្នាំ២០២៥​ ក្នុងឱកាសទទួលជួបនាយឧត្តមសេនីយ៍ ដេតនិធិត លឿងងាមខាំ (DETNITIT LUANG​NGAM​KUM)​ ​ប្រធាន​អង្គការ​អតីតយុទ្ធជនសង្គ្រាមថៃ និងសហការី ចូលជួបសម្តែងការគួរសមនៅទីស្តីការក្រសួងការពារជាតិ ក្នុងពេលមកបំពេញទស្សនកិច្ចនៅកម្ពុជា។

លោកនាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ បានស្វាគមន៍ចំពោះទស្សនកិច្ចរប​ស់ប្រតិភូអង្គការអតីតយុវជនសង្គ្រាមថៃ នៅកម្ពុជានាពេលនេះ ដោយបានជួបពិភាក្សាការងាររវាងអង្គការអតីតយុវជនសង្គ្រាមថៃ ជាមួយនឹងនាយឧត្តមសេនីយ៍ គន់ គីម អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា។ លោកឧបនាយករដ្ឋមន្ត្រី បានចាត់ទុកថា នេះគឺជាការពង្រឹងពង្រីកបន្ថែមទៀតនូវការរឹតចំណងមិត្តភាព និងកិច្ចសហប្រតិបត្តិការកាន់តែប្រសើរឡើងរវាងសមាគមអតីតយុទ្ធជនទាំងពីរ ពិសេសនៅលើវិស័យការពារជាតិនៃប្រទេសទាំងពីរ កម្ពុជា និងថៃ។ 

នាយឧត្តមសេនីយ៍ ដេតនិធិត លឿងងាមខាំ (DETNITIT LUANGNGAMKUM) ប្រធានអង្គការអង្គការអតីតយុវជនសង្គ្រាមថៃ បានជម្រាបជូននាយឧត្តមសេនីយ៍ ឧបនាយករដ្ឋមន្ត្រី ថា កន្លងមកលោកធ្លាប់បានជួបពិភាក្សាផ្លាស់ប្តូរបទពិសោធជាមួយនឹងសមាគមអតីតយុទ្ធជនកម្ពុជា ហ្វីលីពីន វៀតណាម ហើយក៏បានជួបពិភាក្សាជាមួយនឹងនាយឧត្តមសេនីយ៍ គន់ គីម ផងដែរ ក្នុងឱកាសបំពេញទស្សនកិច្ចនៅប្រទេសថៃ។ គោលបំណងរបស់សមាគមអតីតយុទ្ធជនកម្ពុជា និងអង្គការអតីតយុទ្ធជនសង្គ្រាមថៃ មានគោលបំណងដូចគ្នា គឺការមើលថែរក្សាអតីតយុទ្ធជន និងគ្រួសារអតីតយុទ្ធជនដែលបានបាត់បង់ប្ដី ប្រពន្ធ ឬកូនជាទីស្រឡាញ់របស់ពួកគាត់។

នាយឧត្តមសនីយ៍ ដេតនិធិត លឿងងាមខាំ បានបន្តថា អង្គការអតីតយុវជនសង្គ្រាមថៃ មាន ៦ចំណុច គឺការមើលថែរក្សាអតីតយុទ្ធជនដូចជា អតីតយុទ្ធជនមានអាយុ៩០ឆ្នាំ ថែរក្សាមើលគាត់ឲ្យបានល្អមានមន្ទីរពេទ្យសម្រាប់ព្យាបាល និងមានកន្លែងធ្វើជើងសិប្បនិម្មិត។ លោក បានបញ្ជាក់ថា ឆ្នាំនេះអង្គការអតីតយុទ្ធជនសង្គ្រាមថៃ ក៏បានគោរពអញ្ជើញអតីតយុទ្ធជនកម្ពុជា និងគ្រួសារអតីតយុទ្ធជន ដែលពិការជើងប្រមាណ៥០នាក់ ទៅប្រទេសថៃ ដើម្បីធ្វើជើងសិប្បនិម្មិតជូនដល់ពួកគាត់ ដែលកម្មវិធីនេះនឹងរៀបចំធ្វើឡើងនៅខេត្ត បូរីរាំ ប្រទេសថៃ នាខែមេសា ឆ្នាំ២០២៥ ខាងមុខ។

ជាកិច្ចឆ្លើយតប នាយឧត្តមសេនីយ៍ ទៀ សីហា បានលើកឡើងថា កន្លងមកនេះអតីតយុទ្ធជនកម្ពុជា ទទួលបានការយកចិត្តទុកដាក់ផងដែរពីសំណាក់ថ្នាក់ដឹកនាំនៃប្រមុខរាជរដ្ឋាភិបាលកម្ពុជា ដោយបានផ្តល់ដីសម្បទានសង្គមកិច្ច ផ្ទះសម្បែង និងសម្ភារៈប្រើប្រាស់មួយចំនួនទៀត។ នាយឧត្តមសេនីយ៍ ទៀ សីហា ក៏បានថ្លែងអំណរគុណ និងកោតសរសើរ ចំពោះអង្គការអតីតយុទ្ធជនសង្គ្រាមថៃ ដែលតែងតែយកចិត្តទុកដាក់ចំពោះសមាគមអតីតយុទ្ធជនកម្ពុជា ទាំងនៅក្នុងវេទិកាអន្តរជាតិ និងទ្វេភាគី ដែលនេះបានបង្ហាញឲ្យឃើញថាជាមិត្តភក្តិដ៏ល្អ និងជាប្រទេសជាប់ភូមិផងរបងជាមួយនឹងគ្នា៕