នាយករដ្ឋមន្ត្រីឱ្យសិទ្ធិរើសគ្រូនិងនាយកសាលាទៅកាន់មន្ទីរអប់រំខេត្ត

នាយករដ្ឋមន្ត្រី សម្ដេចធិបតី ហ៊ុន ម៉ាណែត បញ្ជាឱ្យអភិបាលខេត្ត អភិបាលស្រុក ប្រគល់សិទ្ធិជ្រើសរើសគ្រូ ឬនាយកសាលាទៅកាន់មន្ទីរអប់រំខេត្ត ដើម្បីពង្រឹងគ្រឹះអប់រំឱ្យបានរឹងមាំពីថ្នាក់បឋម។

ថ្លែងក្នុងពិធីបិទសន្និបាតការងារក្រសួងអប់រំ រសៀលថ្ងៃទី២៦ ខែកុម្ភៈ ឆ្នាំ២០២៥នេះ សម្ដេចធិបតី ហ៊ុន ម៉ាណែត បានលើកឡើងថាការអប់រំពីថ្នាក់បឋមគឺជារឿងសំខាន់ដែលមានឥទ្ធិពលដល់ការសិក្សានាពេលអនាគតរបស់សិស្ស។ ដើម្បីតម្រង់ទិសសិស្សឱ្យបានត្រឹមត្រូវការទទួលបានការអប់រំពីថ្នាក់តូចៗគឺសំខាន់ ដែលតម្រូវឱ្យមានការជ្រើសរើសគ្រូមានជំនាញ ដែលចាំបាច់ត្រូវតែចេញពីការជ្រើសរើសដោយមន្ទីរជំនាញក្នុងខេត្ត។

សម្ដេចថា៖​ «ត្រូវប្រគល់សិទ្ធិ អនុវត្តន៍សហការជាមួយនឹងជំនាញព្រោះជួនកាលអភិបាលស្រុកគាត់មិនមានជំនាញទេ! អភិបាលស្រុកខ្លះគាត់អតីតទាហានគាត់ច្បាំងមួយជីវិត យើងមិនមែនមើលស្រាលគាត់ទេ គាត់អាចយល់តែមិនអាចយល់ពីនិយាមនូវជំនាញ។ អភិបាលខេត្ត អភិបាលស្រុក ត្រូវប្រគល់សិទ្ធិដល់មន្ទីរដើម្បីធ្វើការ សុំឱ្យយល់លើកិច្ចការងារនេះ»។

សម្ដេចធិបតីបញ្ជាក់ថាបញ្ហាគ្រូមានគុណភាព និងបរិមាណជាការប្រឈមមួយនាពេលបច្ចុប្បន្ន ហើយការពង្រឹងគុណភាពពីថ្នាក់បឋមទៅគឺជារឿងសំខាន់ដូច្នេះការរើសគ្រូដែលមានគុណសម្បត្តិគឺជារឿងដែលត្រូវគិតគូរសំខាន់៕

អត្ថបទដោយ ហ៊ុន សិរីវឌ្ឍន៍