ព័ត៌មានជាតិ

ករណីលុបព្រៃកោងកាងនៅឃុំទួលគគីរ មានអ្នកចេញមុខទទួលខុសត្រូវហើយ

បានផុស

៣ years មុន

នៅ

ថ្ងៃចន្ទ ២២ មីនា ២០២១

ដោយ

ក្រោយទទួលបានលិខិតបញ្ជាពីរដ្ឋបាលខេត្តកោះកុង នៅថ្ងៃទី២១ ខែមីនា ឆ្នាំ២០២១ លោកស្រី លាង ហ៊ីម ហៅម៉ាហ្គោល បានឯកភាពយកគ្រឿងចក្រមកជីកកាយអាចម៍ដីដែលលោកស្រីបានចាក់ចូលទៅក្នុងចំណីព្រែកនិងព្រៃកោងកាង នៅចំណុចភូមិទួលគគីរក្រោម ឃុំទួលគគីរ ស្រុកមណ្ឌលសីមា ឡើងវិញហើយ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប្រាក់ វិចិត្រ អភិបាលស្រុកមណ្ឌលសីមាបានថ្លែងថា ដីដែលលោកស្រី លាង ហ៊ីម ហៅម៉ាហ្គោល ចាក់បំពានចូលចំណីព្រែក និងព្រៃកោងកាងនោះ គឺមានទំហំជាង៣ពាន់ម៉ែត្រការ៉េ និងបង្កឲ្យមានការខូចខាតព្រៃកោងកាងមួយចំនួន ហេតុនេះរដ្ឋបាលខេត្ត បានចេញលិខិតឲ្យលោកស្រីកាយអាចម៍ដីចេញ និងស្តាព្រៃកោងកាងឡើងវិញ ដោយទុករយៈពេលអនុវត្តត្រឹម១សប្តាហ៍ ហើយចំពោះចំណាត់ផ្លូវច្បាប់យ៉ាងណានោះ គឺទុកឲ្យខាងអយ្យការសាលាដំបូងខេត្តជាចាត់ការបន្ត។

ដោយឡែកលោកស្រី លាង ហ៊ីម ហៅម៉ាហ្គោល បានបញ្ជាក់ថា លោកស្រី ឯកភាពនិងយល់ព្រមអនុវត្តតាមលិខិតបញ្ជារបស់រដ្ឋបាលខេត្តកោះកុង ដោយយល់ព្រមកាយអាចម៍ដីចេញ និងដាំស្តាព្រៃកោងឡើងវិញ តាមការកំណត់របស់រដ្ឋបាលខេត្ត ។

លោកស្រីបានបន្តថា រូបលោកស្រីពុំបានដឹងថាដីខាងលើជាដីសហគមន៍របស់រដ្ឋនោះទេ ពីព្រោះដីនេះលោកស្រីបានទិញពីមេឃុំ ស្មៀនឃុំ និងពលរដ្ឋខ្លះ តែការអះអាងនេះគឺពុំមានលិខិតបញ្ជាក់ទទួលស្គាល់ពីអាជ្ញាធរណាមួយឡើយ ។

ចំពោះ លោក ឃឹម សាណេ អតីតប្រធានសហគមន៍ទួលគគីរ បានលើកឡើងថា ដីតំបន់នេះជាដីការពាររបស់សហគមន៍ ប៉ុន្តែដោយសារលោកស្រី លាង ហ៊ីម ហៅម៉ាហ្គោល បានជួយចាក់ផ្លូវ ធ្វើតារាងបាល់ ដាំបង្គោលភ្លើង និងសន្យាថាតបណ្តាញទឹកអោយពលរដ្ឋក្រីក្រនៅក្នុងភូមិទួលគគីរ ទើបបានជាមានការដោះដូរដីតំបន់ជូនលោកស្រី តែការបែងយ៉ាងណានោះគឺលោកពុំបានដឹងនោះទេ៕

អត្តបទ ៖ សិរីវឌ្ឍៈ