ព័ត៌មានអន្ដរជាតិ

អ៊ីស្រាអែលវាយប្រហារអាកាសយានដ្ឋានសំខាន់របស់យេម៉ែន ដើម្បីសងសឹកក្រុមហ៊ូធី

បានផុស

១ year មុន

នៅ

ថ្ងៃពុធ ៧ ឧសភា ២០២៥

ដោយ

Chheang

អ៊ីស្រាអែល បានធ្វើការវាយប្រហារតាមអាកាសលើអាកាសយានដ្ឋានអន្តរជាតិសាណា របស់ប្រទេសយេម៉ែនកាលពីថ្ងៃទី៦ខែឧសភាឆ្នាំ២០២៥ ដើម្បីជាការឆ្លើយតបទៅនឹងការវាយប្រហារដោយមីស៊ីលបាលិស្ទិករបស់ក្រុមឧទ្ទាមហ៊ូធី ដែលបានបាញ់នៅជិតអាកាសយានដ្ឋាន Ben Gurion របស់អ៊ីស្រាអែលកាលពីពីរថ្ងៃមុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងកម្លាំងការពារអ៊ីស្រាអែល (IDF) បានរាយការណ៍ថា ការវាយប្រហារបានកំណត់គោលដៅលើផ្លូវហោះហើររបស់អាកាសយានដ្ឋាន បំផ្លាញយន្តហោះរបស់ Yemenia Airways ចំនួនបីគ្រឿង និងបានកំណត់គោលដៅលើមូលដ្ឋានទ័ពអាកាស al-Dailami ដែលនៅជាប់នឹងអាកាសយានដ្ឋាន។ លើសពីនេះទៀត រោងចក្រថាមពលនៅក្នុងទីក្រុងសាណា និងទីក្រុងកំពង់ផែ Hodeidah នៃសមុទ្រក្រហម ក៏ត្រូវបានវាយប្រហារផងដែរ ក្នុងគោលបំណងបង្អាក់សមត្ថភាពប្រតិបត្តិការរបស់ក្រុមហ៊ូធី។

យោធាអ៊ីស្រាអែល បាននិយាយថា អាកាសយានដ្ឋាននេះគឺជា «មជ្ឈមណ្ឌលកណ្តាលសម្រាប់របបភេរវករហ៊ូធី ដើម្បីដោះដូរអាវុធ និងប្រតិបត្តិការ»។

យោងតាមទូរទស្សន៍ Al-Masirah របស់ក្រុមហ៊ូធី មនុស្សបីនាក់បានស្លាប់នៅក្នុងការវាយប្រហារចុងក្រោយរបស់អ៊ីស្រាអែល។ ហ៊ូធី ដែលជាក្រុមមានការគាំទ្រដោយអ៊ីរ៉ង់ បានប្តេជ្ញាសងសឹក និងបន្តបង្ហាញការគាំទ្រចំពោះប៉ាឡេស្ទីននៅតំបន់ហ្គាហ្សា ចំពេលមានជម្លោះដែលកំពុងបន្តជាមួយអ៊ីស្រាអែល។

ក្រុមហ៊ូធី បានលើកឡើងថា៖ «ប្រតិបត្តិការរបស់កងកម្លាំងប្រដាប់អាវុធរបស់យើងនឹងបន្ត ហើយការគាំទ្រពីយេម៉ែនចំពោះប៉ាឡេស្ទីននឹងបញ្ឈប់ លុះត្រាណាតែការឈ្លានពាន និងការឡោមព័ទ្ធប្រឆាំងនឹងហ្គាហ្សាត្រូវបានបញ្ចប់»៕