ព័ត៌មានអន្ដរជាតិ

៥ ចំណុច ធ្វើឲ្យដឹងច្បាស់ពីទុរេនវៀតណាម នៅសល់ជោរជន់ និងគ្មានអ្នកទិញបរិភោគ

បានផុស

១ year មុន

នៅ

ថ្ងៃពុធ ៧ ឧសភា ២០២៥

ដោយ

ទុរេនវៀតណាមកំពុងគរចាល់ពោរពាសពេញប្រទេស និងធ្លាក់ថ្លៃយ៉ាងគំហុក ដោយសារតែការពន្យារពេល និងបិទលែងឲ្យដឹកចូលប្រទេសចិន ខណៈដែលគេតែងចាត់ទុកវៀតណាម ជាប្រទេសនាំចេញផ្លែឈើប្រភេទនេះឈានមុខគេទៀត។

ការចុះផ្សាយដោយសារព័ត៌មាន VN Express បានឲ្យដឹងថា បន្ទាប់ពីប្រទេសមហាយក្សចិនមួយនេះបន្តឹងដៃត្រួតពិនិត្យរកសារធាតុគីមីបង្កជំងឺមហារីកលើផ្លែឈើនាំចូលពីវៀតណាម។ ការធ្លាក់ចុះតម្លៃធុរេនរបស់ប្រទេសនេះ រួមនឹងតម្រូវការក្នុងស្រុកទាប ក៏កំពុងតែក្លាយជាសំណួរចាក់ស្រេះ និងការងឿងឆ្ងល់ក្នុងចំណោមអ្នកស្រុកជាច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាការពន្យល់ឲ្យកាន់តែច្បាស់ អំពីមូលហេតុដែលទុរេនធ្លាក់ថ្លៃ ពេលខ្លះលក់មិនដាច់ក្នុងស្រុក ហើយមូលហេតុដែលអតិថិជនវៀតណាមមួយចំនួនស្ទាក់ស្ទើរក្នុងការទិញមកបរិភោគ ពោលគឺទាក់ទិននឹងសារធាតុគីមីដែលអាចបង្កទៅជាជំងឺមហារីក។

១. កេរ្តិ៍ឈ្មោះល្បីខាងប្រើប្រាស់សារធាតុគីមីលើស ឬសារធាតុបង្កើនឲ្យផ្លែឈើទុំលឿន

មូលហេតុចម្បងនៃការភ័យខ្លាចរបស់អ្នកហូបគឺជំនឿថា ទុរេនវៀតណាមភាគច្រើនត្រូវបានដាំដុះដោយប្រើសារធាតុគីមីលើសកម្រិត។ ថ្នាំគីមីត្រូវបានប្រើប្រាស់ជាឧបករណ៍ពន្លឿនការលូតលាស់ សារធាតុជំរុញឲ្យទុំសិប្បនិម្មិត (ដូចជាឧស្ម័នអេទីឡែន ឬជាតិកាបូអ៊ីដ) និងការប្រើប្រាស់ថ្នាំសម្លាប់សត្វល្អិតច្រើនហួសហេតុ ជាទូទៅមានពាក្យចចាមអារ៉ាម ជាពិសេសក្នុងចំណោមអ្នកប្រើប្រាស់ប្រព័ន្ធផ្សព្វផ្សាយសង្គម និងអ្នកប្រើប្រាស់ដែលគិតពីសុខភាព។

ក្នុងករណីខ្លះ អ្នកទទួលទានរាយការណ៍ថា មានក្លិនចម្លែក ឬក្រោយពេលបរិភោគរួច បំពង់កស្រាប់តែឡើងក្ដៅ ហើយសារធាតុទាំងនេះប្រសិនមិនបានគ្រប់គ្រងល្អ អាចបណ្តាលឲ្យខ្សោយប្រព័ន្ធរំលាយអាហារ, កើតអាឡ័កស៊ី រលាកស្បែក, ឈឺក និងពិបាកក្នុងការដកដង្ហើម។

២. តម្លៃលើសសម្រាប់អ្នកក្នុងស្រុក សម្បូរពេកចាល់គរចោល សម្រាប់អ្នកទិញក្នុងស្រុក

ទុរេនគុណភាពខ្ពស់នៅវៀតណាមត្រូវបានដាំដុះជាចម្បងសម្រាប់ការនាំចេញ (ជាពិសេសទៅកាន់ប្រទេសចិន) ដូច្នេះកសិករ និងពាណិជ្ជករកំណត់តម្លៃខ្ពស់ ដោយផ្តល់អាទិភាពដល់ប្រាក់ចំណេញជាងការលក់ក្នុងស្រុក។ ក្នុងកំឡុងពេលនៃការនាំចេញកើនឡើង អ្នកទិញក្នុងស្រុក ត្រូវបានកំណត់តម្លៃចេញជារឿយៗ។

នៅពេលដែលការនាំចេញថយចុះ ជាឧទាហរណ៍ ដោយសារការរឹតបន្តឹងពាណិជ្ជកម្ម ឬការផ្គត់ផ្គង់លើស តម្លៃនឹងធ្លាក់ចុះ ប៉ុន្តែនៅពេលនោះ ទីផ្សារក្នុងស្រុកបានបាត់បង់ទំនុកចិត្ត ឬចំណាប់អារម្មណ៍រួចហើយ។ ដូច្នេះហើយ មនុស្សមើលឃើញផ្លែឈើថោកជាងជារបស់សល់ គុណភាពទាប ដែលមិនគួរទិញទេ។

៣. ទុរេនទុំប្រភេទទាប ឬទុរេនទុំសិប្បនិម្មិត

នៅពេលដែលអ្នកនាំចេញបដិសេធបណ្តុំមួយចំនួន (ឧ. ដោយសារទំហំតូច ឬទុំពេក) ពួកវាត្រូវបោះចោលទៅក្នុងទីផ្សារក្នុងស្រុក។ ផ្លែឈើទាំងនេះច្រើនតែទុំលឿនពេក មានរសជាតិឆ្ងាញ់ ឬមានជាតិគីមី ហើយធ្វើឲ្យមនុស្សគិតថាទុរេនវៀតណាមទាំងអស់មានគុណភាពអន់ ទោះបីជាវាខ្លះគ្រាន់តែជាពាក្យចចាមអារ៉ាមក្ដី។

៤. កង្វះការត្រួតពិនិត្យគុណភាព និងម៉ាកយីហោ

មិនដូចផ្លែទុរេនថៃ ដែលមានស្តង់ដារជាតិ និងទីផ្សារខ្លាំងទេ ទុរេនវៀតណាមរងគ្រោះដោយសារបញ្ហាជាច្រើនដូចជា៖ មិនមានស្លាកប្រភពដើមច្បាស់លាស់ទេ, មិនមានអត្តសញ្ញាណម៉ាកជាតិ, គុណភាពមិនស៊ីសង្វាក់គ្នាពីអ្នកលក់ទៅអ្នកលក់។ ភាពមិនស៊ីសង្វាក់គ្នានេះហើយ ដែលធ្វើឲ្យអ្នកប្រើប្រាស់មានអារម្មណ៍ថា ពួកគេកំពុងតែប្រថុយ រាល់ពេលដែលពួកគេទិញទុរេនរបស់កសិករវៀតណាម។ ជាពិសេសទុរេនវៀតណាមដែលផលិតក្នុងកសិដ្ឋានមិនមានស្តង់ដារ (មិនគ្រប់គ្រងដោយរដ្ឋ) អាចប្រើថ្នាំបាញ់សត្វល្អិតនិងសារធាតុបង្កប៉ះពាល់ដល់រាងកាយជ្រុលហួស។

៥. ការផ្គត់ផ្គង់លើសក្នុងរដូវប្រមូលផល ដោយគ្មានដំណោះស្រាយសម្រាប់ស្តុក

ទុរេនសុទ្ធតែមានរដូវកាលដែលត្រូវទុំ និងត្រូវពេលកាត់យកមកលក់ឲ្យត្រូវស្ដង់ដារនៃផ្លែឈើ។ បុន្តែប្រសិនបើគ្រប់កសិករបង្ខំបេះមកដាក់លក់លើទីផ្សារ នោះហើយជារឹសគល់ធំបំផុតដែលនាំឲ្យវាគរចាល់ហួសប្រមាណពេក ពេលហក់ចូលទីផ្សារភ្លាមៗ។ ជាពិសេស បើគ្មានកន្លែងទុកដាក់ឲ្យបានត្រឹមត្រូវ ការរក្សាសីតុណ្ហភាពមិនល្អ ក៏អាចនាំឲ្យផ្លែឈើរលួយលឿន បង្កររោគផ្សេងៗ ឬបើគ្មានមានឧស្សាហកម្មកែច្នៃ (ដូចជាទុរេនកក ឬជាអាហារសម្រន់ទុរេន) ការផ្គត់ផ្គង់លើសពីតម្រូវការ ក៏ជំរុញឲ្យតម្លៃធ្លាក់ចុះ ហើយនាំឲ្យមនុស្សស្ទាក់ស្ទើរ ក្នុងការទិញដោយសារតែខ្លាចថា របស់ថោកពេកអាចមិនល្អក្នុងការទទួលទាន។

សរុបមក មិនមែនទុរេនវៀតណាមទាំងអស់គឺមានគ្រោះថ្នាក់ទេ តែមានបញ្ហាពាក់ព័ន្ធនឹងការផលិតដែលគ្មានការគ្រប់គ្រង និងកសិករមួយចំនួនដែលប្រើសារជាតិខុសច្បាប់ ឬមិនត្រូវការស្តង់ដារជាតិ។ ដូច្នេះហើយហេតុអ្វីបានជា អ្នកទទួលទានផ្លែឈើខ្លះនៅវៀតណាម និងតំបន់មួយចំនួនខ្លាចរអារពុំហ៊ានទិញដោយគិតថា៖ «បើវាមានតម្លៃថោក វាត្រូវតែបានដាក់គីមីធ្វើឲ្យ ទុំលឿន ឬសល់ពីការបដិសេធការនាំចេញទៅក្រៅស្រុកជាដើម»៕