ខេត្តត្បូងឃ្មុំ គ្រោងប្រមូលផលទុរេនប្រមាណ​១ម៉ឺន៥ពាន់តោន លក់ទៅកាន់ទីផ្សារ

ទុរេនជាដំណាំសក្តានុពលដ៏សំខាន់មួយនៃខេត្តត្បូងឃ្មុំ គិតត្រឹមថ្ងៃទី៨ ខែឧសភា ឆ្នាំ២០២៥នេះ ទុរេន៤ប្រភេទ ប្រជាកសិករចាប់ផ្ដើមប្រមូលផលបណ្តើរៗហើយ លើផ្ទៃដី១ពាន់ហិកតា។ ជាមួយនឹងផល១៥តោន ក្នុង១ហិកតា ខេត្តគ្រោងប្រមូលផលទុរេន ១ម៉ឺន៥ពាន់តោន ក្នុងតម្លៃក្រោម២ម៉ឺនរៀលក្នុង១គីឡូក្រាម។

លោក ហេង ទូច អាយុ៤៦ឆ្នាំ រស់នៅភូមិចន្ទូង ឃុំស្រឡប់ ស្រុកត្បូងឃ្មុំ ខេត្តត្បូងឃ្មុំ បានបញ្ជាក់ឲ្យដឹងថា លើផ្ទៃដីទំហំដី៦ហិកតា មានទុរេនចំនួន៨៥០ដើម ពូជទុរេនមួនថង គាត់មានក្តីរំពឹងថា នឹងទទួលបានទិន្នផល ៧០តោន ក្នុងឆ្នាំ២០២៥នេះ ហើយនៅចុងខែឧសភា នឹងចាប់ប្រមូលផលហើយ លក់បោះដុំ១គីឡូក្រាមតម្លៃ១ម៉ឺន២ពាន់រៀល លក់រាយ១ម៉ឺន៨ពាន់រៀល។

លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទខេត្ត បានបញ្ជាក់ឲ្យដឹងដែរថា ខេត្តត្បូងឃ្មុំ មានផ្ទៃដីដាំទុរេន ទំហំ១ពាន់ហិកតា កសិករបានដាំទុរេន៤ប្រភេទរួមមាន ពូជមួនថង ពូជមូសាំងគីម ពូជ រី៦ និងពូជ​ រី៩ គ្រប់ទាំង៧ស្រុក/ក្រុង ហើយស្រុកដែលបានដាំទុរេនច្រើនជាងគេមាន ២ស្រុក គឺស្រុកតំបែរ និងស្រុកមេមត់ ដែលមានផ្ទៃដីដាំដុះរហូតដល់ ៦០០ហិកតាឯណោះ។

លោកប្រធានមន្ទីរបានបញ្ជាក់ឲ្យដឹងទៀតថា កន្លងមកជំនាញបានចុះបណ្តុះបណ្តាលដល់ប្រជាកសិករដាំទុរេន ទាំងបច្ចេកទេសដាំ ការជ្រើសរើសពូជ ការថែទាំដាក់ជី ការបាញ់ថ្នាំសម្លាប់មេរោគ ដង្កូវដួង ។ល។ លទ្ធផលកសិករប្រមូលផលបានដូចការរំពឹងទុកមែន ទុរេនប្រកបដោយគុណភាព មានសុវត្ថិភាព គ្មានសារធាតុពុល នៅឆ្នាំ២០២៥នេះ ខេត្តយើងនឹងដាក់ការរំពឹងទុកប្រមូលបានទិន្នផលទុរេន មិនក្រោម១ម៉ឺន៥ពាន់តោននោះទេ៕

អត្ថបទ៖ សាន វិឡែម