សាខា ប.ស.ស និងមណ្ឌលការងារនៅផ្សារទំនើបអ៊ីអនទាំង៣ទីតាំង បានសម្ពោធដាក់ឱ្យប្រើប្រាស់ជាផ្លូវការ

នាថ្ងៃទី៣១ ខែសីហា ឆ្នាំ២០២៥ សាខាបេឡាជាតិសន្តិសុខសង្គម (ប.ស.ស) និងមជ្ឈមណ្ឌលការងារទាំង៣ទីតាំងធំៗនៅផ្សារទំនើប អ៊ីអន ម៉ល ក្នុងរាជធានីភ្នំពេញ ត្រូវបានសម្ពោធដាក់ឱ្យប្រេីប្រាស់ជាផ្លូវការ។

ពិធីសម្ពោធដាក់ឱ្យប្រេីប្រាស់ជាផ្លូវការនូវសាខា ប.ស.ស និងមជ្ឈមណ្ឌលការងារទាំង៣ទីតាំងធំៗ ក្នុងផ្សារទំនើប អ៊ីអន ម៉ល បានរៀបចំឡើងក្រោមវត្តមានលោក ហេង សួរ រដ្ឋមន្រ្តីក្រសួងការងារ និងបណ្ដុះបណ្ដាលវិជ្ជាជីវៈ។

ការពង្រីកសេវា ប.ស.ស និងមជ្ឈមណ្ឌលការងារ នាពេលនេះ គឺជាការបង្ខិតសេវាសាធារណៈរបស់ក្រសួងការងារ និងបណ្ដុះបណ្ដាលវិជ្ជាជីវៈ ឱ្យកាន់តែជិតប្រជាពលរដ្ឋ ហើយក៏បានឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការផ្តល់នូវសេវាកាន់តែលឿន រហ័ស ងាយស្រួលដល់ប្រជាពលរដ្ឋ ដើម្បីបំពេញតម្រូវការរបស់បងប្អូនប្រជាពលរដ្ឋ។

លោករដ្ឋមន្រ្តី ហេង សួរ បានប្រកាសផ្តល់ដំណឹងដល់ប្រជាពលរដ្ឋទាំងអស់អញ្ជេីញមកទទួលសេវារបស់បេឡាជាតិសន្ដិសុខសង្គម ប.ស.ស ក៏ដូចជាចុះឈ្មោះស្វែងរកការងារ និងប្រឹក្សាឱកាសការងារនៅគ្រប់ផ្សារទំនេីប អ៊ីអន ទាំង ៣សាខា ដែលនៅជិតក្នុងរាជធានីភ្នំពេញ។

គួរជម្រាបថា សាខា ប.ស.ស និងមជ្ឈមណ្ឌលការងារនៅ អ៊ីអន ម៉ល (AEON MALL) ទាំង ៣ទីតាំង បម្រេីការងារពីថ្ងៃចន្ទ ដល់ថ្ងៃអាទិត្យ ចាប់ពីម៉ោង ៩:០០នាទីព្រឹក ដល់ម៉ោង ២២:០០នាទីយប់ លើកលែងតែថ្ងៃបុណ្យជាតិ៕