កម្ពុជាចង់ឱ្យអឺរ៉ុបបន្តឃ្លាំមើលបញ្ហាព្រំដែន ខណៈយោធាថៃបន្តពង្រីកតំបន់ជម្លោះ

កម្ពុជាថ្លែងប្រាប់ពីការល្មើសកិច្ចព្រមព្រៀងនូវបទឈប់បាញ់របស់ភាគីថៃ ទៅកាន់សហភាពអឺរ៉ុបឱ្យបានដឹង ហើយស្នើឱ្យសហភាពអឺរ៉ុបបន្តតាមដានដោយការយកចិត្តទុកដាក់ទៅលើបញ្ហាព្រំដែនរវាងកម្ពុជា និងថៃ ក្នុងរយៈពេលចុងក្រោយនេះ ដែលយោធាថៃបន្តពង្រីកតំបន់ជម្លោះ។

នេះជាការលើកឡើងរបស់អនុប្រធានទី២ព្រឹទ្ធសភា លោកបណ្ឌិត ធន់ វឌ្ឍនា នៅក្នុងកិច្ចប្រជុំការងារជាមួយលោក អ៊ីហ្កូ ឌ្រីសម៉ាន់ (Igor Driesmans) ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា នាព្រឹកថ្ងៃទី៥ ខែកញ្ញា ឆ្នាំ២០២៥ ដែលកិច្ចប្រជុំនេះ ក្នុងគោលបំណងពិភាក្សាពីកិច្ចសហប្រតិបត្តិការរវាងព្រឹទ្ធសភាកម្ពុជា និងសហភាពអឺរ៉ុប ដើម្បីធ្វើឱ្យប្រសើរឡើងនូវស្ថានភាពជម្លោះព្រំដែនកម្ពុជា-ថៃ និងស្តារឡើងវិញនូវជីវភាព ស្ថានភាពសេដ្ឋកិច្ចខេត្តតាមបណ្តោយព្រំដែន។

លោកបណ្ឌិត ធន់ វឌ្ឍនា បានគូសរំលេចពីតួនាទីដ៏សំខាន់របស់សហភាពអឺរ៉ុប ក្នុងការចូលរួមជំរុញដោះស្រាយជម្លោះព្រំដែនកម្ពុជា-ថៃ ដោយសន្តិវិធី ផ្អែកតាមច្បាប់អន្តរជាតិ ដែលកន្លងមក សហភាពអឺរ៉ុបបានដោះស្រាយជម្លោះជាច្រើនក្នុងឆាកអន្តរជាតិ ។

នៅចំពោះមុខលោកឯកអគ្គរដ្ឋទូតសហភាពអឺរ៉ុប លោកអនុប្រធានព្រឹទ្ធសភា បានលើកអំពីករណីភាគីយោធាថៃពង្រីកតំបន់ជម្លោះ ទៅកាន់ភូមិឋានដែលប្រជាពលរដ្ឋខ្មែរបាននិងកំពុងរស់នៅជាច្រើនទសវត្សរ៍មកហើយ ព្រមទាំងរំលឹកពីបញ្ហាកងកម្លាំងកម្ពុជាចំនួន១៨នាក់ ដែលភាគីថៃបានចាប់ធ្វើជាចំណាប់ខ្មាំងក្រោយបទឈប់បាញ់ចូលជាធរមាននេះ រហូតមកដល់ពេលនេះ មិនទាន់មានការប្រគល់ឱ្យកម្ពុជាវិញឡើយ។

បញ្ហាទាំងនេះ នៅតែជាក្ដីកង្វល់របស់កម្ពុជា ហើយក៏ជារឿងដែលអយុត្តិធម៌សម្រាប់កម្ពុជា ដែលរងការបំពានម្ដងហើយម្ដងទៀតពីសំណាក់យោធាថៃ ហើយក៏ជាការរំលោភលើបទឈប់បាញ់ និងច្បាប់អន្តរជាតិផងដែរ។ លោក ធន់ វឌ្ឍនា គូសបញ្ជាក់បែបនេះទៅកាន់លោកឯកអគ្គរដ្ឋទូតសហភាពអឺរ៉ុប ដែលន័យនេះ លោក ចង់ឱ្យសហភាពអឺរ៉ុប (EU) និងព្រឹទ្ធសភាកម្ពុជា គួរសហការគ្នា ដើម្បីធ្វើឱ្យស្ថានភាពនេះប្រសើរឡើង និងការពារកុំឱ្យរីករាលដាលបន្ថែមទៀត។

ឆ្លើយតបនឹងកង្វល់របស់កម្ពុជា លោក អ៊ីហ្កូ ឌ្រីសម៉ាន់ បានលើកឡើងថា សហភាពអឺរ៉ុបតាមដានយ៉ាងយកចិត្តទុកដាក់ចំពោះភាពតានតឹងនៃជម្លោះប្រដាប់អាវុធនៅព្រំដែនកម្ពុជា-ថៃ ដោយសហភាពអឺរ៉ុបបានចេញសេចក្តីថ្លែងការណ៍និងការអំពាវនាវជាច្រើន ដើម្បីឱ្យមានដំណោះស្រាយដោយសន្តិវិធី។

តាមការបញ្ជាក់របស់លោកឯកអគ្គរដ្ឋទូត គឺសហភាពអឺរ៉ុបនៅតែផ្តល់តម្លៃខ្ពស់លើការគោរពច្បាប់អន្តរជាតិ និងយន្តការដោះស្រាយជម្លោះតាមច្បាប់អន្តរជាតិ ដែលជាថ្មីម្តងទៀត អឺរ៉ុបស្វាគមន៍ចំពោះការសម្រេចបាននូវបទឈប់បាញ់ ក្រោមយន្តការអាស៊ាន កាលពីថ្ងៃទី២៨ ខែកក្កដាកន្លងមក។ ដើម្បីធានាបានសន្តិភាពយូរអង្វែង លោកថា សហភាពអឺរ៉ុបបាន ត្រៀមខ្លួនរួចជាស្រេចសហការជាមួយអាស៊ាន ដើម្បីចូលរួមសង្កេតការណ៍នៅតំបន់ជម្លោះ។

ជាការកត់សម្គាល់ ជាមួយនឹងការសម្ដែងនូវការសោកស្តាយចំពោះការបាត់បង់ និងទុក្ខលំបាករបស់ប្រជាជនភៀសសឹក ដែលរងគ្រោះដោយសារសង្គ្រាមកន្លងមកនេះ សហភាពអឺរ៉ុប បានផ្ដល់ជំនួយមនុស្សធម៌ជាថវិកាប្រមាន៧០០,០០០អឺរ៉ូ ស្មើខ្ទង់ ៨១៦,០០០ដុល្លារអាមេរិក) សម្រាប់ជួយដល់ប្រជាជនដែលរងគ្រោះដោយជម្លោះនៅតាមព្រំដែនកម្ពុជា-ថៃ៕