សម្ដេចតេជោ ហ៊ុន សែន ៖ គណបក្សប្រឆាំង មិនមានយុវជនបន្តវេនដូចគណបក្សប្រជាជននោះទេ

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងថា គណបក្សប្រឆាំង មិនមានយុវជនបន្តវេនដូចគណបក្សប្រជាជនកម្ពុជានោះទេ។

ការថ្លែងរបស់សម្ដេចតេជោ ហ៊ុន សែន បានធ្វើឡើងក្នុងពិធីជួបសំណេះសំណាល និងសួរសុខទុក្ខជាមួយកម្មករ-កម្មការិនី នៅស្រុកជើងព្រៃ ខេត្តកំពង់ចាម នាព្រឹកថ្ងៃទី ១៦ ខែមិថុនា ឆ្នាំ ២០២៣នេះ។

សម្ដេចតេជោ ហ៊ុន សែន ថ្លែងបន្តថា «អ្វីមួយដែលជាការកត់សម្គាល់​ធំ ពួកអស់លោកឯងគ្មានយុវជនបន្តវេនដូចគណបក្សប្រជាជនទេ អត់មានមនុស្សបន្តវេន គណបក្សប្រជាជន មានមនុស្ស មានយុវជនរាប់សិបនាក់ ដែលមានលទ្ធភាពធ្វើនាយករដ្ឋមន្ត្រី សុំផ្ដាំទៅលោកឯងទៅ»។​

សម្ដេចតេជោ ហ៊ុន សែន បានលើកឡើងដែរថា នៅក្នុងចំណោមក្រុមគណបក្សប្រឆាំង គឺមិនមានតួអង្គ​សំខាន់ណាមួយ​ មានសមត្ថភាពអាចធ្វើនាយករដ្ឋមន្ត្រីបាននោះទេ ដោយខ្លះមិនចេះទាំងអក្សរខ្មែរ និងក៏មានសញ្ជាតិបរទេសថែមទៀត៕​