ផ្លូវលេខ៣៦០ក្នុងមូលដ្ឋានសង្កាត់បឹងកេងកង​ទី១ កំពុង​ខូច​ខាតខ្លាំង ខណៈអាជ្ញាធរថា ចាំរាំងភ្លៀងបន្តិចទើបជួសជុល

ប្រជាពលរដ្ឋដែលរស់នៅ ក៏ដូចជាអ្នកធ្វើដំណើរឆ្លងកាត់ផ្លូវលេខ ៣៦០ ក្នុងមូលដ្ឋានសង្កាត់បឹងកេងកងទី១ ខណ្ឌបឹងកេងកង កំពុងជួបការលំបាកបញ្ហាផ្លូវជង្ហុកទឹកដក់ជ្រៅៗ ដែលជះផលប៉ះពាល់លើការធ្វើដំណើរ និងការប្រកបរបរ រកសុី ក្បែរតំបន់នោះ ខណៈអាជ្ញាធរថា រង់ចាំមេឃរាំងភ្លៀងបន្តិចទើបអាចជួសជុលបាន។

លោក ចាន់ រាជ្យ ជាប្រជាពលរដ្ឋរស់នៅតំបន់នោះបានប្រាប់អោយដឹងថា ផ្លូវជង្ហុកនេះខូចយូរគួរសមដែរ ហើយចំណុចនេះក៏ឧស្សាហ៍មានពលរដ្ឋឆ្លងកាត់ច្រើនគួរសមដែរបង្កការលំបាករាល់ពេលធ្វើដំណើរឆ្លងកាត់។ គាត់តែងឧស្សាហ៍ឃើញមានពលរដ្ឋអ្នកបើកម៉ូតូឆ្លងកាត់ជិះធ្លាក់ចូលជង្ហុកនេះម្តងៗ ស្ទើរតែដួលទៅហើយ ហើយជង្ហុកនីមួយៗជ្រៅ ថែមទាំងមានទឹកដក់ទៀត ដែលជាហេតុមានផលប៉ះពាល់លើការធ្វើដំណើររបស់ប្រជាពលរដ្ឋ និងអ្នកប្រកបរបររកសុីក្បែរនោះ សាចទឹកកខ្វក់ទៅលើទីតាំងរបស់ពួកគាត់ផងដែរ។

អ្នកស្រី លាភ ជាពលរដ្ឋម្នាក់ទៀតក៏បានលើកឡើងដែរថា ផ្លូវដែលខូចខាតនេះបានបង្កការលំបាកខ្លាំង ព្រោះឆ្លងកាត់ម្តងៗ ដឹងតែខ្ទាតទឹកកខ្វក់ដែលដក់នៅក្នុងជង្ហុកប្រឡាក់សម្លៀកបំពាក់របស់គាត់ ពេលឆ្លងកាត់ម្តងៗ។ ពលរដ្ឋបន្តថា បើសិនជាពេលថ្ងៃ អ្នកដំណើរឆ្លងកាត់មិនសូវគ្រោះថ្នាក់ខ្លាំងប៉ុន្មាននោះទេ ប៉ុន្តែសម្រាប់ពេលយប់ប្រាកដណាស់ អ្នកបើកបរហ៊ានតែលឿនមិនប្រយ័ត្ន មើលជង្ហុកមិនទាន់ ដឹងតែគ្រោះថ្នាក់ហើយ។

ពួកគាត់បានសំណូមពរដល់អាជ្ញាធរពាក់ព័ន្ធមេត្តាជួយស្ថាបនាផ្លូវដែលកំពុងរងការខូចខាតនេះ ឡើងវិញដើម្បីជួយ​សម្រួលផលលំបាកលើការរស់នៅ និងធ្វើដំណើរឆ្លងកាត់ ដែលពិបាកដល់ប្រជាពលរដ្ឋ ក្នុងការប្រកបរបររកសុីចិញ្ចឹមជីវិត ដែលនៅតំបន់ខាងលើនោះផង។

លោក សុខ សម្បត្តិ អភិបាលនៃគណៈអភិបាលខណ្ឌបឹងកេងកង ប្រាប់ កម្ពុជាថ្មី នៅថ្ងៃទី១៣តុលានេះថា ផ្លូវលេខ៣៦០នេះ ចាប់ពីមហាវិថីព្រះនរោត្តមដល់ផ្លូវលេខ៥១ អាជ្ញាធរបានដេញថ្លៃជួសជុល និងបានចុះកិច្ចសន្យាគម្រោងអនុវត្តរួចរាល់ហើយ តែដោយសារស្ថានភាពមេឃភ្លៀងជារៀងរាល់ថ្ងៃ ទើបក្រុមហ៊ុនសុំពន្យារពេលរង់ចាំរាំងភ្លៀងបន្តិចសិន។ លោកសូមអធ្យាស្រ័យដល់ប្រជាពលរដ្ឋ ដែលកំពុងជួបការលំបាកនេះផងដែរ៕

អត្ថបទ៖ រដ្ឋា