អាជ្ញាធរក្រុងខេមរភូមិន្ទ ឃាត់ខ្លួនមនុស្ស២នាក់ ពាក់ព័ន្ធបទល្មើសព្រៃឈើ

កម្លាំងគណបញ្ជាការឯកភាពក្រុងខេមរភូមិន្ទ បានឃាត់ខ្លួនជនសង្ស័យ២នាក់ និងឈើប្រណិត១រថយន្ត ខណៈពួកគេដឹកជញ្ជូនលើកំណាត់ផ្លូវជាតិលេខ១០ ខេត្តកោះកុង។

ជនសង្ស័យ២នាក់ ត្រូវបានកម្លាំងគណបញ្ជាការឯកភាពក្រុងខេមរភូមិន្ទ ឃាត់ខ្លួនភ្លាមៗក្រោយរកឃើញថា បានដឹកជញ្ជូនឈើប្រណិតខុសច្បាប់១រថយន្ត កាលពីថ្ងៃទី២១ ខែមករា ឆ្នាំ២០២៦ វេលាម៉ោង១០:១០នាទី ត្រង់ចំណុចប៉ុស្តិ៍គោលដៅត្រួតពិនិត្យលំហូរជនបរទេស ក្នុងសង្កាត់ស្មាច់មានជ័យ។

លោកវរសេនីយ៍ឯក យស់ ចាន់វិចិត្រ អធិការនគរបាលក្រុងខេមរភូមិន្ទ បានឱ្យដឹងព្រឹកថ្ងៃទី២២ ខែមករា ឆ្នាំ២០២៦​នេះថា ជនសង្ស័យ២នាក់ទី១.ឈ្មោះ អ៊ុល សុធី ភេទប្រុស អាយុ១៨ឆ្នាំ មុខរបររត់ឡាន ទីលំនៅបច្ចុប្បន្នភូមិអន្លង់ហាប់ ទី២.ឈ្មោះ ថា សីហា ភេទប្រុស អាយុ២០ឆ្នាំ សញ្ជាតិខ្មែរ មុខរបរព្រូឡាន ទីលំនៅបច្ចុប្បន្នភូមិស្ពា។ ជនសង្ស័យទាំង២រូប រស់នៅឃុំកោះជុំ ស្រុកកណ្តៀង ខេត្តពោធិ៍សាត់។

លោកអធិការបន្តថា ជនសង្ស័យ២នាក់នេះ បានដឹកជញ្ជូនឈើប្រណិតពីទិសដៅចេញពីខេត្តពោធិ៍សាត់ទៅភ្នំពេញ តាមរយៈរថយន្ត១គ្រឿងម៉ាកសាំងយ៉ុង ស្លាកលេខភ្នំពេញ2A-1814 ក្នុងរថយន្តមានឈើកន្លះឡាន។ ទោះយ៉ាងណា លោកមិនដឹងថា ឈើប្រណិតទាំងនោះជាប្រភេទឈើអ្វីខ្លះ ហើយប៉ុន្មានម៉ែត្រគូបទេ ពោលគឺរង់ចាំក្រុមមន្រ្តីរដ្ឋបាលព្រៃឈើ និងបរិស្ថានខេត្ត ចុះពិនិត្យវាស់វែងរួមគ្នា ចំណែកឯជនសង្ស័យ២កសាងសំណុំរឿងបញ្ជូនបន្តតាមនីតិវិធី។

ទាក់ទិនបញ្ហានេះ លោក ប្រាក់ ប៊ុន្នី នាយខណ្ឌរដ្ឋបាលព្រៃឈើខេត្តកោះកុង ថ្លែងថា លោកមិនទាន់បានទទួលព័ត៌មាននេះពីសមត្ថកិច្ចជំនាញនៅឡើយទេ ប៉ុន្តែលោកទាក់ទងទៅសមត្ថកិច្ចលើករណីនេះ ដើម្បីធ្វើការរួមគ្នា៕

អត្ថបទ៖ សិរីវឌ្ឍនៈ